ពលរដ្ឋខេត្តរតនគិរី បានអះអាងថា ដីចម្ការកៅស៊ូកេរដំណែលដូនតាធ្លាប់កាប់ឆ្ការ និងរស់អាស្រ័យផលច្រើនឆ្នាំរបស់ពលរដ្ឋ ៣០គ្រួសារ នៅស្រុកបរកែវ និងស្រុកអូរជុំ ខេត្តរតនគិរី ត្រូវក្រុមហ៊ុន តាយ សេង រំលោភយកតាមរយៈការចុះវាស់ដីរបស់មន្ត្រីបច្ចេកទេសនៃអគ្គនាយកដ្ឋានសុរិយោដី ជូនក្រុមហ៊ុនវិនិយោគមួយនេះ។
លោក ឃឹម សុខ ដែលអះអាងជាតំណាងឲ្យពលរដ្ឋចំនួន ៣០គ្រួសារនោះបានឲ្យដឹងថា នៅថ្ងៃទី២៥ ខែធ្នូ បានដាក់ពាក្យបណ្ដឹងជូនមន្ត្រីខុទ្ទកាល័យលោកនាយករដ្ឋមន្ត្រី ស្នើជួយអន្តរាគមន៍លើករណីក្រុមហ៊ុន តាយ សេង រំលោភយកដីចម្ការកៅស៊ូពួកគាត់។
តំណាងរូបនេះបានឲ្យដឹងក្នុងសន្និសីទកាសែតព្រឹកថ្ងៃទី២៥ ខែធ្នូ ដោយចោទក្រុមហ៊ុន តាយ សេង ដែលជាក្រុមហ៊ុនទទួលបានសិទ្ធិវិនិយោគចម្ការកៅស៊ូរដ្ឋក្នុងស្រុកបានលុងខេត្តរតនគិរី បានវាស់ដីរំលោភយកចម្ការកៅស៊ូកេរ្តិ៍ដូនតាចំនួន ១៦៤ហិកតារ ដែលធ្លាប់កាប់ឆ្ការ និងរស់អាស្រ័យតាំងពីឆ្នាំ១៩៨៨ មក។
លោកថា កង្វល់នេះពលរដ្ឋធ្លាប់ស្វែងរកមន្ត្រីពីគ្រប់ស្ថាប័នពាក់ព័ន្ធឲ្យជួយរកយុត្តិធម៌ ប៉ុន្តែពួកគេមិនមានចម្លើយវិជ្ជមានទេ ផ្ទុយទៅវិញបានឃុបឃិតគ្នារំលោភយកចម្ការកៅស៊ូពួកគាត់ និងបានធ្វើរបាយការណ៍ភូតកុហកទៅថ្នាក់ដឹកនាំ ថាដីចម្ការកៅស៊ូពលរដ្ឋជាចម្ការកៅស៊ូរដ្ឋទៅវិញ។
ផ្ដើមពីបញ្ហានេះ ពលរដ្ឋខេត្តរតនគិរី ស្នើឲ្យប្រមុខដឹកនាំជួយបើកការស៊ើបអង្កេត និងជួយអន្តរាគមន៍ចំពោះករណីរំលោភដីចំការកៅស៊ូពីសំណាក់ក្រុមហ៊ុន តាយ សេង ដើម្បីផ្ដល់យុត្តិធម៌ជូនពលរដ្ឋរងគ្រោះពិតប្រាកដ។
ពលរដ្ឋរងគ្រោះផ្សេងទៀតរស់នៅស្រុកបរកែវ និងស្រុកអូរជុំ ខេត្តរតនគិរី ក៏បានអំពាវនាវឲ្យលោកនាយករដ្ឋមន្ត្រី ហ៊ុន សែន ជួយពិនិត្យ និងផ្ដល់ដីចម្ការកៅស៊ូដែលត្រូវក្រុមហ៊ុន តាយ សេង រំលោភយកផ្ដល់ជូនពួកគាត់វិញ។
លោកថា ភាពអយុត្តិធម៌របស់ពួកគាត់បានអូសបន្លាយពេលប្រមាណ ២ឆ្នាំហើយ ដែលអាជ្ញាធរ និងស្ថាប័នពាក់ព័ន្ធមិនជួយរកយុត្តិធម៌ និងប្រើកម្លាំងប្រដាប់អាវុធបណ្ដេញពួកគាត់ចេញមិនឲ្យគ្រប់គ្រងចម្ការកៅស៊ូរបស់ខ្លួនថែមទៀត។
ទាក់ទិនបញ្ហានេះ វិទ្យុអាស៊ីសេរីមិនអាចទាក់ទងលោក លី ហុងស៊ុន ប្រធានក្រុមហ៊ុន តាយ សេង និងលោក យូ សុភាព មន្ត្រីបច្ចេកទេសនៃអគ្គនាយកដ្ឋានសុរិយោដី ដែលពលរដ្ឋខេត្តរតនគិរី ចោទថា បានរំលោភយកដីចម្ការកៅស៊ូបានទេ តាមទូរស័ព្ទនៅថ្ងៃទី២៥ ខែធ្នូ ឆ្នាំ២០១២។
យោងតាមឯកសារបញ្ជាក់ថា កាលពីឆ្នាំ២០០៧ រាជរដ្ឋាភិបាលបានវិនិយោគដីចម្ការកៅស៊ូរដ្ឋនៅក្នុងសង្កាត់ឡាបានសៀក ក្រុងបានលុង ខេត្តរតនគិរី ចំនួន ២.៣០០ហិកតារ និងអនុញ្ញាតឲ្យពង្រីកបន្ថែមចំនួន ២ពាន់ហិកតារក្នុងមូលដ្ឋាននេះទៅឲ្យក្រុមហ៊ុន តាយ សេង ក្នុងរយៈពេល ៧០ឆ្នាំ។ ពលរដ្ឋខេត្តរតនគិរី មានចម្ងល់ថា ហេតុអ្វីបានជាក្រុមហ៊ុន តាយ សេង បានទៅវាស់រំលោភយកដីចម្ការកៅស៊ូពួកគាត់ដែលមានទីតាំងនៅស្រុកបរកែវ និងស្រុកអូរជុំ ទៅវិញ។
ពលរដ្ឋចោទថា សកម្មភាពរំលោភដីចម្ការកៅស៊ូពួកគាត់ពីសំណាក់ក្រុមហ៊ុន តាយ សេង មានការឃុបឃិតពីមន្ត្រីបច្ចេកទេសនៃអគ្គនាយកដ្ឋានសុរិយោដី ព្រោះស្ថាប័ននេះជាប្រធានដឹកនាំចុះវាស់ទំហំផ្ទៃដីចម្ការកៅស៊ូរដ្ឋ សម្រាប់ផ្ដល់ជូនក្រុមហ៊ុន។
ពលរដ្ឋខេត្តរតនគិរី បានអះអាងថា ភាពអយុត្តិធម៌ដែលកំពុងកើតមានក្នុងសង្គមកម្ពុជាបច្ចុប្បន្ន គឺផ្ដើមដោយការឃុបឃិតគ្នារបស់ឈ្មួញមានទ្រព្យធន និងមន្ត្រីមានអំណាចក្នុងជួររដ្ឋាភិបាលធ្វើរបាយការណ៍ភូតកុហកថ្នាក់ដឹកនាំបំផ្លើសការពិត។
លោកថា ភាពអយុត្តិធម៌ទាំងនេះទាមទារឲ្យលោកនាយករដ្ឋមន្ត្រី ហ៊ុន សែន ពិនិត្យឲ្យបានដិតដល់ បើពិតជាមានចេតនាចង់ឲ្យប្រជាពលរដ្ឋរបស់ខ្លួនរស់នៅ និងប្រកបរបរទទួលទានមានការរីកចំរើនស្របតាមដូចគោលនយោបាយកាត់បន្ថយភាពក្រីក្ររបស់រាជរដ្ឋាភិបាលមែននោះ៕
No comments:
Post a Comment
yes