យោងតាមប្រភពគេហទំព័រសារព័ត៌មានថៃចេញផ្សាយថ្ងៃទី១៣ ខែតុលា ឆ្នាំ២០១១នេះបានឲ្យដឹងថា ប៉ូលិសថៃនៅភូមិភាគទី៦ បានប្រើប្រាស់ឧទ្ធម្ភាគចក្រហោះហើរពិនិត្យមើលខេត្តមួយចំនួនដែលរងការលិចលង់ដោយគ្រោះទឹកជំនន់ ជាពិសេសខេត្តឧទ័យឋានី ដែលកំពុងមានកំពស់ ទឹកជំនន់លិចដាច់កន្ទុយភ្នែកនោះ។
ប្រភពបានឲ្យដឹងទៀតថា បុរសជនជាតិថៃម្នាក់ឈ្មោះអាម៉នជាម្ចាស់កសិដ្ឋានចិញ្ចឹមក្រពើ នៅក្នុងខេត្តខាងលើនេះបានប្រាប់អ្នកសារព័ត៌មានថា ក្នុងស្ថានការណ៍គ្រោះទឹកជំនន់រយៈពេលជាង១ខែនេះ ទឹកនៅតែគ្មានតម្រុយថានឹងស្រកចុះនោះទេ តែបែរជាកើនឡើងរើយៗរហូតមានកំពស់ជិត ៣ម៉ែត្រទៅហើយ។
បុរសម្ចាស់កសិដ្ឋានក្រពើនេះបានឲ្យដឹងទៀតថា កំពស់ទឹកជំនន់នេះភាគច្រើនរងឥទ្ធិពល ពីទន្លេចំនួន៣ គឺទន្លេសាក់កេរាំង ទន្លេខ្វេតាកដែត និងទន្លេចៅប្រាយ៉ា មានសន្ទុះទឹកខ្លាំងធ្វើឲ្យរបងការពារកសិដ្ឋានចិញ្ចឹមក្រពើបាក់បែកអស់ជាង១០ម៉ែត្រ ហើយក្រពើទាំងអស់ចិញ្ចឹមនៅក្នុងកសិដ្ឋាននេះមានចំនួនជាង៣០០០ក្បាល បានរបូតចេញទៅតាមទឹកប្រមាណ១០០០ក្បាល។
ម្ចាស់កសិដ្ឋានបន្ថែមទៀតថា ការខាតបង់របស់ខ្លួនលើកនេះមានទឹកប្រាក់មិនតិចជាង១០ ទៅ២០លានបាតនោះទេ គិតទាំងការសាងសង់របងកំពស់១ម៉ែត្របន្ថែមទៀតដើម្បីការពារក្រពើរួចចេញដោយពេលនេះទឹកនៅសល់ត្រឹមតែ១៥សង់ទីម៉ែត្រប៉ុណ្ណោះនឹងលិចរបងការពារដែលមានកំពស់៣ម៉ែត្រនោះហើយ៕
ពីគេហទំព័រ៖ កម្ពុជាថ្មី
No comments:
Post a Comment
yes