៧-មករា-២០១៣៖ មន្ត្រីជាន់ខ្ពស់គណបក្សប្រជាជនកម្ពុជា ក្នុងពិធីប្រារព្ធខួបទី៣៤
នៃថ្ងៃ៧ មករា នារាជធានីភ្នំពេញ
គណបក្សប្រជាជនកម្ពុជា នៅថ្ងៃទី៧ ខែមករា ឆ្នាំ២០១៣ បានប្រារព្ធខួបលើកទី៣៤ នៃថ្ងៃជ័យជំនះលើរបបខ្មែរក្រហម ដោយមានការគាំទ្រដោយកងទ័ពស្ម័គ្រចិត្តវៀតណាម។
មានសមាជិកសំខាន់ៗ និងមន្ត្រីជាន់ខ្ពស់សរុបជាង ១ម៉ឺននាក់ មកចូលរួម ក្រោមអធិបតីរបស់លោកនាយករដ្ឋមន្ត្រី ហ៊ុន សែន អនុប្រធានគណបក្សប្រជាជនកម្ពុជា លោក ជា ស៊ីម ប្រធានគណបក្ស និងលោក ហេង សំរិន ជាប្រធានកិត្តិយសនៃគណបក្សប្រជាជនកម្ពុជា។
ប្រធានកិត្តិយសគណបក្សប្រជាជនកម្ពុជា និងតំណាងសមាជិកគាំទ្រគណបក្សនេះ បានសំដែងការគាំទ្រយ៉ាងម៉ឺងម៉ាត់ថា គណបក្សប្រជាជនកម្ពុជា គាំទ្រតួនាទីរបស់គណៈកម្មាធិការជាតិរៀបចំការបោះឆ្នោត (គ.ជ.ប) ក្នុងការរៀបចំការបោះឆ្នោតសកល នៅថ្ងៃទី២៨ ខែកក្កដា ឆ្នាំ២០១៣ ខាងមុខនេះ ប្រកបដោយសេរី ត្រឹមត្រូវ និងយុត្តិធម៌។
ប្រធានកិត្តិយសគណបក្សប្រជាជនកម្ពុជា លោក ហេង សំរិន និងជាប្រធានសភាជាតិ បានមានប្រសាសន៍ទៅកាន់សមាជិកចំនួនជាង ១ម៉ឺននាក់ នៅថ្ងៃទី៧ ខែមករា ឆ្នាំ២០១៣ ថា គណបក្សប្រជាជនកម្ពុជា គាំទ្រ គ.ជ.ប និងគាំទ្របេក្ខភាពរបស់លោក ហ៊ុន សែន ជានាយករដ្ឋមន្ត្រីសំរាប់ការបោះឆ្នោតសកលនៅថ្ងៃទី២៨ ខែកក្កដា ឆ្នាំ២០១៣ ខាងមុខនេះ។
លោក ហេង សំរិន៖ «សំដៅចូលរួមធានាឲ្យការបោះឆ្នោតបានប្រព្រឹត្តទៅដោយជោគជ័យ ប្រកបដោយលក្ខណៈសេរី ត្រឹមត្រូវ និងយុត្តិធម៌ ដែលឆ្លុះបញ្ចាំងទាំងស្រុងនូវឆន្ទៈរបស់ប្រជាជន ដោយឈរលើមូលដ្ឋានគោរពម៉ឺងម៉ាត់តាមច្បាប់បទបញ្ជា និងនីតិវិធី និងក្រមសីលធម៌នៃការបោះឆ្នោត។ ខ្ញុំសូមបញ្ជាក់ជាឱឡារិកជាថ្មីទៀតនូវការគាំទ្របេក្ខភាពសម្ដេចអគ្គមហាសេនាធិបតីតេជោ ហ៊ុន សែន ជានាយករដ្ឋមន្ត្រីសំរាប់នីតិកាលទី៥ និងនីតិកាលបន្តបន្ទាប់ទៀត»។
ជាមួយគ្នានេះ តំណាងយុវជននៃគណបក្សប្រជាជនកម្ពុជា បានឡើងថ្លែងថា សមាជិកគណបក្សប្រជាជនកម្ពុជា និងយុវជននៃគណបក្សនេះ គាំទ្រទាំងស្រុងនូវសេចក្ដីថ្លែងការណ៍របស់លោក ហេង សំរិន ក្នុងការគាំទ្របែបនេះ៖ «ប្ដេជ្ញាគាំទ្រដាច់ខាត សម្ដេចអគ្គមហាសេនាបតីតេជោ ហ៊ុន សែន ជាទីគោរពស្រឡាញ់ និងគាំទ្រឥតងាករេនូវបេក្ខភាពនាយករដ្ឋមន្ត្រីសំរាប់នីតិកាលទី៥ និងអាណត្តិក្រោយៗទៀត»។
អគ្គលេខាធិការនៃគណៈកម្មាធិការជាតិរៀបចំការបោះឆ្នោត លោក ទេព នីថា បានមានប្រសាសន៍ប្រាប់វិទ្យុអាស៊ីសេរីថា៖«ការគាំទ្រ គ.ជ.ប នេះ គឺជាការជំរុញលើកទឹកចិត្តឲ្យ គ.ជ.ប បន្តកិច្ចការងាររៀបចំការបោះឆ្នោត។ គ.ជ.ប បានធ្វើសេចក្ដីព្រាងស្ដីពីបទបញ្ជា និងនីតិវិធី ដើម្បីធានាថា ការបោះឆ្នោតសកលខាងមុខនេះ ប្រកបដោយសេរី ត្រឹមត្រូវ និងយុត្តិធម៌»។
ផ្ទុយពីការអះអាងនេះ តំណាងរាស្ត្រគណបក្ស សម រង្ស៊ី លោក ស៊ុន ឆ័យ បានមានប្រសាសន៍ប្រតិកម្មថា លោកសោកស្ដាយចំពោះការគាំទ្របែបនេះ៖ «បានបង្ហាញថា គណបក្សប្រជាជនកម្ពុជា ពុំមានជម្រើសបេក្ខជនណាក្រៅពីនាយករដ្ឋមន្ត្រី ហ៊ុន សែន នោះឡើយ ដូច្នេះយើងមិនសង្ឃឹមថា ការគ្រប់គ្រងទៅថ្ងៃអនាគត បើសិនណាគណបក្សប្រជាជនកម្ពុជា នៅតែឈ្នះ។ មិនមានការកែប្រែ កែលម្អ ឬក៏អនុវត្តការកែទម្រង់ស៊ីជម្រៅណាដែលនាំទៅដល់ការទទួលសេចក្ដីសង្ឃឹម និងភាពយុត្តិធម៌ក្នុងសង្គមនៅពេលអនាគតនៅឡើយ»។
រហូតមកដល់ពេលនេះ គឺរយៈពេល ៣៤ឆ្នាំហើយ ក្រោយពីគណបក្សប្រជាជនកម្ពុជា បានផ្ដួលរំលំរបបខ្មែរក្រហមប្រល័យពូជសាសន៍ខ្មែរ ប៉ុន្តែប្រជាពលរដ្ឋខ្មែរទូទៅមិនទាន់បានឯកភាពគ្នានៅឡើយថា ថ្ងៃទី៧ ខែមករា ឆ្នាំ១៩៧៩ គឺជាថ្ងៃកំណើតទី២ នោះ។
គណបក្សប្រឆាំង មានគណបក្ស សម រង្ស៊ី និងគណបក្សសិទ្ធិមនុស្ស តែងតែចាត់ទុកថា ថ្ងៃទី៧ ខែមករា ឆ្នាំ១៩៧៩ គឺជាថ្ងៃកងទ័ពវៀតណាម ឈ្លានពានកម្ពុជា។ គណបក្សប្រជាជនកម្ពុជា តែងតែយកថ្ងៃនេះជាកម្មសិទ្ធិផ្ដាច់មុខ ដើម្បីឃោសនាបោះឆ្នោត។ សិទ្ធិសេរីភាពនៃសារព័ត៌មាន និងការតវ៉ាក្តីមិនមែនកើតឡើងដោយសារថ្ងៃទី៧ ខែមករា ទេ គឺកើតឡើងដោយសារកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១។
ចំណែកឯគណបក្សប្រជាជនកម្ពុជាវិញ បានចាត់ទុកថា ថ្ងៃទី៧ ខែមករា ឆ្នាំ១៩៧៩ គឺជាថ្ងៃកំណើតទី២ នៃប្រជាពលរដ្ឋខ្មែរទូទាំងប្រទេស។ មានថ្ងៃទី៧ ខែមករា ទើបមានអ្វីៗរហូតពេលនេះ។ ថ្ងៃទី៧ ខែមករា ឆ្នាំ១៩៧៩ គឺកើតឡើងដោយសារថ្ងៃទី២ ធ្នូ ឆ្នាំ១៩៧៨ ជាថ្ងៃបង្កើតរណសិរ្សសាមគ្គីសង្គ្រោះជាតិកម្ពុជា នៅស្រុកស្នួល ខេត្តក្រចេះ ប្រឆាំងរបបខ្មែរក្រហម។
មានប្រជាពលរដ្ឋមួយចំនួនមានមតិថា បើនិយាយពីថ្ងៃប្រវត្តិសាស្ត្រសំខាន់ៗនៅកម្ពុជា មិនមែនមានតែថ្ងៃ៧ មករា មួយនោះទេ។ ប្រជាពលរដ្ឋខ្លះបាននិយាយថា គេត្រូវមើលឲ្យឆ្ងាយហួសពីថ្ងៃ៧ មករា និង ២ ធ្នូ ទៅទៀត គឺមានថ្ងៃមួយចំនួនដែលទាក់ទងជាមួយមូលហេតុនាំឲ្យកើតមានថ្ងៃ ៧ មករា នោះ ដូចជាថ្ងៃ១៧ មេសា ឆ្នាំ១៩៧៥ មានថ្ងៃ១៨ មីនា ឆ្នាំ១៩៧០ និងថ្ងៃ ៩ វិច្ឆិកា ឆ្នាំ១៩៥៣។
កន្លងមកប្រធានគណបក្សប្រជាជនកម្ពុជា តែងតែឡើងថ្លែងសុន្ទរកថានៅរៀងរាល់បុណ្យខួបនៅថ្ងៃទី៧ ខែមករា ប៉ុន្តែនៅឆ្នាំនេះ ប្រធានកិត្តិយសគណបក្សប្រជាជនកម្ពុជា លោក ហេង សំរិន បានឡើងថ្លែងជំនួសវិញ ដោយសារតែលោក ជា ស៊ីម មានសុខភាពខ្សោយ។ លោក ជា ស៊ីម បានធ្វើដំណើរចូលមកគណបក្សប្រជាជនកម្ពុជា នៅថ្ងៃទី៧ ខែមករា ឆ្នាំ២០១៣ គឺមានអ្នកដើរអម និងមានអ្នករុញរទេះអមដែរ សំរាប់លោក ជា ស៊ីម៕
No comments:
Post a Comment
yes