ភ្នំពេញ ៖ កាលពីវេលាម៉ោង៩និង១០នាទីព្រឹកថ្ងៃទី២៨ ខែសីហា ឆ្នាំ២០១២ សមត្ថកិច្ចនគរបាលមន្ទីរប្រឆាំងគ្រឿងញៀនក្រសួងមហាផ្ទៃ បានបញ្ជូនខ្លួនឧត្ដមសេនីយ៍ទោ ចាន់ ឫទ្ធីឌី និងបក្ខពួក៣នាក់មកកាន់សាលាដំបូងរាជធានីភ្នំពេញ ដើម្បីបន្ដនីតិវិធីបញ្ជូនសំណុំរឿងទៅកាន់ព្រះរាជអាជ្ញារង លោក គឺ ប៊ុណ្ណារ៉ា ដើម្បីសម្រេចចោទប្រកាន់ទៅ លើជនសង្ស័យទាំងនោះ ។
តាមប្រភពព័ត៌មានពីមន្ដ្រីសាលាដំបូងបានឱ្យដឹងថា ក្នុងករណីខាងលើនេះ មានមេធាវីជាច្រើនរូបបានមកជួយ រត់ការដើម្បីឱ្យជនពាក់ព័ន្ធខាងលើបាន នៅក្រៅឃុំបណ្ដោះអាសន្ន ។
តាមប្រភពដដែលបានបន្ដថា ចំពោះករណីខាងលើនេះ មើលទៅប្រហែលជាមិនអាចឱ្យមេធាវីរត់ការបានសម្រេចនោះទេ ព្រោះការជួញដូរថ្នាំញៀននេះ មានទ្រង់ទ្រាយធំ ប៉ុន្ដែបើសិនជាសម្របសម្រួលចម្លើយរបស់ជនសង្ស័យនោះប្រហែលជាអាចទៅរួច ។
ជនសង្ស័យដែលបានបញ្ជូនទៅកាន់សាលាដំបូងមានឈ្មោះ ១-ចាន់ ឫទ្ធីឌី ឧត្ដមសេនីយ៍ទោ(ផ្កាយ២) មានតួនាទី ជានាយរងសេនាធិការកងទ័ពជើងគោក នៃកងយោធពលខេមរភូមិន្ទ, ២-ឌៀប ស៊ុយ ឡាយ ភេទប្រុស អាយុ៥១ឆ្នាំ និង ប្រពន្ធឈ្មោះ ញ៉ែម សុខា និងម្នាក់ទៀត ដែលជាអ្នកបើកបររថយន្ដឱ្យលោកផ្កាយ២ ឈ្មោះ លៀម ឈុនរី ភេទប្រុស អាយុ២៦ឆ្នាំ ស្នាក់នៅផ្ទះអត់លេខជិត ផ្សារបឹងព្រលិត សង្កាត់ព្រែកប្រា ខណ្ឌ មានជ័យ ។
ដើមហេតុដែលនាំឱ្យមានការឃាត់ខ្លួននេះ គឺនៅថ្ងៃទី២៤ ខែសីហា ឆ្នាំ២០១២ កម្លាំងសមត្ថកិច្ចចម្រុះនិងកម្លាំងមន្ទីរប្រឆាំងគ្រឿងញៀនក្រសួងមហាផ្ទៃ ដឹកនាំដោយលោក គឺ ប៊ុណ្ណារ៉ា ព្រះរាជអាជ្ញារងសាលាដំបូងរាជធានី បានចុះឆែកឆេរភូមិគ្រឹះមួយកន្លែងឋិតនៅផ្ទះលេខ៤៤ ផ្លូវលំ ភូមិអូរអណ្ដូង១ សង្កាត់ព្រែកប្រា ខណ្ឌមានជ័យ ដែលជាភូមិគ្រឹះលោក ចាន់ ឫទ្ធីឌី ហើយការឆែកឆេរនោះសមត្ថ កិច្ចរកឃើញថ្នាំញៀនប្រភេទយ៉ាម៉ា ប្រមាណជិត៤០.០០០គ្រាប់ ស្មើនឹង២០សុង ។
ឈ្មោះ ចាន់ ឫទ្ធីឌី ដែលសមត្ថកិច្ច ឃាត់ខ្លួនពាក់ព័ន្ធនឹងការជួញដូរថ្នាំញៀន ទ្រង់ទ្រាយធំនេះមានតួនាទីជានាយរង សេនាធិការកងទ័ពជើងគោកនៃកង យោធពលខេមរភូមិន្ទ និងជាថៅកែភោជនីយដ្ឋាននិងខារ៉ាអូខេរស្មីបឹងកេងកង បានស្ដុកទុកថ្នាំញៀននៅក្នុងភូមិគ្រឹះរបស់ខ្លួន ដែលគេរកឃើញថា ថ្នាំញៀនទាំងនេះ នាំចូលពីប្រទេសឡាវសម្រាប់ចែកចាយនៅក្នុងប្រទេស និងនាំចេញទៅក្រៅប្រទេស ។
គួរបញ្ជាក់ថា ក្រោយឃាត់ខ្លួននិង សាកសួររួចមក អតីតឧត្ដមសេនីយ៍ទោ ចាន់ ឫទ្ធីឌី បានសារភាពថា ខ្លួននៅមានបក្ខពួកផ្សេងទៀត ហេតុនេះហើយទើប នៅថ្ងៃទី២៦ខែសីហាឆ្នាំ២០១២ លោក សាន សុធី នាយការិយាល័យមន្ទីរប្រឆាំងគ្រឿងញៀនក្រសួងមហាផ្ទៃដឹកនាំកម្លាំង ចម្រុះនាំខ្លួនលោកផ្កាយ២ ចាន់ ឫទ្ធីឌី ទៅ ចង្អុលបង្ហាញដល់លំនៅឋានបក្ខពួកដែល ឋិតនៅភូមិត្រញំងល្វា សង្កាត់កាកាប ខណ្ឌពោធិ៍សែនជ័យ ។
ការចុះឆែកឆេរនេះធ្វើឡើងនៅវេលា ម៉ោង៤និង១០នាទី ដោយបានឃាត់ខ្លួន ឈ្មោះ ឌៀប ស៊ុយឡាយ និងឈ្មោះ ញ៉ែម សុខា មុខរបរសំអាងការរតនាពេជ្រ ដោយសមត្ថកិច្ចបានរកឃើញថ្នាំញៀនប្រភេទយ៉ាម៉ាទម្ងន់៣.៧១៩,៥ក្រាម និងប្រភេទ ម៉ាទឹកកក៩៨៩,៩ក្រាម ព្រមទាំងដកហូត រថយន្ដបាឡែន១គ្រឿង ពណ៌ទឹកប្រាក់ និង ជញ្ជីងសម្រាប់ថ្លឹងថ្នាំញៀន១គ្រឿងផងដែរ។
ឈ្មោះ ឌៀប ស៊ុយឡាយ បានសារភាពឱ្យដឹងថា ថ្នាំញៀនទាំងនេះរូបគេទិញមកពីប្រទេសឡាវ ដោយក្នុង១គីឡូក្រាមមាន តម្លៃ៣២.០០០ដុល្លារ ហើយយកទៅលក់ឱ្យឈ្មោះ ចាន់ ឫទ្ធីឌី ១គីឡូក្រាម៣៥.០០០ ដុល្លារ ហើយឈ្មោះ ចាន់ ឫទ្ធីឌី លក់ចេញទៅឱ្យអ្នកផ្សេងទៀតក្នុង១គីឡូក្រាមតម្លៃ ៤២.០០០ដុល្លារ ។ បច្ចុប្បន្ន សំណុំរឿងខាងលើកំពុងស្ថិត នៅក្រោមការវិនិច្ឆ័យរបស់លោក គឺ ប៊ុណ្ណារ៉ា ដើម្បីចាត់នីតិវិធីចោទប្រកាន់ ៕
No comments:
Post a Comment
yes