សៀមរាប ៖ នៅតាមផ្លូវចុងកៅស៊ូ និងផ្លូវជន្លង់មានសិប្បកម្មជាច្រើនកន្លែងកំពុងតែធ្វើអាជីវកម្ម កែច្នៃគ្រឿងសង្ហារឹមខ្នាតធំលក់រាយ និងលក់ដុំដូចជា តុ ទូ កៅអី គ្រែ សាឡុងដែលសុទ្ធសឹងតែ ជាឈើប្រណីតមានតម្លៃមានដូចជា ឈើបេង ធ្នង់ នាងនួន ជាពិសេសឈើគ្រញូងដាក់លក់បង្ហាញ ដូចតាំងពិព័រណ៍នៅកណ្តាលក្រុងសៀមរាប ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប។
ឈើទាំងអស់នេះត្រូវបានគេបង្ហើបអោយដឹងថា ត្រូវបានគេដឹកជញ្ជូនទាំងយប់ទាំងថ្ងៃចេញពី ស្រុកអន្លង់វែង ត្រពាំងប្រាសាទ ស្រុកវ៉ារិន ស្រែណូយ អូរក្រូច អូរអាកុក ស្វាយលើ តាមរថយន្តស៊េរី ទំនើបៗ ដែលសុទ្ធសឹងតែឈ្មួញមានអំណាចដឹកជញ្ជូនឈើខុសច្បាប់ជាច្រើនម៉ែត្រគូបរាប់មិនអស់ យកមកទីរួមខេត្តសៀមរាប ដើម្បីចែកចាយតាមសិប្បកម្មនានានៅចុងកៅស៊ូ និងដេប៉ូជាច្រើននៅផ្លូវ ជន្លង់ជាពិសេសដេប៉ូ ជា សុភី ដែលជាដេប៉ូធំជាងគេបំផុត ហើយបានត្រូវដាក់ស្តុកឈើជាច្រើនកន្លែងនៅក្នុងក្រុងសៀមរាបដែលគេស្គាល់ថា ជាដេប៉ូមានអំណាចទិញតែឈើខុសច្បាប់ដោយចំហររាល់ថ្ងៃតែម្តង។
ចំណែកឯមន្ត្រីជំនាញរដ្ឋបាលព្រៃឈើលោក ទ្រី ឡយ និងលោក យឹម ស៊ីវន ឬក៏អាជ្ញាធរមាន សមត្ថកិច្ចក្រុងសៀមរាបត្រូវបានគេសង្ស័យថា កំពុងតែសម្ងំទទួលផលប្រយោជន៍និងលាភសក្ការៈពី សិប្បកម្មនិងដេប៉ូទាំងនោះយ៉ាងផ្អែមត្រជាក់ផងដែរ។ តាមប្រភពព័ត៌មានពីសមត្ថកិច្ចក្រុង សៀមរាបមួយរូបដែលសុំមិនបញ្ចេញឈ្មោះបានអោយដឹងថា រថយន្តជាច្រើនគ្រឿងស៊េរីទំនើបដូចជាកាមរីឆ្លាម បាឡែន ឡង់គ្រីស័រ តាកូម៉ា ត្រូវបានគេដឹកឈើប្រណីតជាប្រភេទឈើតាប់មុខធំៗ ទាំងយប់ទាំងថ្ងៃដោយសុវត្ថិភាពគ្មានការបង្ក្រាបពីអាជ្ញាធរ និងជំនាញរដ្ឋបាលព្រៃឈើម្តងណាឡើយ។
ប្រភពដដែលបានបន្តថា ឡានដឹកឈើទាំងនោះគឺជាឆ្នាំងបាយដែលមានគុណភាពខ្ពស់ប្រើប្រាស់កាន់ឆ្នាំបើទោះបីជា សម្តេចតេជោ ហ៊ុន សែន ខំទប់ស្កាត់បទល្មើសព្រៃឈើយ៉ាងណាក៏ដោយក៏ជំនាញរដ្ឋបាលព្រៃឈើនៅតែ ផ្គើនមិនគោរពបទបញ្ជាណាមួយ ក៏គេទាំងនោះមិនទុកអោយឆ្នាំងបាយរបស់ពួកគេដែលធ្លាប់ស៊ីឆ្ងាញ់នោះអោយខ្លោចឬឆៅឡើយ។ ទើបជំនាញរដ្ឋបាលព្រៃឈើ ទាំងនោះសម្ងំយ៉ាងស្ងាត់ស្ងៀម ឲ្យតែបានលុយច្រកហោបៅមិនគិតពីផលប្រយោជន៍ជាតិឡើយ ។
ឈ្មួញដឹកឈើម្នាក់បានបង្ហើបអោយដឹងថា រូបគាត់ដឹកឈើគ្មានច្បាប់ទេ ដោយសារតែគាត់បានបង់លុយអោយជំនាញ និងសមត្ថកិច្ចទើបដឹកចូលមកលក់នៅសិប្បកម្មក្នុងខេត្តសៀមរាបបាន ។សូមបញ្ជាក់ថា ប្រសិនបើចង់ដឹងថាឈើមានច្បាប់ឬអត់ច្បាប់ សូមស្ថាប័នមានសមត្ថកិច្ចជំនាញអញ្ជើញដើរទៅខាងក្រោយកន្លែងសិប្បកម្មទាំងអស់នោះ នឹងឃើញឈើដែលគេកំពុងតែកែច្នៃធ្វើជាគ្រឿងសង្ហារឹមដែលមើលទៅគួរអោយព្រឺក្បាល។ ប្រភពបន្តទៀតថាគេឃើញសមត្ថកិច្ច ឬមេព្រៃឧស្សាហ៍ចេញចូលកន្លែងធ្វើអាជីវកម្មខាងលើនេះណាស់ប៉ុន្តែគេមិនដឹងថាសមត្ថកិច្ចឬជំនាញទាំងអស់នោះទេ ទៅត្រួតពិនិត្យឈើ ឬ ទៅយកលុយប្រចាំខែពីម្ចាស់សិប្បកម្មនោះ ឬ យ៉ាងណាទេ?
ចំណែកសិប្បកម្មកែច្នៃឈើទាំងអស់នោះ ខ្លះមិនមានច្បាប់អនុញ្ញាតិពីអាជ្ញាធរ ឬរដ្ឋបាលព្រៃឈើនោះទេ ហើយប្រសិនបើគ្មានច្បាប់ពីរដ្ឋបាលព្រៃឈើ តើការត្រួតពិនិត្យឈើមានប្រសិទ្ធភាពប៉ុណ្ណាទៅ ប៉ុន្តែទោះបីជាយ៉ាងណាឈ្មួញមួយចំនួនយល់ថាមិនបាច់មានច្បាប់ក៏បានដែរអោយតែមានលុយបង់ឲ្យសមត្ថកិច្ច និងមន្ត្រីជំនាញគឺ Ok! ហើយ៕
No comments:
Post a Comment
yes