លោក មឿង សុន ប្រធានអង្គការមូលនិធិទ្រទ្រង់អរិយធម៌
ប្រធានអង្គការមូលនិធិទ្រទ្រង់អរិយធម៌ខ្មែរ លោក មឿង សុន ដែលត្រូវតុលាការកំពូលកាត់ទោសឲ្យជាប់ពន្ធនាគារ ២ឆ្នាំ កាលពីខែឧសភា ក្នុងសំណុំរឿងញុះញង់ បានថ្វាយលិខិតទៅព្រះមហាក្សត្រ សូមព្រះរាជទានការលើកលែងទោស ដើម្បីបានចូលគោរពព្រះវិញ្ញាណក្ខន្ធ ព្រះមហាវីរក្សត្រ។
លោក មឿង សុន មានប្រសាសន៍ថា លោកជាអ្នកស្រឡាញ់វប្បធម៌ និងមានបំណងចង់បម្រើជាតិ ដូចនេះលោកសង្ឃឹមថា ព្រះមហាក្សត្រនឹងរាជានុញ្ញាតលើកលែងទោស។ លោកបន្តថា បើសិនលោកបានចូលស្រុកវិញ លោកនឹងទៅគោរពព្រះវិញ្ញាណក្ខន្ធ ព្រះបាទសម្ដេចព្រះ នរោត្តម សីហនុ ហើយថែមទាំងបំពេញព្រះរាជបំណងអតីតព្រះមហាក្សត្រទៀតផង។
លោក មឿង សុន៖ «ខ្ញុំសម្ដែងការសោកស្ដាយចំពោះការបាត់បង់ព្រះមហាវីរក្សត្រ ចំណុចមួយទៀត គឺខ្ញុំបានចូលគាល់អតីតព្រះមហាវីរក្សត្រ តាំងពី ៤ឆ្នាំមុន ព្រះអង្គបានប្រទានព្រះរាជទ្រព្យចំនួនជាង ៣ពាន់ដុល្លារ សម្រាប់សង់មន្ទីរពេទ្យជូនពលរដ្ឋនៅជិតប្រាសាទព្រះវិហារ ដើម្បីទុកជាកេរដំណែលរំលឹកដល់ស្នាព្រះហស្ដរបស់ព្រះអង្គ»។
លោក មឿង សុន បន្តថា ក៏បានដាក់លិខិតជូនទៅលោកនាយករដ្ឋមន្ត្រី ហ៊ុន សែន ដែរ ប៉ុន្តែខុទ្ទកាល័យនាយករដ្ឋមន្ត្រី បែរជាមិនទទួលសំណើទៅវិញ។
វិទ្យុអាស៊ីសេរី មិនអាចទាក់ទងមន្ត្រីរដ្ឋាភិបាល ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី២៩ តុលា។ ប៉ុន្តែកន្លងទៅ មន្ត្រីរដ្ឋាភិបាលលើកឡើងថា រដ្ឋាភិបាលមិនមានសិទ្ធិលូកដៃក្នុងកិច្ចការរបស់តុលាការឡើយ។ អតីតលេខាផ្ទាល់ព្រះមហាវីរក្សត្រ ព្រះអង្គម្ចាស់ ស៊ីសុវត្ថិ ធម្មិកោ ក៏ធ្លាប់មានបន្ទូលថា រដ្ឋាភិបាលគួរតែពិចារណាលើកលែងទោសដល់អ្នកទោសនយោបាយ។
ទោះជាយ៉ាងណាក្តី អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា រដ្ឋាភិបាលអាចពិចារណាថ្វាយសំណើទៅព្រះមហាក្សត្រ ដើម្បីលើកលែងទោសជាទូទៅឲ្យអ្នកទោសណាដែលមិនបានបង្កកំហុសធ្ងន់ធ្ងរ ដើម្បីឧទ្ទិសកុសលថ្វាយព្រះមហាវីរក្សត្រ។ លោកបន្តថា បើសិនជាសម្រេចលើកលែងទោសឲ្យបុគ្គលម្នាក់ៗ គឺមិនអាចធ្វើទៅរួចបានឡើយ។
លោកបណ្ឌិត ឡៅ ម៉ុងហៃ៖ «ដូចជាទោសបរិហារកេរ្តិ៍ ញុះញង់ដែរ តែមិនបានសម្រេច និងមិនមានប៉ះពាល់អីដល់អ្នកណា។ គ្មានអ្នករងគ្រោះលើកលែងទោស គ្មានអ្នកតវ៉ាទេ ដូចនេះអ្នកមានទោសបែបហ្នឹង គួរផ្តល់អាទិភាពក្នុងព្រះរាជពិធីបុណ្យព្រះបរមសព ព្រះមហាវីរក្សត្រ យើងហ្នឹង»។
លោក មឿង សុន រត់គេចខ្លួនទៅក្រៅប្រទេស បន្ទាប់ពីអាជ្ញាធរអប្សរាដែលស្ថិតក្រោមការគ្រប់គ្រងរបស់លោក សុខ អាន ប្ដឹងពីបទញុះញង់ ខណៈពេលដែលលោករារាំងការបំពាក់អំពូលភ្លើងនៅអង្គរវត្ត។ សេចក្តីសម្រេចរបស់អង្គការយូណេស្កូ (UNESCO) ឆ្នាំ២០០៩ ហាមមិនឲ្យអាជ្ញាធរអប្សរា និងក្រុមហ៊ុនដៃគូ ដាក់អំពូលនៅប្រាសាទអង្គរវត្ត ព្រោះការដាក់អំពូលភ្លើងនឹងធ្វើឲ្យខូចសោភ័ណភាពប្រាសាទ ប៉ុន្តែលោក មឿង សុន នៅតែត្រូវបានតុលាការផ្ដន្ទាទោសឲ្យជាប់គុក ២ឆ្នាំដដែល៕
No comments:
Post a Comment
yes