មនុស្សចាស់នៅក្នុងភូមិមួយនាខេត្តកំពង់ស្ពឺ ជូនអីវ៉ាន់ដល់គ្នា។ រូបឯកសារ
មនុស្សចាស់បច្ចុប្បន្នមានវាសនាមិនដូចគ្នាទេ។ អ្នកខ្លះចាស់ទៅមានសំណាងដោយមានកូនចៅចិញ្ចឹមបីបាច់ថែរក្សា អ្នកខ្លះទៀត ចាស់ទៅអភព្វ ត្រូវរកស៊ីចិញ្ចឹមខ្លួនដោយខ្លួនឯង មិនតែប៉ុណ្ណោះត្រូវចិញ្ចឹមកូនចៅ ឬរហូតធ្លាក់ខ្លួនជាអ្នកសុំទានទៀតផង។
នៅក្នុងសង្គមជឿនលឿន រដ្ឋាភិបាលមានគោលការណ៍ឧបត្ថម្ភគាំទ្រមនុស្សចាស់ជរា ប៉ុន្តែរដ្ឋាភិបាលកម្ពុជា ទាំងមុននិងបច្ចុប្បន្ន មិនដែលមានគោលការណ៍នយោបាយចិញ្ចឹមមនុស្សចាស់ទេ។
តើទាំងបក្សកាន់អំណាច និងបក្សប្រឆាំង បានរៀបចំគោលនយោបាយសម្រាប់មនុស្សចាស់បែបណាខ្លះ បើសិនជាជាប់ឆ្នោតនៅអាណត្តិខាងមុខ?
គណបក្សសង្គ្រោះជាតិបានប្រកាសគោលនយោបាយផ្ដល់ប្រាក់ឧបត្ថម្ភ ៤ម៉ឺនរៀលទៅដល់មនុស្សដែលមានវ័យចាប់ពី ៦៥ឆ្នាំឡើងទៅ បើសិនជាជាប់ឆ្នោត។ គោលនយោបាយនេះ ត្រូវបានលោកនាយករដ្ឋមន្ត្រី ហ៊ុន សែន ធ្លាប់ព្រមានថា លោកនឹងដឹកនាំបាតុកម្មទាមទារប្រាក់ខែមនុស្សចាស់នេះ បើសិនបក្សកាន់អំណាចចាញ់ឆ្នោត។ លោក ហ៊ុន សែន បានប្រកាសថា គណបក្សកាន់អំណាចរៀបចំគោលនយោបាយសម្រាប់មនុស្សចាស់តាំងពីជាង ៣០ឆ្នាំមុនមកម្ល៉េះ។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា គណបក្សកាន់អំណាចមិនមានគោលនយោបាយថ្មីសម្រាប់មនុស្សចាស់ទេ។ តែគណបក្សនេះបានគិតគូរចំពោះមនុស្សចាស់រួចទៅហើយ ដូចជា ការសាងសង់វត្តអារាមជាទីជម្រកសម្រាប់មនុស្សចាស់គ្មានទីពឹង និងកសាងទីបច្ឆាសម្រាប់បូជាសពពេលដែលមនុស្សចាស់ស្លាប់ទៅជាដើម។
លោកបន្តថា វត្តអារាមទាំងជាង ៤ពាន់នៅទូទាំងប្រទេស សុទ្ធតែរីកដុះដាលក្រោមស្នាដៃកសាងរបស់សមាជិកគណបក្សប្រជាជនកម្ពុជា។ លោកបញ្ជាក់ថា តាំងពីឆ្នាំ១៩៧៩ មកទល់ពេលនេះ គណបក្សប្រជាជនបានជួយមនុស្សចាស់រាប់លាននាក់តាមរយៈការសាងសង់វត្តអារាម ហើយនេះមិនមែនជាការចៃដន្យទេ តែជានយោបាយច្បាស់លាស់។
លោក ហ៊ុន សែន៖ «ខ្លះគេលើកពីគោលនយោបាយសម្រាប់មនុស្សចាស់ អ៊ីចេះអ៊ីចុះ។ ការសន្យាខ្យល់ជារឿងមួយ ប៉ុន្តែរឿងពិតបានកើតឡើងរយៈពេលជាង ៣៤ឆ្នាំមកហើយ លោកយាយលោកតាចាស់ៗដែលគ្មានទីពឹងទៅរស់នៅណាបើគ្មានកូនចៅនោះ? សូមកុំភ្លេចថា នេះជាផ្នែកមួយនៃគោលនយោបាយមនុស្សចាស់របស់គណបក្សប្រជាជនបានធ្វើ កំពុងធ្វើ និងបន្តធ្វើ។ សូម្បីកសាងបច្ឆាក៏ជាផ្នែកមួយនៃគោលនយោបាយសម្រាប់មនុស្សចាស់ដែរ»។
ទោះជាយ៉ាងណាក្តី មន្ត្រីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ មិនធ្វើអត្ថាធិប្បាយចំពោះគោលនយោបាយសង់វត្ត និងបច្ឆាសម្រាប់មនុស្សចាស់របស់គណបក្សកាន់អំណាចឡើយ។ប៉ុន្តែលោកប្រាប់ថា គណបក្សប្រឆាំងមានគោលនយោបាយច្បាស់លាស់សម្រាប់ផ្ដល់ការឧបត្ថម្ភគាំទ្រ និងតបស្នងសងគុណចំពោះមនុស្សចាស់។ លោកបន្តថា បើគណបក្សសង្គ្រោះជាតិឈ្នះឆ្នោត គណបក្សនេះនឹងរៀបចំច្បាប់មួយដែលចែងថា រដ្ឋមានកាតព្វកិច្ចបង់ប្រាក់ឧបត្ថម្ភជូនមនុស្សចាស់ដែលមានអាយុ ៦៥ឆ្នាំឡើងទៅ យ៉ាងតិចចំនួន ៤ម៉ឺនរៀលក្នុង១ខែ ដើម្បីរួមចំណែកជួយផ្គត់ផ្គង់ជីវភាពពួកគាត់។
លោក យឹម សុវណ្ណ៖ «បញ្ហាភាពក្រីក្រ សុខភាពទ្រុឌទ្រោម គ្មានការថែទាំ អត់មានការឧបត្ថម្ភអ្វីទាំងអស់ រហូតទៅដល់ការព្យាបាលជំងឺ ដូច្នេះគណបក្សសង្គ្រោះជាតិជាគណបក្សទី១ដែលឧបត្ថម្ភសង្គមកិច្ចដល់មនុស្សចាស់។ យើងយកថវិកាតែពាក់កណ្ដាលនៃថវិកាដែលយើងប្រមូលបានពីការទស្សនាអង្គរវត្តហ្នឹង ក៏គ្រប់គ្រាន់ពេកណាស់ទៅហើយ»។
លោកបញ្ជាក់ថា កម្ពុជាមានលទ្ធភាពគ្រប់គ្រាន់ក្នុងការអភិវឌ្ឍ និងចិញ្ចឹមបីបាច់ថែរក្សាមនុស្សចាស់ បើសិនណាជាពង្រឹងនីតិរដ្ឋឲ្យមានប្រសិទ្ធភាពនោះ។
តាមទិន្នន័យជំរឿនឆ្នាំ២០០៨ បង្ហាញថា មនុស្សចាស់នៅកម្ពុជា អាយុចាប់ពី ៦៥ឆ្នាំ មានចំនួនជិត ១លាននាក់។ អត្រាភាពក្រីក្រមានជាង ៥០% ហើយភាគច្រើនគ្រួសារពលរដ្ឋទាំងនោះមានមនុស្សចាស់នៅក្នុងបន្ទុក។ អ្នកសិក្សាស្រាវជ្រាវបង្ហាញថា ចាស់ៗនៅតាមជនបទភាគច្រើនមិនមានអាហារហូបចុកគ្រប់គ្រាន់ ហើយមួយចំនួនធំមានភារកិច្ចមើលចៅៗ ឲ្យកូន ដើម្បីឲ្យកូនធ្វើចំណាកស្រុកទៅក្រៅប្រទេសទៀតផង។
ទាក់ទងនឹងគោលនយោបាយសម្រាប់មនុស្សចាស់នេះ អ្នកវិភាគនយោបាយឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា គោលនយោបាយសាងសង់វត្តអារាម ធ្វើបុណ្យទានរបស់បក្សកាន់អំណាចឆ្លុះបញ្ចាំងពីការធ្វើទានសម្លឹងផល។ សង់វត្តឲ្យគេដឹងគុណ ឆ្លុះបញ្ចាំងពីការចង់បានសន្លឹកឆ្នោត និងការគាំទ្រ។ លោកបន្តថា បក្សប្រឆាំងវិញមានគោលនយោបាយមួយបញ្ជាក់ថា មនុស្សចាស់មានសិទ្ធិទទួលបានប្រាក់ឧបត្ថម្ភពីសង្គមជាតិ ផ្ទុយពីការរង់ចាំទទួលទានដែលគេដាក់ឲ្យ។
លោកបញ្ជាក់ថា នៅប្រទេសជឿនលឿនរដ្ឋមានភារកិច្ចធានានូវការរស់រានរបស់មនុស្សចាស់ឲ្យប្រសើរ តាមរយៈការកាត់ប្រាក់ខែសន្សំទុកសម្រាប់សោធននិវត្តន៍ និងការឧបត្ថម្ភបន្ថែមសង្គមកិច្ចជាដើម៖ «ដូចយើងធ្វើការឲ្យគេអ៊ីចឹង យើងមានសិទ្ធិបើកប្រាក់ខែ មិនមែនប្រាក់ខែហ្នឹងសុំទានគេទេ ហើយចាស់ជរាហ្នឹងគាត់បានធ្វើការជួយសង្គមជាតិកាលពីគាត់នៅសកម្មហ្នឹង គាត់ត្រូវបានទទួលជំនួយឧបត្ថម្ភជាប្រាក់សោធននិវត្តន៍ហ្នឹងវិញ។ ត្រូវតែមានស្ថាប័ន មានយន្តការ មានច្បាប់ទម្លាប់»។
ទន្ទឹមនឹងនេះ អ្នកស្រាវជ្រាវសង្គមឯករាជ្យ លោកបណ្ឌិត កែម ឡី ពន្យល់ថា កម្ពុជាអាចចាប់ផ្ដើមយកចិត្តទុកដាក់ទៅលើមនុស្សចាស់បានយ៉ាងទូលំទូលាយ តាមរយៈការពង្រីកសេវារបស់បេឡាជាតិ របបសន្តិសុខសង្គម។ ប៉ុន្តែបើសិនជាសង្ឃឹមលើវត្តអារាម នោះមិនអាចទៅរួចទេ។
លោកបន្តថា វត្តអារាមបង្កើតឡើងមិនមែនសំដៅធ្វើការងារសង្គមកិច្ចជាចម្បងឡើយ តែវត្តជាទីតាំងប្រារព្ធពិធីសាសនា ហើយវត្តអារាមនៅតាមជនបទមួយចំនួន សូម្បីតែព្រះសង្ឃក៏រកចង្ហាន់ឆ្ងាញ់មិនគ្រប់ផង។ លោកបញ្ជាក់ថា គណបក្សឈ្នះឆ្នោត គួរតែរៀបចំគោលនយោបាយឲ្យបានសមស្របបំផុតសម្រាប់មនុស្សចាស់ ជៀសវាងឲ្យមនុស្សចាស់រស់នៅតាមការដាក់ទានតទៅទៀត។
លោក កែម ឡី៖ «យើងឃើញវត្តអារាមមួយចំនួនសំបូរហូបតែពេលបុណ្យទេ ខែអត់បុណ្យហ្នឹងលំបាកមែនទែន អត់មានឧបាសកឧបាសិកាយកចង្ហាន់ទៅវត្តទេ។ ខ្ញុំទៅវត្តពីរឃើញវេទនាមែនទែន ហូបត្រកួនហូបអី សូម្បីតែលោកហ្នឹងអត់មានអីឆាន់ផងពេលអត់មានបុណ្យទាន ចុះបើសិនជាឲ្យយាយតាមួយភូមិៗទៅនៅក្នុងវត្តហ្នឹងទៀតម៉េចទៅ? ហ្នឹងជាគោលនយោបាយចៃដន្យមួយដែលយាយតាទៅបានហូបក៏បានទៅ បើមិនបានហូបត្រឡប់មកវិញទៅ បើសិនជាអត់ហ្នឹងត្រូវត្រឡប់មកវិញហើយ បើសិនជាគាត់រៀបចំបេឡាជាតិសន្តិសុខសង្គម គ្របដណ្ដប់ទៅលើមនុស្សចាស់នោះ បានផលតែម្តង»។
សង្គមស៊ីវិលរកឃើញថា មនុស្សចាស់មួយចំនួនគ្មានទីពឹង មិនអាចទៅរស់នៅទីវត្តអារាមបានទេ ហើយវត្តអារាមខ្លះដែលមានព្រះសង្ឃ មានបុណ្យសក្ដិធំៗ រឹតតែមិនអនុញ្ញាតឲ្យចាស់ៗ ដែលគ្មានទីពឹងនៅបម្រើសង្ឃទៀត។ ចំពោះមន្ត្រីចាស់ៗដែលចូលនិវត្តន៍វិញ ប្រាក់សោធននិវត្តន៍ដែលពួកគាត់ទទួលបាននោះ ក៏មិនគ្រប់ចំណាយប្រចាំថ្ងៃដែរ ហើយការបើកប្រាក់សោធននិវត្តន៍នោះ ក៏យឺតយ៉ាវ ឬស្ថិតក្រោមឥទ្ធិពលអំពើពុករលួយទៀតផង៕
No comments:
Post a Comment
yes