លោក ទៀ បាញ់និងសមភាគីសិង្ហបុរីនៅក្រសួងការពារជាតិ។រូបថត លីណា
ភ្នំពេញៈ បន្ទាប់ពីជំនួបបិទទ្វារមួយ កាលពីម្សិលមិញ រដ្ឋមន្រ្តីការពារជាតិកម្ពុជា និងសិង្ហបុរី បានប្រកាសថា ជម្លោះសមុទ្រចិនខាងត្បូងដ៏ចម្រូងចម្រាស នឹងមិនត្រូវដាក់ក្នុងរបៀបវារៈ នៃកិច្ចប្រជុំរដ្ឋមន្រ្តីការពារជាតិអាស៊ាន នាសប្តាហ៍ក្រោយនេះទេ។
ថ្លែងទៅកាន់អ្នកយកព័ត៌មាន បន្ទាប់ពីបានជួបសមភាគីសិង្ហបុរី លោក ទៀ បាញ់ រដ្ឋមន្រ្តីការពារជាតិកម្ពុជា បានទទួលស្គាល់សារៈសំខាន់ ក្នុងការដោះស្រាយជម្លោះដ៏ស្មុគស្មាញនេះ ដោយលោកបានអធិប្បាយជម្លោះនេះថា ជាបញ្ហាសំខាន់ ហើយលោកបានបន្តថា វាមិនមែនជាប្រធានបទពិភាក្សា ក្នុងកិច្ចប្រជុំរដ្ឋមន្រ្តីការពារជាតិ ដែលនឹងចាប់ផ្តើមនៅថ្ងៃអង្គារ សប្តាហ៍ក្រោយ ក្នុងខេត្តសៀមរាបឡើយ។
លោក ទៀ បាញ់លើកឡើងថា៖ «រដ្ឋមន្រ្តីការពារជាតិអាស៊ាន គ្មានកាតព្វកិច្ច ត្រូវលើកយកបញ្ហានេះមកពិភាក្សាទេ»។
លោក Ng Eng Hen រដ្ឋមន្រ្តីការពារជាតិសិង្ហបុរី បានសម្លឹងមើលរដ្ឋដទៃទៀត ឲ្យទទួលខុសត្រូវជាចម្បង ក្នុងការដោះស្រាយជម្លោះ ដែលលោកហៅថា ជាជម្លោះស្មុគស្មាញ និងត្រូវការភាពអត់ធ្មត់។
លោក Ng Eng Hen បានបញ្ជាក់ថា៖ «កម្ពុជា និងសិង្ហបុរី ជារដ្ឋមិនទាមទារ ហើយខ្ញុំគិតថា ភាគីពាក់ព័ន្ធដទៃទៀត នឹងអាចរុញច្រានជម្លោះនេះទៅមុខបាន»។
ជម្លោះដែនសមុទ្រដ៏យូរអង្វែង ក្នុងចំណោម ចិន កោះតៃវ៉ាន់ និងសមាជិកអាស៊ានដូចជា ព្រុយណេ ម៉ាឡេស៊ី ហ្វីលីពីន និងវៀតណាម មានលក្ខណៈលេចធ្លោ ក្នុងកិច្ចប្រជុំរដ្ឋមន្ត្រីការបរទេសអាស៊ាន កាលពីដើមខែនេះ នៅពេលលោក Albert del Rosario រដ្ឋមន្រ្តីការបរទេសហ្វីលីពីន បានថ្លែងថា ជម្លោះនេះ មិនអាចទទួលយកបានទេ។
ក្នុងសេចក្តីថ្លែងដែលផ្សាយក្នុងអំឡុងកិច្ចប្រជុំ លោកបានជំរុញឲ្យអាស៊ាន ព្រមព្រៀងលើក្រមប្រតិបតិ្ត មុនពេលចរចាជាមួយនឹងចិន។
នៅពេលទាក់ទងតាមទូរស័ព្ទ កាលពីម្សិលមិញ ស្ថានទូតហ្វីលីពីន បានគាំទ្រសេចក្តីថ្លែងរបស់លោក del Rosario ប៉ុន្តែ លោកមិនបានធ្វើអត្ថាធិប្បាយបន្ថែមទៀត អំពីកិច្ចប្រជុំរដ្ឋមន្រ្តីការពារជាតិ នាសប្តាហ៍ក្រោយនេះទេ។
ជំនួបរវាងលោក Ng Eng Hen និងលោក ទៀ បាញ់ គឺជាជំនួបលើកទី ១ របស់អ្នកទាំងពីរ ចាប់តាំងពីលោក Ng Eng Hen បានឡើងកាន់តំណែងនេះ កាលពីឆ្នាំមុន៕
No comments:
Post a Comment
yes