ប្រជាពលរដ្ឋរង់ចាំស្តាប់លទ្ធផលនៃសវនាការលើការស្នើសុំនៅក្រៅឃុំរបស់មេធាវី
លោក ម៉ម សូណង់ដូ ខាងក្រៅក្បែរសាលាឧទ្ធរណ៍ រាជធានីភ្នំពេញ កាលពីថ្ងៃទី១៤ ខែធ្នូ ឆ្នាំ២០១២
មជ្ឈមណ្ឌលសិទ្ធិមនុស្សកម្ពុជា ប្រកាសបើកយុទ្ធនាការ "ប្រតិទិនយុត្តិធម៌លោក ម៉ម សូណង់ដូ" និងប្រកួតរចនាប័ណ្ណប៉ុស្តាល់ ឬប័ណ្ណអនុស្សាវរីយ៍ ដើម្បីឧទ្ទិសដល់លោក ម៉ម សូណង់ដូ នាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ដែលកំពុងជាប់ពន្ធនាគារ។
លោក ម៉ម សូណង់ដូ ត្រូវបានតុលាការផ្ដន្ទាទោសឲ្យជាប់ពន្ធនាគារ ២០ឆ្នាំ ចោទពីបទញុះញង់បង្កើតតំបន់អបគមន៍ប្រឆាំងរដ្ឋាភិបាលនៅខេត្តក្រចេះ។
សេចក្តីប្រកាសព័ត៌មានចុះថ្ងៃទី១០ ខែមករា របស់មជ្ឈមណ្ឌលសិទ្ធិមនុស្សកម្ពុជា បានបង្ហាញថា នៅថ្ងៃទី១៥ ខែមករា ឆ្នាំ២០១៣ មជ្ឈមណ្ឌលនឹងរៀបចំសន្និសីទសារព័ត៌មានស្ដីពីគម្រោងយុទ្ធនាការ "ប្រតិទិនយុត្តិធម៌លោក ម៉ម សូណង់ដូ" និងការប្រកួតរចនាប័ណ្ណប៉ុស្តាល់ ឬប័ណ្ណមានរូបសញ្ញាអនុស្សាវរីយ៍ក្នុងគម្រប់ ៦ខែ ឬរយៈពេល ១៨៦ថ្ងៃ ចាប់ពីថ្ងៃដែលលោក ម៉ម សូណង់ដូ ត្រូវបានចាប់ខ្លួន និងឃុំខ្លួន។
កម្មវិធីនេះក៏មានបំណងដាក់សម្ពាធបន្ថែមលើអាជ្ញាធរ ឲ្យដោះលែងរូបលោក ម៉ម សូណង់ដូ ឲ្យមានសេរីភាពវិញ។
លោក សួន ប៊ុនធឿន មន្ត្រីសម្របសម្រួលមជ្ឈមណ្ឌលសិទ្ធិមនុស្សកម្ពុជា បានឲ្យដឹងថា យុទ្ធនាការប្រតិទិនយុត្តិធម៌លោក ម៉ម សូណង់ដូ មានគោលបំណងទាក់ទាញនូវចំណាប់អារម្មណ៍ទៅលើចំនួនថ្ងៃដែលលោក ម៉ម សូណង់ដូ ត្រូវជាប់ពន្ធនាគារដោយអយុត្តិធម៌។ លោកបន្តថា មជ្ឈមណ្ឌលនឹងដាក់បង្ហាញប្រតិទិនយុត្តិធម៌នេះនៅមុខការិយាល័យរបស់ខ្លួន ហើយរាប់ចំនួនថ្ងៃដែលលោក សូណង់ដូ ត្រូវចាប់ខ្លួន និងអំពាវនាវឲ្យបណ្ដាអង្គការសង្គមស៊ីវិលដទៃ ចូលរួមក្នុងយុទ្ធនាការនេះ។ ហើយថាយុទ្ធនាការនេះ ក៏មានបើកប្រកួតរចនាម៉ូដកាត់ប៉ុស្ដាល់ ដើម្បីបោះពុម្ពជាកាតប៉ុស្ដាល់សម្រាប់ចែកជូនសាធារណជនគាំទ្រលោក ម៉ម សូណង់ដូ ថែមទៀត។
លោក សួន ប៊ុនធឿន៖ «ចង់ឲ្យមានការចាប់អារម្មណ៍ទាក់ទងនឹងការជាប់ឃុំរបស់គាត់។ មកដល់ថ្ងៃទី១៥ ខែមករា ឆ្នាំ២០១៣ មានរយៈពេល ៦ខែ ដែលលោក ម៉ម សូណង់ដូ ត្រូវសមត្ថកិច្ចចាប់ខ្លួន និងជាប់ក្នុងពន្ធនាគារ។ ដូច្នេះ យើងផ្ដើមគំនិតឲ្យមានប្រតិទិនយុត្តិធម៌មួយសម្រាប់ ដើម្បីរាប់ការជាប់ពន្ធនាគាររបស់គាត់»។
មានវ័យ ៧១ឆ្នាំ លោក ម៉ម សូណង់ដូ ត្រូវសមត្ថកិច្ចចាប់ខ្លួននៅថ្ងៃទី១៥ ខែកក្កដា ឆ្នាំ២០១២។ តុលាការបានចោទរូបលោកពីបទញុះញង់បង្កើតតំបន់អបគមន៍ប្រឆាំងរដ្ឋាភិបាល តាមរយៈជម្លោះដីធ្លីនៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។
ភរិយាលោក ម៉ម សូណង់ដូ អ្នកស្រី ឌិន ផាណារ៉ា មានប្រសាសន៍ថា សព្វថ្ងៃនេះស្វាមីគាត់មានជំងឺក្រពះធ្ងន់ធ្ងរ និងត្រូវការព្យាបាលនៅមន្ទីរពេទ្យ។ អ្នកស្រីឲ្យដឹងថា ស្ថានភាពជំងឺស្វាមីគាត់ ខាងមន្ត្រីពន្ធនាគារបានដាក់សំណើទៅក្រសួងមហាផ្ទៃ ដើម្បីអនុញ្ញាតឲ្យលោក ម៉ម សូណង់ដូ ចេញទៅព្យាបាលនៅមន្ទីរពេទ្យរយៈពេល ២សប្ដាហ៍មកហើយ ប៉ុន្តែមិនមានការឆ្លើយតបទេ។
វិទ្យុអាស៊ីសេរី មិនអាចទាក់ទងលោក គុយ ប៊ុនសន អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ ជុំវិញករណីលោក ម៉ម សូណង់ដូ បានទេនៅថ្ងៃទី១០ ខែមករា។
សាលាដំបូងរាជធានីភ្នំពេញ កាលពីថ្ងៃទី១ ខែតុលា ឆ្នាំ២០១២ បានប្រកាសសាលក្រមផ្ដន្ទាទោសលោក ម៉ម សូណង់ដូ ដាក់ពន្ធនាគារ ២០ឆ្នាំ និងពិន័យជាប្រាក់ ១០លានរៀល ចោទពីបទញុះញង់បង្កើតតំបន់អបគមន៍ប្រឆាំងរដ្ឋាភិបាល នៅស្រុកឆ្លូង ខេត្តក្រចេះ។
រីឯអ្នកភូមិ ៣នាក់ដែលកំពុងគេចខ្លួន ដែលត្រូវបានរដ្ឋាភិបាលប្ដឹងចោទថាជាមេខ្លោងដឹកនាំបង្កើតតំបន់អបគមន៍ក្នុងជម្លោះដីធ្លីនៅខេត្តក្រចេះ មានឈ្មោះ ប៊ុន រដ្ឋា ត្រូវតុលាការផ្ដន្ទាទោសកំបាំងមុខឲ្យជាប់ពន្ធនាគាររយៈពេល ៣០ឆ្នាំ។ រីឯលោក សុខ តុង និងលោក ប៊ុន ឆយ ត្រូវជាប់ពន្ធនាគាររយៈពេល ១៥ឆ្នាំ។ ជនជាប់ចោទទាំង ៣នាក់ បានច្រានចោលរាល់ការចោទប្រកាន់របស់តុលាការ និងរដ្ឋាភិបាល ថាបានបំផ្លើសការពិត។
ការផ្ដន្ទាទោសលោក ម៉ម សូណង់ដូ ឲ្យជាប់ពន្ធនាការ ២០ឆ្នាំ ត្រូវបានមជ្ឈដ្ឋានជាតិ និងអន្តរជាតិ មានសហរដ្ឋអាមេរិក បារាំង និងសហភាពអឺរ៉ុប ជាដើម បានចេញសេចក្តីថ្លែងការណ៍ថ្កោលទោសសាលក្រមរបស់តុលាការ និងចាត់ទុកសាលក្រមនេះមិនឯករាជ។
ទោះយ៉ាងណា មន្ត្រីជាន់ខ្ពស់រដ្ឋាភិបាល បានច្រានចោលចំពោះការចោទប្រកាន់ ហើយថារដ្ឋាភិបាលមិនបានពាក់ព័ន្ធលើឯករាជភាពរបស់តុលាការក្នុងសំណុំរឿងលោក ម៉ម សូណង់ដូ នេះទេ៕
No comments:
Post a Comment
yes