រថភ្លើងមួយខ្សែដែលដឹកប្រេងបានធ្លាក់ចេញពីផ្លូវហើយបានផ្ទុះឆេះជាអណ្ដាតភ្លើងយ៉ាងខ្លាំងនៅប្រទេសភូមាភាគខាងជើងកាលពីថ្ងៃសុក្រ ដោយបានសម្លាប់មនុស្សយ៉ាងតិចណាស់ចំនួន២៥នាក់ និងមនុស្ស៦២នាក់ផ្សេងទៀតបានរងរបួស។
ក្រសួងព័ត៌មានបាននិយាយថា មនុស្សជាច្រើនដែលបានស្លាប់និងរងរបួសនោះគឺជាអ្នកភូមិដែលបានព្យាយាមប្រមូលប្រេងដែលបានហៀរចេញ។រថភ្លើងបានធ្វើដំណើរចេញពីទីក្រុង Mandalay ឆ្ពោះទៅកាន់ ទីក្រុង Myitkyina ភាគខាងជើងនៅជិតព្រំដែនជាមួយប្រទេសចិន ហើយវាបានធ្លាក់ចេញពីផ្លូវនៅជិតទីប្រជុំជនKantbalu ចម្ងាយប្រហែល៨០០គីឡូម៉ែត្រពីភាគខាងជើងនៃរដ្ឋធានីរ៉ង់ហ្គូន ប្រទេសភូមា។
មិនមានការពន្យល់ណាមួយត្រូវបានគេផ្ដល់ឲ្យជុំវិញហេតុការណ៍ខាងលើនេះឡើយ ប៉ុន្តែគេដឹងថា ប្រព័ន្ធផ្លូវដែករបស់ប្រទេសភូមាគឺស្ថិតនៅក្នុងលក្ខខណ្ឌមិនល្អនៅឡើយ បន្ទាប់ពីវាបានទ្រុឌទ្រមអស់ជាច្រើនឆ្នាំ។
ទោះជាយ៉ាងណាចំនួននៃអ្នកស្លាប់នៅក្នុងហេតុការណ៍នេះនៅមិនទាន់ច្បាស់នៅឡើយ។រដ្ឋាភិបាលបាននិយាយថា មនុស្ស២៥នាក់បានស្លាប់ និង៦២នាក់ផ្សេងទៀតបានរងរបួស។
ប៉ុន្តែមន្ត្រីសង្គ្រោះបន្ទាន់បាននិយាយថា មនុស្សច្រើនជាង៨០នាក់បានរងរបួស ខណៈមានមនុស្ស២៧នាក់បានស្លាប់។មន្ត្រីដដែលបានបញ្ជាក់ថា ជនរងគ្រោះ២នាក់បានស្លាប់បន្ទាប់ពីពួកគេត្រូវបានបញ្ជូនទៅកាន់មន្ទីរពេទ្យ៕
No comments:
Post a Comment
yes