បើទោះបីជាគណបក្សសង្គ្រោះជាតិមិនមានប្រព័ន្ធផ្សព្វផ្សាយទូលំទូលាយដូចជាគណបក្សប្រជាជនកាន់អំណាចក៏ដោយតែការគាំ្រទ្ររបស់ពលរដ្ឋមានចំនួនកាន់តែច្រើន

បើនិយាយពីប្រព័ន្ធផ្សព្វផ្សាយនៅក្នុងប្រទេសកម្ពុជា គណបក្ស សង្គ្រោះជាតិ ត្រូវបានគណ​បក្សកាន់អំណាចធ្វើការរឹតបណ្តឹងយ៉ាងខ្លាំងបំផុតមិនថាវិទ្យុ ការសែត ឬគេហទំព័រនោះទេ ដែលការផ្សាយត្រូវមានកំរិត ។

ជាមួយគ្នានេះកម្មវិធីសម្លេងសង្គ្រោះជាតិ របស់គណបក្ស សង្គ្រោះជាតិ គឺទទួលបានកា​រ​ផ្សាយក្នុងមួយថ្ងៃត្រឹមតែ៤ម៉ោងប៉ុណ្ណោះ ដែលពេលព្រឹកចាប់ពីម៉ោង៧ដល់ម៉ោង៨ផ្សាយនៅ​វិទ្យុមហានគរ FM 93.5 ម៉ោង១ដល់ម៉ោង២រសៀលផ្សាយនៅវិទ្យុសំបុកឃ្មុំ FM 105 ម៉ោង៥​ដល់ម៉ោង៦ល្ងាចផ្សាយនៅវិទ្យុមហានគរ FM 93.5 និងពីម៉ោង៦ដល់ម៉ោង៧​យប់​ផ្សាយ​នៅ​វិទ្យុសំបុកឃ្មុំ FM 105 រីឯការផ្សាយនៅតាមបណ្តាខេត្តនានាមិនត្រូវបានគេអនុញ្ញាត​ឲ្យផ្សាយ​នោះឡើយ ហើយសូម្បីតែទូរទស្សន៏ និងវិទ្យុបក្សប្រឆាំងក៏មិនត្រូវបានគេអនុញ្ញាតឲ្យតំឡើង សម្រាប់តំណើរការផ្សាយផងដែរ ។

អ្វីទាំងអស់នេះគឺបញ្ហាញឲ្យឃើញថាគណបក្សកាន់អំណាច ខ្លាចកម្លាំងរបស់គណបក្ស សង្គ្រោះ​ជាតិខ្លាំងណាស់ ពិសេសគឺភាពអយុត្តិធម៌នៅក្នុងសង្គមក្រោម​ការដឹកនាំរបស់​ពួក​គេទាំង​ប៉ុន្មាន​ត្រូវបានគណបក្ស សង្គ្រោះជាតិ យកមកទំលាយឲ្យពលរដ្ឋកម្ពុជាទូទៅ និងអន្តរ​ជាតិ​បានដឹង ពីការដឹកនាំដ៏កំសោយ និងធ្វើបាបរាស្រ្ត ដើម្បីប្រយោជន៏របស់ពួកគេនោះ ។

តែបើយើងក្រលែកមើលវិទ្យុជាង១០០ប៉ុស្តិ៍ ទូររទស្សន៏គ្រប់បណ្តាស្ថានីយ សុតតែស្ថិតនៅ ក្រោមការគ្រប់គ្រងរបស់គណ​បក្សកាន់អំណាចទាំងអស់ តើទាំងនេះវាជាភាពអយុត្តិធម៌ទេចំ ពោះគណបក្ស សង្គ្រោះជាតិ ដែលកម្ពុជារដ្ឋាភិបាលខ្លួនឯងបានស្រែកក្តែងៗថា ប្រកាន់យក របបលទ្ធិប្រជាធិបតេយ្យនោះ តើប្រជាធិបតេយ្យនៅឯណា ? គឺលទ្ធិប្រជាធិបតេយ្យមានតែ នៅលើបបូមាត់របស់ពួកគេ និងក្រដាស់តែប៉ុណ្ណោះ ធាតុពិតកម្ពុជាមិនមានលទ្ធិប្រជាធិប​តេយ្យឡើយ ។

ប្រការទាំងអស់នេះហើយ ទើបបានជារៀងរាល់ថ្ងៃថ្នាក់ដឹកនាំចលនាប្រជាធិបតេយ្យសង្គ្រោះ ជាតិ បានធ្វើតំណើរគ្រប់ទីកន្លែង និងគ្រប់តំបន់ទូទាំងប្រទេស ទាំងថ្នាក់ជាតិ ថ្នាក់ខេត្ត ថ្នាក់​ស្រុក ថ្នាក់ភូមិ និងឃុំជាដើម ដើម្បីជួបពលរដ្ឋ ធ្វើការផ្សព្វផ្សាយគោលនយោបាយរបស់គណ បក្ស សង្គ្រោះជាតិ ដល់ពួកគាត់ និងធ្វើការពន្យល់ណែនាំ​ពួកគាត់ឲ្យយល់​អំពីសារសំខាន់នៃ​ការចូលរួម​បោះឆ្នោត បើទោះបីជាយើងគ្រប់គ្នាដឹងហើយថាការបោះឆ្នោតនៅកម្ពុជាគ្មាន​តម្លា​ភាព សុក្រឹត្ត យុត្តិធម៌ សេរី និងត្រឹមត្រូវក៏ដោយ ក៏យើងម្នាក់ៗជាប្រជាពលរដ្ឋខ្មែរ​ត្រូវតែ​ក្រោក​ឈរឡើង ហើយចូលរួមបោះឆ្នោតឲ្យអ្នកប្រជាធិបតេយ្យទាំងអស់គ្នា​ យើងមិនត្រូវធ្វើព្រងើយ​កន្តើយ ធ្វើមិនដឹងមិនឮ ហើយទុកឲ្យគណបក្សកាន់អំណាចធ្វើអ្វីស្រេចតែអំពើចិត្តរបស់ពួកគេ បានជាបន្តទៀតទេ គឺយើងជាម្ចាស់ឆ្នោតត្រូវតែបញ្ឈប់សកម្មភាពរបស់គណបក្សកាន់អំណាច ដែលធ្វើរបៀបមិនប្រក្រតីបែបនេះឲ្យបាននៅឆ្នាំ២០១៣នេះ ។

ជាមួយគ្នានោះផងដែរ សូម្បីតែអន្តរជាតិ ក៏បានគាំទ្រនិងធ្វើការទាមទារឲ្យរដ្ឋាភិបាលរបស់ លោក ហ៊ុន សែន សម្រាប់ការបោះឆ្នោតជាតិអាណត្តិទី៥នេះ ត្រូវតែរៀបចំការបោះឆ្នោត​ឲ្យ​បានត្រឹមមត្រូវ និងធានាថាគ្មានការខួចបន្លំ បំភិតបំភ័យពលរដ្ឋឲ្យបោះឆ្នោត​ឲ្យគណ​បក្ស​របស់ខ្លួនទៀត​ឡើយ បើមិនដូច្នេះទេរដ្ឋាភិបាលដែលកើតឡើងរបៀបលួចបន្លំ​ដដែល​ជាដដែល គឺអន្តរជាតិ គេមិនទទួលស្គាល់ឡើយ ពេលនោះហើយដែលកម្ពុជា​ត្រូវជួបនិង​គ្រោះ​អាសន្ន ដោយហេតុថាអន្តរជាតិក៏និងលែងផ្តល់ជំនួយដល់កម្ពុជាដើម្បីយកមកកសាង និង​អភិវឌ្ឍន៏ប្រទេសជាតិដែរ ដូច្នេះជៀសមិនរួចឡើយលោក ហ៊ុន សែន ត្រូវតែរៀបចំការបោះ ឆ្នោតប្រព្រឹត្តិទៅដោយសេរី ត្រឹមត្រូវ និងយុត្តិធម៌ ពេលនោះហើយដែលគណបក្ស សង្គ្រោះ​ជាតិ ពិតជាអាចយកជ័យជំនះលើគណបក្សកាន់អំណាចជាក់ជាមិនខានឡើយ ។

គួរជំរាបជួនផងដែរថា ការចុះជួបពលរដ្ឋរបស់ថ្នាក់ដឹកនាំចលនាប្រជាធិបតេយ្យសង្គ្រោះជាតិ ជារៀងរាល់ថ្ងៃនេះ គឺមានសារសំខាន់ខ្លាំងណាស់ ព្រោះប្រព័ន្ធផ្សព្វផ្សាយរបស់គណបក្ស សង្គ្រោះជាតិ ដែលធ្វើ របៀបនេះក៏បង្ករឲ្យថ្នាក់ដឹកនាំរបស់ចលនាប្រជាធិបតេយ្យ​សង្គ្រោះ​ជាតិ មានភាពស្និទ្ធស្នាលជាមួយពលរដ្ឋបន្ថែមមួយកំរិតទៀត និងធ្វើឲ្យថ្នាក់ដឹកនាំពួកគាត់​បាន​ដឹងពីផលលំបាករបស់ពលរដ្ឋ និងតម្រូវការរបស់ពលរដ្ឋដែលពួកគាត់ចង់បាន​គ្រប់​ពេល​ផងដែរ ។

សរុបសេចក្តីមក បើទោះបីជាគណបក្សកាន់អំណាចបំបិទសិទ្ធិគណបក្សប្រឆាំងសម្រាប់ប្រ​ព័ន្ធផ្សព្វផ្សាយយ៉ាងណាក៏ដោយ ក៏គណបក្ស សង្គ្រោះជាតិ នៅតែអាចធ្វើការផ្សាព្វផ្សា​យ​គោលជំហ៊ររបស់គណបក្សខ្លួន ក៏ដូចជាគោលបយោបាយដល់ពលរដ្ឋបានគ្រប់​ពេលផងដែរ ហេតុដូចនេះហើយទើបធ្វើឲ្យគណបក្ស សង្គ្រោះជាតិ ទទួលបានការគាំទ្រពីសំ នាក់ប្រជាពល​រដ្ឋកាន់តែច្រើនឡើងពីមួយថ្ងៃទៅមួយថ្ងៃបែបនេះ ។

ជាមួយគ្នានេះកាលពីថ្ងៃទី២០ ខែកុម្ភៈ ឆ្នាំ២០១៣ នៅខេត្តបាត់ដំបងថ្នាក់ដឹកនាំចលនាប្រជាធិ បតេយ្យសង្គ្រោះជាតិបានធ្វើតំណើរចុះទៅជួបជាមួយប្រជាពលរដ្ឋពេលព្រឹកដឹកនាំដោយលោកស្រី មូ សុខហួរ ជាប្រធានចលនាប្រជាធិបតេយ្យសង្គ្រោះជាតិខេត្ត ចូលរួមវត្តមានពីសំ​ណាក់លោកប្រធាន កឹម សុខា​ និងអមតំណើរដោយថ្នាក់ដឹកនាំខេត្ត និងស្រុកមួយចំនួនទៀត ជួបពលរដ្ឋនៅភូមិបឹងព្រលឹត ឃុំសន្តិភាព ស្រុកសំពៅលូន ពេលរសៀលនៅភូមិបឹងបេង ឃុំ បួរ ស្រុកភ្នំព្រឹក ចំណែកមួយក្រុមទៀតដឹកនាំដោយលោក សោរ ចាន់ដេត ថ្នាក់ដឹកនាំចល​នា​ប្រធិបតេយ្យសង្គ្រោះជាតិខេត្ត រួមតំណើរដោយក្រុមការងារខេត្ត ស្រុក និងឃុំ បានចុះជួបពល រដ្ឋពេលព្រឹកនៅភូមិសំបុកអក ឃុំកំពង់ព្រៀង ស្រុកសង្កែ ចំណែកពេលរសៀលនៅភូមិកាច់ រទេះ ឃុំកំពង់ព្រៀង ស្រុកសង្កែដដែល ។

អ្វីទាំងអស់នេះគឺថ្នាក់ដឹកនាំចលនាប្រជាធិបតេយ្យសង្គ្រោះជាតិធ្វើដើម្បីសង្គ្រោះប្រទេស កម្ពុជាចេញពីការគ្រប់គ្រង និងដឹកនាំពីគណបក្សប្រជាជនកាន់អំណាចសព្វ​ថ្ងៃឲ្យបាននៅ​ក្នុង​ការបោះឆ្នោតជាតិអាណត្តិទី៥ ថ្ងៃទី២៨ ខែកក្កដា ឆ្នាំ២០១៣នេះ ដែលគេបានដឹកនាំប្រទេស កម្ពុជាដើរទៅដល់រណ្តៅមាត់ជ្រោះមរណៈហើយនោះ ៕​