អ្នកស្រីទេព កុលាប និងស្វាមីលោក ហេង ឈាងនៅសាលាឧទ្ធរណ៍កាលពីកន្លងទៅ
ភ្នំពេញៈ លោកឧត្តមសេនីយ៍ ចៅ តុល មេបញ្ជាការរងកងអង្គរក្សលោកនាយករដ្ឋមន្រ្តី បានអះ-អាងថា លោកជំទាវ ប៊ុនរ៉ានីហ៊ុនសែន បានស្នើឲ្យមានការសម្របសម្រួលគ្នារវាងលោកឧកញ៉ា កុក អាន និងលោកស្រី ទេព កុលាប និងស្វាមីលោក ហេង ឈាងដើម្បីបញ្ចប់រឿងក្តីនៅតុលាការ ដោយមានគម្រោងរៀបចំធ្វើនៅភូមិគ្រឹះលោកនាយករដ្ឋមន្ត្រី នៅក្នុងរាជធានី នាពេលឆាប់ៗនេះ។
លោកឧត្តមសេនីយ៍ឯក ចៅ តុល បានប្រាប់ភ្នំពេញ ប៉ុស្តិ៍ថា ៖«ពួកគាត់គឺសុទ្ធជាបងប្អូននិងជាសាច់ញាតិនឹងគ្នា។ ដូច្នេះពួកគាត់ គួរតែសម្រុះសម្រួល ផ្សះផ្សាគ្នា ដើម្បីបញ្ចប់ជម្លោះ»។
លោកឧត្តមសេនីយ៍ ចៅ តុល បានបញ្ជាក់ថា ការសម្រុះសម្រួលបញ្ចប់ជម្លោះរវាងលោកឧកញ៉ា កុក អាន និងភាគីលោកស្រី ទេព កុលាប«ឥឡូវនេះខ្ញុំផ្ទាល់ កំពុងតែរៀបចំកិច្ចប្រជុំមួយសម្រាប់ពួកគាត់ ដែលគ្រោងនឹងប្រព្រឹត្តទៅឆាប់ៗនេះ នៅភូមិគ្រឹះសម្តេចតេជោ នៅរាជធានីភ្នំពេញ។ កិច្ចប្រជុំនឹងធ្វើឡើងក្រោមអធិបតីភាពរបស់សម្តេចនាយករដ្ឋមន្រ្តី និងលោកជំទាវ»។
លោកស្រី ទេព កុលាប សាកលវិទ្យាធិការសាកលវិទ្យាល័យភ្នំពេញអន្តរជាតិ(PPIU) បានទទួលស្វាគមន៍ ចំពោះគំនិតផ្តួចផ្តើមនេះដោយមានប្រសាសន៍ថា៖ «ការបញ្ចប់រឿងដោយសន្តិភាព គឺជារឿងល្អ» ហើយថា ភាគីលោកស្រីស្ម័គ្រចិត្តទទួលយក និងត្រៀមខ្លួនចូលរួម ប្រសិនបើមានការអញ្ជើញពីលោកឧត្តមសេនីយ៍ឯក ចៅ តុល ។ ក៏ប៉ុន្តែ លោកស្រី ទេព កុលាប បានសំណូមពរត្រូវតែជូនដំណឹង ទៅស្វាមីគាត់ លោក ហេង ឈាង ផង ដើម្បីគាត់បានដឹងនិងបានត្រៀមខ្លួនចូលរួមក្នុងកិច្ចសម្រប សម្រួលនោះ។
លោកស្រី ទេព កុលាប មានប្រសាសន៍ថា ៖ «ខ្ញុំគិតថា ការបញ្ចប់រឿង ដោយសន្តិភាពនោះ គឺជារឿងល្អ។ ខ្ញុំព្រមទទួលយក ពីព្រោះអ្វី ដែលយើងអាចសម្រុះសម្រួលគ្នាបាននោះ គឺការល្អណាស់។ សម្រាប់ខ្ញុំគឺ ខ្ញុំត្រូវការពេលវេលាសេសសល់ក្នុងជីវិតចុងក្រោយរបស់ខ្ញុំនេះ ដើម្បីសាកលវិទ្យាល័យរបស់ខ្ញុំ និង សម្រាប់យុវជនខ្មែរជំនាន់ក្រោយទៀត។ ខ្ញុំឥតមានពេលទៅឡើងក្តី ឡើងតុលាការវែងឆ្ងាយអីទៀតទេ»។
លោកស្រី ទេព កុលាប បានបន្តថា៖ ចំពោះរឿងលើកមុនថា ខ្ញុំសងសឹកបីជាតិនោះ ខ្ញុំសូមបញ្ជាក់ថា ជីវិតរបស់ខ្ញុំកើតមានមកនេះ គឺមានតែអំពើល្អនៅក្នុងអារម្មណ៍របស់ខ្ញុំ នៅក្នុងបេះដូងរបស់ខ្ញុំរហូត មិនដែលមានបំណងអ្វីផ្សេ ងពីនោះទេ។ កាលពីក្នុងសវនាការនៅតុលាការកំពូល ខ្ញុំឃើញមានការគាំទ្រខ្ញុំយ៉ាងខ្លាំង ពីសំណាក់សាស្ត្រាចារ្យ និងនិស្សិតរបស់ខ្ញុំ អ៊ីចឹង ខ្ញុំគិតថាជីវិតចុងក្រោយរបស់ខ្ញុំ គឺ សម្រាប់តែសាស្រ្តាចារ្យនិង និស្សិត លោកឪពុកអ្នកម្តាយ និងសម្តេចតេជោហ៊ុន សែននិងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជាអ្នកមានគុណរបស់ខ្ញុំ ដែលលោកជួយសង្គ្រោះជីវិតខ្ញុំចុងក្រោយ សម្រាប់ជីវិតខ្ញុំនេះ។ ពីព្រោះនៅពេល ដែលគេដេញតាមបាញ់សម្លាប់ខ្ញុំ បើពុំមានការជួយអន្តរាគមន៍ពីសម្តេច និងលោកជំទាវ និងពីកងអង្គរក្សរបស់លោកផងទេ ខ្ញុំនឹងមិនមានជីវិតរស់រានដល់ថ្ងៃនេះឡើយ»។
លោកឧកញ៉ា កុក អាន ប្រធានក្រុមហ៊ុនអានកូ មិនអាចទាក់ទងសុំការអធិប្បាយបានទេកាលពីថ្ងៃម្សិលមិញ។ ប៉ុន្តែ យ៉ាងណាក៏ដោយ មេធាវីការពារក្ដីគឺលោក ឡុង ដារ៉ា បានមានប្រសាសន៍ថា លោកមិនទាន់ដឹងពីគម្រោងជួបសម្របសម្រួលនោះនៅឡើយទេ។
លោកមេធាវីប្រាប់ថា៖«រហូតមកដល់ពេលនេះ ខ្ញុំមិនទាន់ដឹងពីគម្រោងប្រជុំនោះនៅឡើយទេ។ ខ្ញុំនឹងសួរ កូនក្ដីខ្ញុំ ពីរឿងនេះ»។
លោកស្រី ទេព កុលាប អាយុ៣៨ឆ្នាំ និងស្វាមីលោក ហេង ឈាង អាយុ៤៣ឆ្នាំ អតីតអគ្គនាយកក្រុមហ៊ុនអានកូ ត្រូវតុលាការកាត់ទោសឲ្យជាប់ពន្ធនាគារបីឆ្នាំម្នាក់ ក្រោមបទចោទពីបទរំលោភលើសេចក្ដីទុកចិត្តកាលពីឆ្នាំ២០១១ ក្រោមបណ្តឹងរបស់លោកឧកញ៉ា កុក អាន ពាក់ព័ន្ធនឹងការបាត់ប្រាក់ក្រុមហ៊ុន ចំនួន៥៨.៩៧៣.២៦៥,២៨ដុល្លារ។
លោកស្រី ទេព កុលាប ត្រូវតុលាការកំពូលសម្រេចដោះលែងពីពន្ធនាគារកាលពីថ្ងៃទី២ ខែតុលា ឆ្នាំ ២០១២។ ប៉ុន្តែ លោក ហេង ឈាង កំពុងស្ថិតនៅក្នុងពន្ធនាគារព្រៃសនៅឡើយទេ ដើម្បីរង់ចាំការជម្រះក្ដីសាជាថ្មីក្នុងពេលខាងមុខនេះ៕
No comments:
Post a Comment
yes