អ្នកស្រី យ៉ោម បុប្ផា និងកូនប្រុស នៅតុលាការកំពូល
អង្គការអន្តរជាតិធំៗចំនួនពីរ
ដាក់ការព្រួយបារម្ភលើប្រសាសន៍នាយករដ្ឋមន្ត្រីកម្ពុជា
ករណីសកម្មជនដីធ្លីបឹងកក់ អ្នកស្រី យ៉ោម បុប្ផា
ដែលនេះអាចប៉ះពាល់ដល់ដំណើរការស្វែងរកយុត្តិធម៌ជូនសកម្មជនរូបនេះ ។
អង្គការទាំងពីរនេះ
គឺសហព័ន្ធអន្តរជាតិការពារសិទ្ធិមនុស្ស (FIDH) និងអង្គការប្រឆាំងការធ្វើទារុណកម្មពិភពលោក
(OMCT) ។
ស្ថាប័នទាំងពីរ បានដាក់លិខិតមួយ
ចុះផ្សាយនៅថ្ងៃទី២៨ខែមិនា ទៅលោកនាយករដ្ឋមន្ត្រី ហ៊ុន សែន លោក អង្គ
វង្សវឌ្ឍនា រដ្ឋមន្ត្រីក្រសួងយុត្តិធម៌ លោកស ខេង
រដ្ឋមន្ត្រីក្រសួងមហាផ្ទៃ លោក ហោ ណាំហុង រដ្ឋមន្ត្រីក្រសួងការបរទេស និងលោក
ស៊ុន សួន អគ្គរាជទូតរបស់កម្ពុជា ប្រចាំអង្គការសហប្រជាជាតិ ។
សូមជំរាបថាកាលពីថ្ងៃទី១៩ ខែមិនា លោកនាយករដ្ឋមន្ត្រី
ហ៊ុន សែន ថ្លែងថា ការលើកឡើងណាមួយថាការចាប់ខ្លួនស្ត្រីម្នាក់នៅតំបន់បឹងកក់
ជាកើតចេញពីរឿងតវ៉ារឿងដីធ្លីនោះ
ជារឿងមិនយុត្តិធម៌សម្រាប់រាជរដ្ឋាភិបាល ។
អង្គការទាំងពីរ
បានបង្ហាញការព្រួយបារម្ភពីការថ្លែងរបស់លោកនាយករដ្ឋមន្ត្រីហ៊ុន សែន
ដែលនេះពិតជាប៉ះពាល់ដល់ដំណើរការកាត់ក្តីដោយយុត្តិធម៌
សម្រាប់អ្នកស្រីយ៉ោម បុប្ផា និងការបែកចែកអំណាចរវាងនីតិប្រតិបត្តិ
និងតុលាការ ។ អង្គការទាំងពីរ
អំពាវនាវឲ្យទម្លាក់បទចោទប្រឆាំងនឹងអ្នកស្រីយ៉ោម បុប្ផា ជាបន្ទាន់
និងគ្មានលក្ខខណ្ឌ ដោយសារនេះ ប៉ះពាល់ដល់សកម្មភាពសិទ្ធិមនុស្សរបស់អ្នកស្រី ។
អង្គការទាំងពីរ
ក៏បានជំរុញកម្ពុជាឲ្យអនុវត្តតាមសេចក្តីថ្លែងការណ៍
ស្តីពីអ្នកការពារសិទ្ធិមនុស្ស របស់អង្គការសហប្រជាជាតិ ដែលក្នុងនោះ
មានសេរីភាពជាមូលដ្ឋាន ការទទួលស្គាល់ពីសិទ្ធិមនុស្ស សកម្មភាពសន្តិភាពប្រឆាំងការរំលោភសិទ្ធិមនុស្ស
តួនាទីរដ្ឋក្នុងការធានាការគោរព និងការការពារសិទ្ធិមនុស្ស ។
ការអំពាវនាវឲ្យដោះលែងនេះ
ធ្វើឡើងបន្ទាប់ពីតុលាការកំពូល បានច្រានចោលបណ្តឹងទាស់សុំនៅក្រៅឃុំរបស់អ្នកស្រី
យ៉ោម បុប្ផា ។
សាលាដំបូងរាជធានីភ្នំពេញ កាលពីចុងឆ្នាំ២០១២
បានចោទប្រកាន់សកម្មជនដីធ្លីរូបនោះថា ជាអ្នកប្រើហិង្សា
វាយបុរសអ្នករត់ម៉ូតូឌុបពីរនាក់ឲ្យរងរបួស និងត្រូវផ្តន្ទាទោស
ឲ្យជាប់ពន្ធនាគារ៣ឆ្នាំ ដោយពិន័យជាប្រាក់៦០លានរៀល ៕
No comments:
Post a Comment
yes