អ្នកភូមិចំនួន ៣ភូមិនៃសង្កាត់ខ្មួញ អំពាវនាវសុំឲ្យអាជ្ញាធរជួយពន្លឿនការតទុយយោទឹក ដើម្បីចែកចាយទឹកដល់តំបន់រស់នៅរបស់ពួកគាត់។ អ្នកភូមិទាំងនោះ អះអាងថា ជីវភាពប្រចាំថ្ងៃរបស់ពួកគាត់បានជួបប្រទះនឹងការលំបាកក្នុងការទិញទឹកយកមកប្រើប្រាស់ ហើយនាំគ្នាប្រើទឹកស្រះ ឬត្រពាំងកខ្វក់។
អ្នកភូមិឈ្មោះ សូ សុគង់ ដែលរស់នៅភូមិខ្មួញ ឲ្យដឹងនៅថ្ងៃទី៣០ តុលា ថា អ្នកភូមិទាំងបីនោះភាគច្រើនពួកគាត់មិនមានលទ្ធភាពគ្រប់គ្រាន់ក្នុងការទិញទឹកប្រើប្រាស់នោះទេ។ លោកថ្លែងបន្តថា អ្នកភូមិចំនួន៣ គឺភូមិខ្មួញ ភូមិបន្លាស្អិត និងអន្លង់ក្ងាន សម្ដែងការងឿងឆ្ងល់ថា ហេតុអ្វីអាជ្ញាធរមិនព្រមតទុយយោទឹកឲ្យពួកគាត់ ព្រោះភូមិផ្សេងដែលនៅក្បែរភូមិទាំងបីនេះ សុទ្ធតែត្រូវអាជ្ញាធរតទុយយោឲ្យរួចរាល់អស់ហើយ។
លោក សុខ គង់ អះអាងបន្តថា បើទោះរដូវវស្សាមានភ្លៀងធ្លាក់ក៏ដោយ ក៏អ្នកភូមិនៅតែជួបប្រទះនឹងការខ្វះខាតទឹកស្អាតសម្រាប់ប្រើប្រាស់ដែរ។ លោកបន្ថែមថា នៅរដូវប្រាំង បញ្ហាខ្វះខាតទឹកកាន់តែជួបការលំបាកជាងរដូវវស្សាទៅទៀត ដូច្នេះពួកគេបូមទឹកស្រះ ដែលនៅសេសសល់ពីការចាក់ដីលុបរបស់ក្រុមហ៊ុនអភិវឌ្ឍន៍ យកទៅប្រើប្រាស់។
ឆ្លើយតបនឹងការលើកឡើងនេះ ចៅសង្កាត់ខ្មួញ លោក សួង ម៉ុក មានប្រសាសន៍ថា តាមពិតអ្នកភូមិទាំងនោះជួបបញ្ហាកង្វះទឹកស្អាតប្រើប្រាស់ពិតប្រាកដមែន តែបញ្ហានេះ ហាក់ពុំសូវធ្ងន់ធ្ងរប៉ុន្មាននោះទេ ព្រោះខាងរដ្ឋាករទឹកបានតទុយយោដល់ភូមិក្បែរនោះរួចរាល់ហើយ ដូច្នេះពួកគាត់អាចរកទិញទឹកនោះទៅប្រើប្រាស់បាន។
ម្យ៉ាងទៀត លោកបញ្ជាក់ថា អាជ្ញាធរមូលដ្ឋានបានខិតខំប្រឹងប្រែងយកសំណើទៅដាក់នៅសាលាក្រុងភ្នំពេញ ដើម្បីឲ្យជួយនាំយកសំណើនោះទៅឲ្យខាងរដ្ឋាករទឹក។ លោកថ្លែងបន្តថា ប្រហែលនៅដើមឆ្នាំ២០១៣ រដ្ឋាករទឹកគេតទុយយោទឹកដល់តំបន់ទាំងនោះ។ លោក សួង ម៉ុក មានឲ្យដឹងថា អ្នកភូមិដែលខ្វះខាតទឹកស្អាតប្រើនោះមានចំនួនប្រមាណជាង ១ពាន់នាក់៕
No comments:
Post a Comment
yes