អតីតប្រធានសហគមន៍ប្រជាពលរដ្ឋឃុំក្បាលត្រាច ក្នុងខេត្តពោធិ៍សាត់ លោក គុជ វេង
ប្រជាពលរដ្ឋនៅភូមិក្រឡាញ់ នាខេត្តពោធិ៍សាត់ ជាង ៦០គ្រួសារ បានបន្តការតវ៉ាចំពោះអាជ្ញាធរដែនដីដែលបានដកហូតសលាកបត្រដីដែលក្រុមនិស្សិតស្ម័គ្រចិត្តរបស់លោកនាយករដ្ឋមន្ត្រី បានវាស់វែងប្រគល់ឲ្យពួកគាត់។
ប្រជាពលរដ្ឋចំនួន ៣៦នាក់ ជាតំណាងឲ្យប្រជាពលរដ្ឋជាង ៦០គ្រួសារ ដែលត្រូវបានអាជ្ញាធរដែនដីដកហូតយកសលាកបត្រវាស់វែងដីដែលក្រុមយុវជនបានផ្ដល់ឲ្យពួកគាត់នោះ បាននាំគ្នាមកជួបអាជ្ញាធរឃុំ ដើម្បីតវ៉ាចំពោះការដកហូតនេះ។
បុរសអ្នកភូមិឈ្មោះ ម៉ាត់ ហ៊ីម ជាប្រជាពលរដ្ឋនៅភូមិក្រឡាញ់ ឃុំក្បាលត្រាច ស្រុកក្រគរ ខេត្តពោធិ៍សាត់។ គាត់បានឲ្យដឹងនៅព្រឹកថ្ងៃទី៦ មករា ឆ្នាំ២០១៣ ថា ដីដែលក្រុមយុវជនបានវាស់វែង និងផ្ដល់សលាកបត្រឲ្យពួកគាត់នេះ គឺជាដីដែលបានកាប់គាស់រួចហើយ ដោយឃើញដូច្នោះទើបក្រុមយុវជនវាស់វែងឲ្យពួកគាត់ តែអាជ្ញាធរបែរជាមិនព្រមប្រគល់ដីនេះឲ្យពួកគាត់កាន់កាប់ទៅវិញ ដោយសំអាងថា ដីនេះអាជ្ញាធរឃុំទុកសម្រាប់ធ្វើជាតំបន់ព្រៃសហគមន៍។
បុរសអ្នកភូមិរូបនេះអះអាងថា ដីតំបន់នេះ បើទោះជាយកទៅធ្វើជាព្រៃសហគមន៍ ក៏គ្មានប្រយោជន៍ដែរ ព្រោះជាដីព្រៃរេចរឹល និងដីចម្ការរបស់ប្រជាពលរដ្ឋ៖ «ខ្ញុំចង់ឲ្យថ្នាក់លើជួយរកដំណោះស្រាយឲ្យប្រជាពលរដ្ឋផង។ កន្លងទៅប្រជាពលរដ្ឋរងភាពអយុត្តិធម៌ណាស់។ ដីសហគមន៍មានស្រាប់ មិនឲ្យប្រជាពលរដ្ឋធ្វើជាព្រៃសហគមន៍ទេ មកដកយកដីប្រជាពលរដ្ឋទៅធ្វើសហគមន៍វិញ។ សំណូមពរឲ្យថ្នាក់លើជួយកែសម្រួលឲ្យប្រជាពលរដ្ឋបានសេចក្ដីសុខផង...»។
ឯកសារដែលវិទ្យុអាស៊ីសេរីទទួល បានបង្ហាញថា កាលពីឆ្នាំ២០០៩ ប្រជាពលរដ្ឋឃុំក្បាលត្រាច បានទទួលការយល់ព្រមពីអាជ្ញាធរភូមិទាំង ៩ និងអាជ្ញាធរឃុំក្បាលត្រាច ឲ្យបង្កើតព្រៃសហគមន៍នៅឯតំបន់ត្រនៀលផែះ ជាតំបន់មានព្រៃឈើគ្រប់ប្រភេទដែលអាចឲ្យអ្នកភូមិអាស្រ័យផលដោះស្រាយជីវភាពប្រចាំថ្ងៃបាន។ ប៉ុន្តែបន្ទាប់ពីរាជរដ្ឋាភិបាលបានផ្ដល់សម្បទានដីសេដ្ឋកិច្ចដល់ក្រុមហ៊ុនភាពីម៉ិច អាជ្ញាធរស្រុកបានផ្អាកសំណើសុំរបស់ប្រជាពលរដ្ឋមិនបញ្ជូនសំណើនេះបន្តទៅថ្នាក់លើឡើយ។
លោក គុជ វេង ជាអតីតប្រធានសហគមន៍ប្រជាពលរដ្ឋឃុំក្បាលត្រាច បានឲ្យដឹងថា ដីតំបន់ត្រនៀលផែះ គិតចាប់ពីភ្នំតាដុល រហូតមកដល់ចំណុចផ្លូវចោរ ជាតំបន់ដែលសម្បូណ៌ដោយព្រៃឈើល្អៗ គួរជាទីដែលត្រូវបង្កើតសហគមន៍ព្រៃឈើ។ លោកថា មិនដឹងមកពីហេតុអ្វីអាជ្ញាធរមិនព្រមយកតំបន់នេះមកធ្វើជាព្រៃសហគមន៍ ហើយបែរជាយកដីចំការ និងដីក្បាលស្រែរបស់ប្រជាពលរដ្ឋ មកធ្វើព្រៃសហគមន៍ទៅវិញ។
លោក គុជ វេង៖ «ដីដែលពួកខ្ញុំសុំនៅតំបន់ត្រនៀលផែះ ភ្នំតាដុលនោះ មានព្រៃអាស្រ័យផល ដែលមេភូមិ មេឃុំយល់ព្រមរួចហើយនោះ ម៉េចក៏ស្រុកមិនព្រមឲ្យ។ ឥឡូវមកយកដីប្រជាពលរដ្ឋមកធ្វើព្រៃសហគមន៍យ៉ាងនេះ មិនត្រូវទេ ព្រោះព្រៃសហគមន៍គឺជាព្រៃដែលប្រជាពលរដ្ឋពេញចិត្តអាចអាស្រ័យផល មិនមែនព្រៃរេចរឹលក្បាលស្រែនោះទេ...»។
លោក ចេង ឡៃ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ពន្យល់ចំពោះបញ្ហានេះថា ជាកំហុសផ្នែកបច្ចេកទេសក្នុងការវាស់វែងរបស់ក្រុមនិស្សិត៖ «ពេលដែលនិស្សិតវាស់ហើយ យើងយកមកផ្ទៀងផ្ទាត់ឃើញជាន់លើព្រៃសហគមន៍ ទើបយើងដកយកសលាកបត្រវិញ យើងមិនអាចជូនគាត់បានទេ...»។
កាលពីថ្ងៃទី២០ ខែធ្នូ ឆ្នាំ២០១២ ប្រធានក្រុមនិស្សិតទី១២០ យុវនិស្សិត ខៀវ បញ្ញវឌ្ឍន៍ បានសរសេរក្នុងរបាយការណ៍ផ្ញើជូនលោក ហ៊ុន ម៉ានិត ជាប្រធានក្រុមនិស្សិតស្ម័គ្រចិត្តចុះវាស់វែងដីធ្លីទូទាំងប្រទេស និងជាកូនប្រុសរបស់លោកនាយករដ្ឋមន្ត្រី ហ៊ុន សែន ថា លោកបានពិនិត្យឃើញថា ដីតំបន់នេះគឺជាដីដែលប្រជាពលរដ្ឋអាស្រ័យផលរួចហើយ ទើបក្រុមនិស្សិតសម្រេចវាស់វែងជូនប្រជាពលរដ្ឋ។ និស្សិតរូបនេះបន្តថា ការដកយកសលាកបត្រពីប្រជាពលរដ្ឋវិញនេះ អាចធ្វើឲ្យខកបំណង និងមិនបម្រើឲ្យឆន្ទៈពិតរបស់លោកនាយករដ្ឋមន្ត្រីនោះឡើយ៕
No comments:
Post a Comment
yes