អគ្គិភ័យឆាបឆេះ រោងចក្រកាត់ដេរ គីមម៉ា នៅសង្កាត់ ស្ទឹងមានជ័យ

 រោងចក្រកាត់ដេរគីមម៉ា នៅក្បែរសួនវឌ្ឍនៈ ក្នុងសង្កាត់ស្ទឹងមានជ័យ ខណ្ឌមានជ័យ ត្រូវបាន អគ្គិភ័យ ឆាបឆេះយ៉ាងសន្ធោសន្ធៅ នៅវេលាម៉ោងប្រមាណ១០ និង៣០នាទីយប់ថ្ងៃទី២០ ខែធ្នូ ឆ្នាំ២០១១ ។

យោងតាមសេចក្តីរាយការណ៍បានឲ្យដឹងថា រថយន្តពន្លត់អគ្គិភ័យរបស់រាជធានីភ្នំពេញ ប្រមាណ​ជា​៥គ្រឿង បានទៅដល់កន្លែងកើតហេតុ និងបាញ់ពន្លត់ ។ ជាមួយគ្នានេះអភិបាលខណ្ឌមានជ័យ លោក គួច ចំរើន បានចុះដល់កន្លែងកើតហេតុភ្លាម ហើយបានបញ្ជាការកម្លាំងសមត្ថកិច្ច ឲ្យជួយ​អន្តរាគមន៍បាញ់ពន្លត់អគ្គិភ័យនេះផងដែរ។

ពាក់ព័ន្ធនឹងករណីអគ្គិភ័យនេះ មិនទាន់មានប្រភពបញ្ជាក់ពីមូលហេតុ ដែលនាំឲ្យមាន​អគ្គិភ័យ​នេះ​នៅឡើយទេ។ សេចក្តីរាយការណ៍បានឲ្យដឹងផងដែរថា រោងចក្រដែលរងអគ្គិភ័យនេះ មិនមាន​កម្មករ-កម្មការិនី ធ្វើការវេណយប់នោះទេ។

គូរកត់សម្គាល់ផងដែរថា នៅចុងឆ្នាំ២០១១នេះមានគ្រោះអគ្គីភ័យកើតមានឡើងស្ទើជារៀងរាល់ថ្ងៃ ៕