ប្រជាពលរដ្ឋកំពុងនេសាទត្រី នៅតាមដងស្ទឹងអារ៉ែង ក្នុងខេត្តកោះកុង កាលពីថ្ងៃចន្ទ។ រូបថត សហការី
ភ្នំពេញៈ តំណាងរាស្ត្រគណបក្សប្រឆាំង គ្រោងស្នើឲ្យរដ្ឋាភិបាលលុបចោលផែនការស្ថាបនាគម្រោងទំនប់វារី អគ្គិសនីរបស់ក្រុមហ៊ុនចិនមួយនៅតាមដងស្ទឹងអារ៉ែង ក្នុងស្រុកថ្មបាំង ខេត្តកោះកុង ក្រោយពេលបានបញ្ចប់ការស្រាវជ្រាវពាក់ព័ន្ធនឹងពាក្យបណ្តឹងរបស់ សហគមន៍មូលដ្ឋានដែលព្រួយបារម្ភអំពីសកម្មភាពកាប់បំផ្លាញព្រៃឈើខុស ច្បាប់នៅក្នុងតំបន់នោះកាលពីឆ្នាំទៅ។
លោក សុន ឆ័យ អ្នកតំណាងរាស្ត្រមណ្ឌលរាជធានីភ្នំពេញរបស់គណបក្ស សម រង្ស៊ី បានថ្លែងថា ក្រុមលោកដែលមានគ្នា ៥ នាក់បានចុះទៅពិនិត្យមើលតំបន់នៅក្នុងស្រុកថ្មបាំងនោះពីថ្ងៃទី ១៦ ដល់ ១៨ ខែមេសា ដើម្បីស្រាវជ្រាវមើលស្ថានភាពកាប់បំផ្លាញព្រៃឈើខុសច្បាប់ ហើយក៏ដើម្បីវាយតម្លៃពីផលប៉ះពាល់បរិស្ថានទៅលើតំបន់ដែលគ្រោង សាងសង់ទំនប់វារីអគ្គិសនីដែលត្រូវបានប្រគល់ទៅឲ្យក្រុមហ៊ុនថាមពលរបស់រដ្ឋចិនមួយឈ្មោះ Guodian Corporation ដើម្បីធ្វើការសាងសង់ទំនប់វារីអគ្គិសនី និងថា គម្រោងនេះបណ្តាលឲ្យមានផលប៉ះពាល់ទៅលើអ្នកភូមិជាច្រើននៅក្នុង ឃុំចំនួន ៣ ក្នុងស្រុកថ្មបាំងមានជាអាទិ៍ឃុំប្រឡាយ ជំណាប់ និងថ្មដូនពៅ។
លោកថា៖ «ខ្ញុំនឹងបង្ហាញ ឯកសារថា ខ្ញុំបានសម្ភាសអ្នកភូមិដោយបានថតវីដេអូ ដាក់ទៅដល់សមាជិកសភាទាំងអស់ឲ្យបានដឹងអំពីបញ្ហានោះ ដែលប៉ះពាល់ទៅដល់សហគមន៍មូលដ្ឋាន និងស្នើទៅដល់រដ្ឋាភិបាលឲ្យលុបចោលគម្រោងទំនប់វារីអគ្គិសនីនោះ ភ្លាម»។ លោកបានបន្តថា លោកក៏គ្រោងនឹងជួបជាមួយឯកអគ្គរដ្ឋទូតចិន នៅរាជធានីភ្នំពេញ ដើម្បីឲ្យពួកគេដឹងអំពីសំណើរបស់សហគមន៍មូលដ្ឋាន និងបញ្ហារបស់ប្រជាពលរដ្ឋនៅតំបន់នោះ។
លោកបានគូសបញ្ជាក់បន្តថា៖«បើរដ្ឋាភិបាល អភិរក្សតំបន់នោះឲ្យក្លាយជាតំបន់អេកូទេសចរណ៍ប្រសើរជាងផ្តល់ឲ្យ ក្រុមហ៊ុនចិនសាងសង់ទំនប់វារីអគ្គិសនី ដែលទទួលបានកម្លាំងតែ១០០ មេហ្គាវ៉ាត់ ព្រោះកាលពីពេលថ្មីៗនេះ ទេសចរចាប់ផ្តើមចាប់អារម្មណ៍នឹងកន្លែងនោះហើយ»។
លោកបានបន្តទៀតថា ប្រជាជនភាគច្រើនដែលនឹងជួបនូវផលប៉ះពាល់ គឺជនជាតិដើមភាគតិចច្រឹង ដែលមានប្រមាណ ១៥០០នាក់ កំពុងរស់នៅដោយសុខដុមរមនា ជាមួយធម្មជាតិតាមរយៈការធ្វើកសិកម្ម និងនេសាទពីស្ទឹង ហើយពួកគេមានកំហឹង និងមិនឯកភាពដាច់ខាតចំពោះគម្រោងទំនប់វារីអគ្គិសនីដោយរួមទាំងមេភូមិមកពីគណបក្សប្រជាជនកម្ពុជាផងដែរ ប៉ុន្តែពួកគេពុំមានបំណងតវ៉ាជាសាធារណៈទេ ដោយបារម្ភខ្លាចប្រឈមមុខនឹងការប្រើកម្លាំងបាយពីសំណាក់អាជ្ញាធរ។
លោក សុន ឆ័យ បានបន្តទៀតថា៖«ក្នុងពេលយើងចុះទៅពិនិត្យ យើងបានរកឃើញថា ការកាប់បំផ្លាញព្រៃឈើនៅតែបន្តមាន ហើយឈើប្រណីតត្រូវបានលក់ទៅឲ្យឈ្មួញ ដែលពាក់ព័ន្ធនឹងមន្ត្រីយោធា និងមន្ត្រីព្រៃឈើមូលដ្ឋាន»។ លោកបានបន្ថែមថា វាគួរឲ្យភ្ញាក់ផ្អើល ដែលសត្វកម្រមួយចំនួន និងត្រីនៅមាន ដូចជា ដំរី ក្រពើ ខ្លាដំបង ខ្លា សត្វផ្សោត និងប្រភេទសត្វ និងត្រីរាប់រយទៀត ដូចជា ត្រីនាគ ជាដើម។ វាជាតំបន់មួយក្នុងចំណោមតំបន់ដែលសម្បូរជីវចម្រុះបំផុតក្នុង អាស៊ី។
យ៉ាងណាក៏ដោយ លោក ជាម យៀប តំណាងរាស្រ្តគណបក្សប្រជាជនកម្ពុជាបានថ្លែងថា លោកអរគុណលោក ស៊ុន ឆ័យ ដែលបានចុះទៅស្រាវជ្រាវនៅតំបន់នោះ ប៉ុន្តែមុនពេលរដ្ឋាភិបាល ផ្តល់សិទ្ធិទៅឲ្យក្រុមហ៊ុន ពួកគេបានធ្វើការស្រាវជ្រាវច្បាស់លាស់រួចហើយ។ លោកបន្តថា៖ «អ្វីដែលរដ្ឋាភិបាលបានផ្តល់ទៅឲ្យក្រុមហ៊ុន មិនអាចដកវិញទេ ប៉ុន្តែរដ្ឋាភិបាលនឹងពិនិត្យទៅលើរបាយការណ៍ផ្ទាល់ខ្លួននោះ។ មិនមែនតែលោក ស៊ុន ឆ័យ ទេ ដែលស្រឡាញ់ជាតិ យើងទាំងអស់គ្នាក៏ស្រឡាញ់ជាតិដែរ ដូច្នេះយើងនឹងឈ្នះឆ្នោត»។
លោកបន្ថែមថា មូលហេតុដែលក្រុមហ៊ុនចិន មកធ្វើការអភិវឌ្ឍលើទំនប់វារីអគ្គិសនី ជាច្រើនកន្លែងក្នុងប្រទេសកម្ពុជា គឺដោយសារក្រុមហ៊ុនដទៃមិនចង់វិនិយោគលើគម្រោងនោះ ពីព្រោះវាទទួលបានប្រាក់ចំណេញតិច និងត្រូវការពេលវេលាយូរ។
លោក ស៊ុយ សែម រដ្ឋមន្រ្តី ក្រសួងឧស្សាហកម្ម រ៉ែ និងថាមពល មិនអាចទាក់ទងសុំការធ្វើអត្ថាធិប្បាយបានទេ កាលពីថ្ងៃព្រហស្បតិ៍ម្សិលមិញ។
លោក ឯក ថា អ្នកនាំពាក្យម្នាក់នៅអង្គភាពព័ត៌មាននិងប្រតិកម្មរហ័សនៃ ទីស្តីការគណៈរដ្ឋមន្រ្តី បានបដិសេធមិនធ្វើអត្ថាធិប្បាយលើបញ្ហានេះទេ។ ចំណែកលោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី មិនអាចទាក់ទងសុំការធ្វើអត្ថាធិប្បាយបានទេកាលពីម្សិលមិញ៕
ភ្នំពេញបុស្តិ៏
No comments:
Post a Comment
yes