ទិដ្ឋភាពប្រជាពលរដ្ឋដែលមកតវ៉ា
ខេត្តតាកែវ ៖ កាលពីថ្ងៃទី១១ កក្កដា បន្ទាប់ពីទទួលបានលិខិតលេខ៧៦២ខន/១២ ចុះថ្ងៃទី២៦ មិថុនា ឆ្នាំ២០១២ ដែលចុះហត្ថលេខាដោយលោកហូ សិទ្ធី នាយកខុទ្ធកាល័យសម្តេចតេជោហ៊ុន សែន ប្រមុខរាជរដ្ឋាភិបាលកម្ពុជាត្រូវបានអ្នកភូមិជាច្រើននាក់នាំគ្នាមកជួបលោកស្រី បេន អភិបាលខេត្តជួយអន្តរាគមន៍ដើម្បីឱ្យប្រជាពលរដ្ឋ២១៥គ្រួសារបានកាន់កាប់ដីទំហំ២៤ហិកតាស្ថិតក្នុងភូមិត្រពាំងត្រាវ ឃុំពត់សរ ស្រុកបាទី ។
ប្រជាពលរដ្ឋឈ្មោះស្រី ពៅ ភេទស្រី អាយុ៤៦ឆ្នាំ រស់នៅភូមិត្រពាំងត្រាវ ឃុំពត់សរ ស្រុកបាទីបានរៀបរាប់ប្រាប់កោះសន្តិភាពថា ពួកគាត់មកកាន់សាលាខេត្តនេះ ដើម្បីឱ្យលោកអភិបាលខេត្តជួយដោះស្រាយរឿងដីស្រែដែលត្រូវមេឃុំពត់សរ រំលោភយកហើយពួកគាត់ប្រមាណជា៧០នាក់ តំណាងឱ្យប្រជាពលរដ្ឋក្នុងភូមិចំនួន២១៥គ្រួសារបានលើកគ្នាទៅដល់ភូមិគ្រឹះសម្តេចតេជោ ហ៊ុន សែន ឱ្យជួយអន្តរាគមន៍ពីរឿងអាជ្ញាធររំលោភយកដីរបស់ពួកគាត់ដែលបានកាន់កាប់ធ្វើស្រែតាំងពីឆ្នាំ១៩៧៩ មក ហើយនាយកខុទ្ធកាល័យសម្តេចតេជោចេញលិខិតឱ្យលោកអភិបាលខេត្តជួយអន្តរាគមន៍។
ប្រជាពលរដ្ឋបានបន្តថា នៅក្រោយឆ្នាំ១៩៧៩ អាជ្ញាធរបានបែងចែកផ្ទៃដីទំហំ២៤ ហិកតានោះមកឱ្យប្រជាពលរដ្ឋចំនួន២១៥ គ្រួសារដោយក្នុង១គ្រួសារទទួលបានដីទំហំ១២អាពួកគាត់ធ្វើស្រែជាធម្មតា លុះមកដល់ឆ្នាំ១៩៨៦លោកសុខ សេង អតីតអភិបាលស្រុកបាទីបានខ្ចីផ្ទៃដីទាំងអស់នោះធ្វើជាកន្លែងពិសោធន៍ កសិកម្ម ដល់ឆ្នាំ១៩៨៩ លោកចៅហ្វាយស្រុកបានប្រគល់ទៅឱ្យប្រជាពលរដ្ឋទាំង២១៥គ្រួសារនោះធ្វើស្រែវិញ។ រហូតមកដល់ឆ្នាំ២០១១ ស្រាប់តែលោកសុខ សេង ហៅឈើយ មេឃុំពត់សរ បច្ចុប្បន្នរំលោកយកដោយមានទាំងកម្លាំងប្រដាប់អាវុធមករារាំងមិនឱ្យប្រជាពលរដ្ឋធ្វើស្រែ។ លុះមានការតវ៉ាត្រូវសមត្ថកិច្ចចាប់ខ្លួនប្រជាពលរដ្ឋចំនួន៣នាក់ទៅដាក់ពន្ធនាគារ ហើយ៤២នាក់ទៀតបានរត់គេចខ្លួនរហូតដល់បច្ចុប្បន្ននេះអត់ហ៊ានចូលស្រុកវិញទេ ។
ប្រជាពលរដ្ឋទាំងអស់បានបញ្ជាក់ថា នៅពេលនេះពួកគាត់មានទាំងលិខិតនាយកខុទ្ធកាល័យសម្តេចតេជោ ហ៊ុន សែន មកបង្ហាញដើម្បីឱ្យលោកអភិបាលខេត្តជួយដោះស្រាយករណីនេះ ។ ទោះបីជាបែបណាការព្យាយាមដើម្បីបានជួបលោកអភិបាលខេត្តមិនបានទទួលជោគជ័យទេ ដោយសារលោករវល់ ។
លោកឡាយ សុខា អភិបាលស្រុកបាទីបានប្រាប់កោះសន្តិភាពតាមទូរស័ព្ទថា នេះជារឿងតុលាការកំពូលបានកាត់ក្តីឱ្យភាគីម្ខាងទៀតឈ្នះ ទោះបីពួកគាត់ខំជេរប្តឹងដល់ណាក៏ប្តឹងទៅ ព្រោះជាសិទ្ធិរបស់ពួកគាត់ទេ ។ ក្នុងលិខិតរបស់លោកនាយកខុទ្ទកាល័យចុះថ្ងៃទី២៦ មិថុនា គ្រាន់តែជាលិខិតបញ្ជូនទៅលោកអភិបាលខេត្តមេត្តាពិនិត្យនិងសុំជួយអន្តរាគមន៍លើករណីនេះ ៕
No comments:
Post a Comment
yes