នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល (ស្ដាំ) កំពុងបកស្រាយ
ចម្ងល់ផ្សេងៗរបស់សិក្ខាកាមដែលបានលើកឡើង កាលពីថ្ងៃទី២១ ខែវិច្ឆិកា ឆ្នាំ២០១២
អំពើពុករលួយនៅកម្ពុជា កើតមាននៅស្ទើរតែគ្រប់វិស័យនៅក្នុងសង្គម មានជាអាទិ៍ វិស័យសាធារណៈ វិស័យឯកជន និងស្ថាប័នតុលាការ។
អំពើពុករលួយមានពាក់ព័ន្ធចាប់ពីមនុស្សថ្នាក់ខ្ពស់រហូតដល់ថ្នាក់ទាប។ ដោយមើលឃើញយ៉ាងដូច្នេះ អង្គការតម្លាភាពកម្ពុជា (Transparency International Cambodia) បានបង្កើតកម្មវិធីមួយដែលមានឈ្មោះថា «រួមគ្នាប្រឆាំងអំពើពុករលួយ» រយៈពេល ៣ឆ្នាំ ពីឆ្នាំ២០១២ ដល់ឆ្នាំ២០១៥ ក្នុងគោលបំណងតស៊ូគាំទ្រតម្លាភាព និងសុចរិតភាព ព្រមទាំងពង្រឹងការយល់ដឹងរបស់ប្រជាពលរដ្ឋកម្ពុជា។
អំពើពុករលួយប៉ះពាល់គ្រប់សកម្មភាពនៅក្នុងសង្គម ទាមទារឲ្យមានការចូលរួមបំបាត់ពីគ្រប់ស្ថាប័នជាតិ ឯកជន និងអង្គការក្រៅរដ្ឋាភិបាលជាតិ និងអន្តរជាតិ។
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល ឲ្យដឹងថា អំពើពុករលួយនៅកម្ពុជា មានលក្ខណៈជាប្រព័ន្ធ និងចាក់ឫសគល់ពីថ្នាក់លើដល់ថ្នាក់ក្រោមជាតិ។ លោកពន្យល់ថា វាជារបៀបរស់នៅមួយ ដែលប្រជាពលរដ្ឋស្ទើរតែគ្រប់ស្រទាប់វណ្ណៈ ហាក់ដូចជាធ្លាក់ខ្លួនក្នុងការប្រព្រឹត្តអំពើពុករលួយដោយមិនដឹងខ្លួន។
ដោយមានថវិកាសរុប ២,៥លានដុល្លារ អង្គការតម្លាភាពកម្ពុជា នឹងធ្វើការរួមគ្នាគ្រប់ស្ថាប័នទាំងអស់ ទាំងរដ្ឋាភិបាល វិស័យឯកជន ក្រុមសង្គមស៊ីវិល បណ្ដាញផ្សព្វផ្សាយព័ត៌មាន ប្រជាពលរដ្ឋ និងក្រុមយុវជន ដើម្បីរួមកម្លាំងគ្នាបង្កើតឲ្យបានទៅជាចលនាសង្គមមួយ ប្រយុទ្ធប្រឆាំងអំពើពុករលួយ ទាមទារឲ្យខានតែបានថា អំពើពុករលួយគឺជាបញ្ហាធំរបស់សង្គម ដែលរដ្ឋាភិបាល និងអ្នកនយោបាយ មិនអាចព្រងើយកន្តើយ មិនអើពើ ឬមិនចាត់វិធានការឲ្យបានគ្រប់គ្រាន់ ឬមិនមានប្រសិទ្ធភាពបានទេ។
លោក ព្រាប កុល៖ «យើងនឹងមានការបង្កើតចលនាប្រជាពលរដ្ឋ និងចលនាសង្គមមួយ ដើម្បីទាមទារឲ្យរបៀបវារៈនៃការប្រយុទ្ធប្រឆាំងអំពើពុករលួយ និងក្លាយជារបៀបវារៈជាអាទិភាព»។
នាយកកម្មវិធីរួមគ្នាប្រឆាំងអំពើពុករលួយនៃអង្គការតម្លាភាពកម្ពុជា លោក ប៉ិច ពិសី បង្ហាញពីគម្រោងផែនការ ដើម្បីប្រឆាំងអំពើពុករលួយដោយពឹងផ្អែកលើសសរទ្រូង៣ រួមមានទី១ ការសិក្សាស្រាវជ្រាវ និងការតស៊ូមតិ ទី២ ការបង្កើតសម្ពន្ធភាព និងភាពជាដៃគូ ដើម្បីបង្កើតឲ្យមានភារកិច្ចខិតខំប្រឹងប្រែងរួមគ្នា និងវិធីសាស្ត្រកាន់តែមានប្រសិទ្ធភាព ក្នុងការប្រឆាំងអំពើពុករលួយ និងទី៣ ការចូលរួមពីសាធារណជន និងប្រព័ន្ធព័ត៌មានផ្សេងៗ។
លោក ប៉ិច ពិសី គូសបញ្ជាក់ថា កម្មវិធីប្រឆាំងអំពើពុករលួយនឹងរៀបចំសិក្ខាទៅតាមឆ្នាំនៃគម្រោង នីមួយៗ ដែលផ្ដោតទៅលើប្រធានបទ ការប្រយុទ្ធប្រឆាំងអំពើពុករលួយក្នុងវិស័យអប់រំ ដោយមានការសហការគ្នាយ៉ាងជិតស្និទ្ធជាមួយមន្ត្រីនៃអង្គភាពប្រឆាំងអំពើពុករលួយ ជាមួយក្រសួងអប់រំយុវជន និងកីឡា និងអង្គការក្រៅរដ្ឋាភិបាល។
លោកបន្តថា នឹងមានសិក្ខាដែលផ្ដោតទៅលើការប្រយុទ្ធប្រឆាំងអំពើពុករលួយក្នុងប្រព័ន្ធតុលាការ និងការប្រយុទ្ធប្រឆាំងអំពើពុករលួយក្នុងវិស័យឯកជន ដែលដើរតួនាទីសំខាន់ក្នុងការអភិវឌ្ឍសេដ្ឋកិច្ច៖ «យើងឃើញថា អំពើពុករលួយក្នុងវិស័យឯកជនឃើញថា ផលប៉ះពាល់សំខាន់ទៅលើការអនុវត្តប្រទេសរបស់យើងអ៊ីចឹងនៅឆ្នាំទី៣ យើងនឹងធ្វើសិក្ខាសាលាថ្នាក់ជាតិនេះ ពាក់ព័ន្ធនឹងវិស័យឯកជនថា តើអាចរួមគ្នាគ្រប់ស្ថាប័នពាក់ព័ន្ធធ្វើដូចម្ដេច ដើម្បីប្រយុទ្ធនឹងទប់ស្កាត់អំពើពុករលួយកុំឲ្យកើតមានច្រើន ឬក៏អាចកាត់បន្ថយណាមួយដែលគួរសម ដើម្បីសម្រួលឲ្យក្នុងវិស័យឯកជនយើង អនុវត្តទៅល្អជាងមុន»។
លោកបន្ថែមទៀតថា អង្គការតម្លាភាពកម្ពុជា នឹងធ្វើការកសាងភាពជាដៃគូជាមួយអង្គការផ្សេងៗ ដើម្បីធ្វើកិច្ចការតស៊ូមតិ និងប្រឆាំងអំពើពុករលួយ និងធ្វើការផងដែរក្នុងវិស័យឯកជន ជាមួយអ្នកច្បាប់ និងកិច្ចការរួមគ្នាជាមួយប្រជាពលរដ្ឋ ដោយកិច្ចការនេះអង្គការតម្លាភាពកម្ពុជា ធ្វើការយ៉ាង ជិតស្និទ្ធជាមួយអង្គភាពប្រឆាំងអំពើពុករលួយ ហើយអង្គភាពប្រឆាំងអំពើពុករលួយ ដើរតួនាទីសំខាន់លើកម្មវិធីមួយចំនួន ដើម្បីជំរុញឲ្យមានការប្រឆាំងអំពើពុករលួយ។
តាមគម្រោងអង្គការតម្លាភាពកម្ពុជា នឹងបង្កើតមជ្ឈមណ្ឌលមួយទទួលពាក្យបណ្ដឹងតាមរូបភាពផ្សេងៗ។
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល បញ្ជាក់ថា មានការវិវត្តន៍ច្រើន បន្ទាប់ពីច្បាប់ប្រឆាំងអំពើពុករលួយត្រូវបានអនុវត្ត ហើយនេះជាសញ្ញាមួយវិជ្ជមាន។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ធ្លាប់បញ្ជាក់ថា គណៈកម្មាធិការនេះ នឹងតាមដានការអនុវត្តការប្រឆាំងអំពើពុករលួយ ដោយយោងទៅតាមអនុសញ្ញាអន្តរជាតិ។ ម្យ៉ាងបច្ចុប្បន្ន អង្គភាពនេះកំពុងតែមានការជឿទុកចិត្ត និងមានការការពារសុវត្ថិភាពដល់ដើមបណ្ដឹង។
ទោះជាយ៉ាងណា លទ្ធផលស្ទង់មតិរបស់វិទ្យាស្ថានសាធារណរដ្ឋអន្តរជាតិ (IRI) ប្រកាសកាលពីខែឧសភា បង្ហាញថា ក្នុងចំណោមអ្នកផ្ដល់សម្ភាសន៍ ២ពាន់នាក់មាន ៤៣% ឃើញផ្ទាល់នៃការប្រព្រឹត្តអំពើពុករលួយរបស់អ្នកនយោបាយ ឬមន្ត្រីរាជការ។ ចំណែក ៦៥% បានឃើញ ឬជួបប្រទះនូវការប្រព្រឹត្តអំពើពុករលួយ ឬការស៊ីសំណូករបស់សមត្ថកិច្ច។
កាលពីឆ្នាំ២០១១ អង្គការតម្លាភាពអន្តរជាតិ (Transparency International) រកឃើញថា ប្រទេសកម្ពុជា ស្ថិតនៅលំដាប់លេខរៀងទី១៦៤ ក្នុងចំណោម ១៨៣ប្រទេស ដែលអង្គការអន្តរជាតិមួយនេះបានដាក់ពិន្ទុសម្រាប់អំពើពុករលួយ។ កម្ពុជាទទួលបានពិន្ទុតែ ២,១ មានន័យថា ជាប្រទេសមានអំពើពុករលួយបង្គួរ។
ចំណាត់ថ្នាក់នេះបង្ហាញថា កម្ពុជាប្រសើរជាងប្រទេសភូមា ដែលស្ថិតនៅលេខរៀង ១៨០។ ប៉ុន្តែ កម្ពុជា ស្ថិតនៅក្រោមប្រទេសឡាវ ស្ថិតក្នុងចំណាត់ថ្នាក់ ១៥៤ និងប្រទេសវៀតណាម ក្នុងលេខរៀង ១១២។ ចំណែកប្រទេសថៃ ស្ថិតនៅលេខរៀង ៨០។ កាលពីឆ្នាំ២០១០ អង្គការតម្លាភាពអន្តរជាតិបានវាយតម្លៃថា កម្ពុជាស្ថិតនៅលំដាប់លេខ ១៥៤៕
No comments:
Post a Comment
yes