ក្រុងបាងកកៈ ក្រុមអភិរក្សនាំមុខមួយបានព្រមានពីថ្ងៃព្រហស្បតិ៍ថា តម្រូវការសម្រាប់ដីកសិកម្ម អាចបំផ្លាញព្រៃឈើតំបន់ទន្លេមេគង្គធំដែលនៅសល់១/៣របស់ខ្លួន ក្នុងពេលពីរទសវត្សរ៍បន្ទាប់ បើគ្មានវិធានការរបស់រដ្ឋាភិបាលភ្លាមៗទេនោះ។
ក្នុងរបាយការណ៍មួយ មូលនិធិសត្វព្រៃពិភពលោក(WWF)បាននិយាយថា ព្រៃឈើកំពុងត្រូវបានគេកាប់សម្អាតដើម្បីទំនិញ ដូចជាកៅស៊ូ និងស្រូវ ខណៈការកាប់ឈើខុសច្បាប់ កំពុងបំផ្លាញតំបន់ព្រៃការពារជាច្រើន។ របាយការណ៍នេះបន្ថែមថា ទំនប់ដែលមានវិវាទលើទន្លេមេគង្គ នឹងបំផ្លាញប្រព័ន្ធអេកូឡូស៊ីដែលខូចខាតធ្ងន់ធ្ងរស្រាប់។
លោក ភិធើ ខាត់ធើ នៃ WWF បានថ្លែងថា៖«តំបន់ទន្លេមេគង្គធំស្ថិតនៅផ្លូវបំបែកមួយ»។ លោកបានបន្ថែមថា ប្រទេសកម្ពុជា ឡាវ និងមីយ៉ាន់ម៉ា បានបាត់បង់ព្រៃពួកគេពី២២ទៅ២៤ភាគរយ ពីឆ្នាំ១៩៧៣ ដែលជាចំណុចទីមួយនៃទិន្នន័យដល់ឆ្នាំ២០០៩ ចំណែកឯ ៤៣ភាគរយនៃដីព្រៃត្រូវបានបំផ្លាញនៅថៃ និងវៀតណាម។
លោក បាននិយាយថា៖ «ផ្លូវមួយនាំទៅរកការធ្លាក់ថែមទៀតនៅផ្នែកជីវចម្រុះ និងជីវិត...ប៉ុន្តែប្រសិនបើធនធានធម្មជាតិ ត្រូវបានគ្រប់គ្រងដោយទទួលខុសត្រូវនោះ តំបន់នេះអាចបន្តដើរលើផ្លូវមួយ ដែលនឹងធានាបាននូវអនាគតសុខភាពល្អ និងរុងរឿង សម្រាប់ប្រជាជននៅក្នុងតំបន់នោះ»។
ការសិក្សានេះ បានរកឃើញថា មីយ៉ាន់ម៉ាជាប្រទេសមួយដែល រំពឹងថានឹងទទួលបានកំណើនសេដ្ឋកិច្ចឆាប់រហ័យ បន្ទាប់ពីបញ្ចប់ការគ្រប់គ្រងដោយយោធា កំពុងស្ថិតលើមុខព្រួញកាប់បំផ្លាញព្រៃឈើមួយ ជាពិសេសនៅតាមតំបន់ព្រំដែនរបស់ខ្លួន ក៏ដូចគ្នានៅផ្នែកមេគង្គខាងត្បូងនៃប្រទេសវៀតណាម និងកម្ពុជាដែរ។
រដ្ឋាភិបាល ដែលមានគំនិតកែទម្រង់ បានហាមការនាំចេញឈើហ៊ុប ចាប់ពីឆ្នាំបន្ទាប់ក្នុងកិច្ចប្រឹងប្រែងទប់ទល់នឹងការកាប់ឈើខុសច្បាប់ដែលមិនអាចទប់បាន។
WWF បាននិយាយថា តំបន់ដែលមិនទាន់ត្រូវបានរំខាននៃព្រៃឈើ នៅទូទាំងតំបន់ ក៏ត្រូវបានគេបែងចែកទៅជាចម្ការ និងនគរូបនីយកម្មយ៉ាងរហ័ស ខណៈព្រៃកោងកាងដ៏ធំល្វឹងល្វើយ ត្រូវបានប្រែក្លាយទៅជាវាលស្រែ និងសម្រាប់កសិដ្ឋានចិញ្ចឹមបង្កង។
របាយការណ៍នោះ បានព្រមានថា បើសិនជាការបំផ្លាញព្រៃឈើនៅតែបន្ត ដីព្រៃដែលនៅសល់៣៤ភាគរយនឹងត្រូវបាត់បង់ និងត្រូវគេបែងចែកត្រឹមឆ្នាំ២០៣០ដោយព្រៃស្នូលនៅសល់ត្រឹមតែ១៤ភាគរយ ដោយបំផ្លាញសត្វព្រៃ ដែលក្នុងនោះមានសត្វខ្លា និងដំរី។
ទំនប់វារីអគ្គិសនីសាយ៉ាប៊ូរីរបស់ប្រទេសឡាវ ក៏ត្រូវបានបង្ហាញថា ជាការគំរាមកំហែងធំមួយ ចំពោះប្រព័ន្ធអេកូឡូស៊ីរបស់ទន្លេមេគង្គ ដោយនិយាយថា វានឹងមានផលប៉ះពាល់បង្ហិនបង្ហោច សម្រាប់ប្រជា-ជន៦០លាននាក់ ដោយរារាំងត្រីគ្រប់ប្រភេទ និងកាកសំណល់មិនឲ្យហូរដល់ពីតំបន់ខាងក្រោមនៃប្រព័ន្ធទឹក។ គម្រោងវារីអគ្គិសនីនេះ បានធ្វើឲ្យឡាវ វៀតណាម កម្ពុជា និងថៃបែកបាក់គ្នា៕
No comments:
Post a Comment
yes