បើគ្មានអ្វីផ្លាស់ប្តូរ ពីពេលនេះ ដល់ឆ្នាំ ២០៥០ ទីក្រុងបាងកកនឹងលិចចូលទៅក្នុងទឹកសមុទ្រ។ នេះជាការនិយាយបង្ការទុកមុនរបស់អ្នកជំនាញថៃ ខាងផ្នែកប្រែប្រួលអាកាសធាតុ នៅសកលវិទ្យាល័យជូឡាឡុងកន។ រហូតមកដល់ថ្ងៃចន្ទទី ៧ វិច្ឆិកានេះ ទឹកដីមួយភាគប្រាំរបស់ទីក្រុងបាងកកនៅតែជន់លិចដោយទឹកជំនន់ ដែលបង្ក ដោយទឹកភ្លៀងមូសុង កាលពីខែកក្កដាមុន។ ទឹកជំនន់ដែលមិនងាយនឹងស្រកអស់ពីទីក្រុង អាចជាប្រផ្នូល ឲ្យដឹងមុនពីអនាគតរបស់បាងកក ដែលជារាជធានីចុងក្រោយរបស់ព្រះរាជាណាចក្រថៃ។
រដ្ឋាភិបាលថៃបានសុខចិត្តលះបង់សង្កាត់ខ្លះរបស់ទីក្រុងបាងកកឲ្យជន់លិចដើម្បីអាចបង្ហូរទឹកទៅកាន់ឈូងសមុទ្រ។ ប៉ុន្តែ រហូតមកដល់ពេលនេះ ទឹកជំនន់ដែលហូរធ្លាក់មកពីភាគខាងជើងប្រទេស ហាក់នៅនឹងថ្កល់ នៅក្រុងបាងកក។ វាមិនមែនជារឿងចៃដន្យទេ ដែលទឹកជំនន់ហូរចេញ ដោយយឺតៗពីទីក្រុងបាងកកសំដៅទៅសមុទ្រ។
បើប្រៀបធៀបនឹងកម្រិតទឹកសមុទ្រ ទីក្រុងបាងកកស្ថិតនៅខ្ពស់ជាងទឹកសមុទ្រតែពីរម៉ែត្រប៉ុណ្ណោះ។ យោងតាមការសិក្សារបស់ធនាគារពិភពលោក ទីក្រុងបាងកកត្រូវបានសង់ឡើង នៅកន្លែងដែលអាចលិចទឹក។ ក្នុងទសវត្សរ៍ឆ្នាំ១៩៧០ រាជធានីថៃមួយនេះបានស្រុតចុះក្នុងដី កម្រាស់១០សង់ទីម៉ែត្រ ជារៀងរាល់ឆ្នាំ។ បាងកកស្រុតចុះ ដោយសារតែស្រទាប់ទឹកក្រោមដីបាក់ស្រុត ក្រោយពីគេបូមយកទឹក យ៉ាងក្រាស់ក្រែលដើម្បីការប្រើប្រាស់ប្រចាំថ្ងៃរបស់ជីវិតមនុស្សជាង ១២លាននាក់ និងរោងចក្រឧស្សាហកម្ម ក្នុងទីក្រុងមួយនេះ។ ធនាគារពិភពលោកវិញនៅបានសរសេរពីគ្រោះធម្មជាតិទឹកជំនន់ដែលនឹងកើត៤លើក ជាបន្តបន្ទាប់គ្នា នៅទីក្រុងបាងកក រហូតដល់ឆ្នាំ ២០៥០។
ប៉ុន្តែ តាមការសិក្សាដដែល ចំណាត់ការរបស់រដ្ឋាភិបាលដើម្បីការពារស្រទាប់ទឹកក្រោមដីបានជួយទីក្រុងបាងកកឲ្យស្រុតចុះក្រោមដី ត្រឹមតែមួយសង់ទីម៉ែត្រប៉ុណ្ណោះ។ ការវាយតម្លៃ ដែលត្រូវលោកអាណុងស្នីទវង្ស អ្នកជំនាញថៃ នៅសកលវិទ្យាល័យជូឡាឡុងកនមិនយល់ស្របជាមួយ ដោយថា ទីក្រុងបាងកកនៅតែស្រុតចុះក្រោមដីប្រមាណ ៣សង់ទីម៉ែត្រជារៀងរាល់ឆ្នាំ។
ស្រទាប់ទឹកក្រោមដីចុះខ្សោយជារឿងមួយ។ ប៉ុន្តែ ការប្រែប្រួលអាកាសធាតុដែលធ្វើឲ្យកម្រិតទឹកសមុទ្រកើនឡើងពី១៩ ទៅ ២៩សង់ទីម៉ែត្រ ក្នុង៤០ឆ្នាំទៀត ទើបជាគ្រោះថ្នាក់ពិតប្រាកដដែលគំរាមកំហែងអនាគតទីក្រុងបាងកក។ លោកអាណុងស្នីទវង្សបានព្រមានថា ប្រសិនបើរដ្ឋាភិបាលមិនចាត់វិធានការបន្ទាន់ ហើយកម្ពស់ទឹកសមុទ្រនៅតែកើនឡើងដោយសារការប្រែប្រួលអាកាសធាតុ នោះក្នុងរយៈពេល ៥០ឆ្នាំ ទឹកដីភាគច្រើនរបស់ក្រុងបាងកក នឹងលិចចូលទៅក្នុងសមុទ្រ។
អ្នកជំនាញថៃបានទាញសញ្ញាប្រកាសអាសន្ន និងបានក្រើនរំលឹករដ្ឋាភិបាលថៃ ពីការរើទីក្រុង ទៅនៅទីតាំងថ្មី ដែលគេធ្លាប់បានធ្វើកន្លងមកក្នុងអតីតកាល។ រាជធានីបាងកកផ្ទាល់ ត្រូវបានកសាងឡើង នៅឆ្នាំ ១៧៨២ បន្ទាប់ពីប្រទេសថៃរើរាជធានីពីអាយុធ្យាក្រោយចាញ់ចម្បាំងជាមួយភូមា។
សម្រាប់វិស្វករអង់គ្លេសដែលតាមដានករណីក្រុងបាងកក ប្រសិនបើរដ្ឋាភិបាលថៃចង់បន្តតាំងទីក្រុងរបស់ខ្លួន នៅបាងកកដដែល គេត្រូវវិនិយោគច្រើន ក្នុងពី ១០ ទៅ ២០ឆ្នាំទៅមុខដើម្បីសាងសង់ប្រព័ន្ធការពារទឹកជំនន់។ តម្លៃវិនិយោគនឹងមានទំហំធំធេង ព្រោះតាមធនាគារអភិវឌ្ឍន៍អាស៊ី គេត្រូវវិនិយោគយ៉ាងហោច ១០ពាន់លានដុល្លារ ក្នុងមួយឆ្នាំៗ ដើម្បីសាងសង់សំណង់ទប់ទល់នឹងគ្រោះធម្មជាតិ ដែលជាលទ្ធផលនៃការផ្លាស់ប្តូរអាកាសធាតុ៕
BY: RFI
No comments:
Post a Comment
yes