ប្រជារាស្ត្រខ្មែរនៅគ្រប់ទិសទីទោះបីពួកគាត់មិនសូវមានចំណេះដឹង ព្រោះមួយថ្ងៃៗខ្វល់ខ្វាយតែរឿងក្រពះលក់កម្លាំងពលកម្មដើម្បីបានលុយយកទៅទិញអង្ករឆ្នាំងមិនមានពេលវេលាគ្រប់គ្រាន់ទៅសិក្សារៀនសូត្រ ប៉ុន្តែពួកគាត់ក៏មានការពិចារណា វែងឆ្ងាយអំពីអនាគតប្រទេសជាតិ ដូចពាក្យចាស់បានពោលថា កើតមកកុំនាំតែធ្ងន់ផែនដីហើយក្នុងមួយជីវិតយ៉ាងហោចណាស់ ក៏ចេះធ្វើការងារដើម្បីបម្រើផលប្រយោជន៍ជាតិ កុំឲ្យគេថារស់គ្មានន័យ ហើយពលរដ្ឋដែលមានចំណេះដឹងតិចតួច បានសួរគ្នាទៅវិញទៅមកថា គ្រប់មណ្ឌលដែលមេដឹកនាំគណបក្សប្រជាជនកម្ពុជា ទៅឈរឈ្មោះបោះឆ្នោតសុទ្ធតែចាញ់ឆ្នោតយ៉ាងអាម៉ាស់មុខ ហេតុអ្វីបានជា គ.ជ.ប បែរជាប្រកាសលទ្ធផលបណ្តោះអាសន្នបង្ហាញពីជ័យជំនះរបស់គណបក្សប្រជាជនកម្ពុជា?
នេះជារឿងងាយយល់បំផុត គ្មានអ្វីស្មុគស្មាញទេ សូម្បីតែកូនក្មេងដែលមិនទាន់ឈប់បៀមដៃ ក៏ដឹងដែរថា ការប្រកាសលទ្ធផលបោះឆ្នោតបណ្តោះអាសន្នយ៉ាងតក់ក្រហល់បែបនេះពិតជាមានរឿងរ៉ាវអាថ៌កំបាំងអ្វីមួយនៅក្រោយវាំងននខ្មៅជាមិនខានឡើយ ហើយបើមានការស៊ើបអង្កេតឲ្យស៊ីជម្រៅប្រកបដោយតម្លាភាពវាំងននខ្មៅនឹងរបើកចេញ ហើយរឿងពិតអាចហែកភ្នែកប្រជារាស្ត្រខ្មែរទូទៅឲ្យមើលឃើញពីល្បែងទុច្ចរិតនៃការលួចបន្លំសន្លឹកឆ្នោតយ៉ាងភ្លូកទឹកភ្លូកដី ជាពិសេសការឆក់ប្លន់ឆន្ទៈនិងក្តីសង្ឃឹមរបស់ប្រជារាស្ត្រមិនអាចលាក់បាំងបានទេ។ តាមរយៈភាពមិនប្រក្រតីជាច្រើនដែលកើតមានក្នុងថ្ងៃបោះឆ្នោត សុទ្ធតែជាកម្មវត្ថុដែលគ្រប់ៗគ្នាមើលឃើញយ៉ាងច្បាស់ថា គ.ជ.ប បានត្រូវដៃត្រូវជើងជាមួយគណបក្សប្រជាជនក្នុងការលួចបន្លំសន្លឹកឆ្នោតនិងលួចយកជ័យជំនះរបស់គណបក្សសង្គ្រោះជាតិ ដែលមានឯកសារភស្តុតាងសព្វគ្រប់ បានរៀបចំជាពាក្យបណ្តឹងរួចរាល់អស់ហើយ ប៉ុន្តែ គ.ជ.ប មិនអើពើដោះស្រាយ។
សូម្បីតែការទាមទារឲ្យមានការផ្ទៀងផ្ទាត់តួលេខនៃចំនួនសន្លឹកឆ្នោត ដោយតម្លាភាពតាមរយៈការត្រួតពិនិត្យបូកលេខឡើង វិញ តាមទម្រង់ផ្លូវការលេខ ១១០៤ ក៏ គ.ជ.ប មិនហ៊ានធ្វើការផ្ទៀងផ្ទាត់ឡើងវិញ បែរជាបង្ខំប្រកាសលទ្ធផលបោះឆ្នោតបណ្តោះអាសន្នយ៉ាងតក់ក្រហល់។ គណបក្សសង្គ្រោះជាតិ ជឿជាក់ថា ខ្លួនអាចទទួលបានយ៉ាងតិចបំផុត ចំនួន៦៣អាសនៈ រហូតដល់៦៥អាសនៈ ដោយយោងតាមទិន្នន័យតួលេខដែលប្រមូលបាន ពីទម្រង់ផ្លូវការ១១០៤ ដែលជាលទ្ធផលរាប់សន្លឹកឆ្នោតតាមការិយាល័យនីមួយៗ ប៉ុន្តែបើស្តាប់តាមតួលេខដែល គ.ជ.ប បានប្រកាសគឺខុសគ្នាពីតួលេខក្នុងទម្រង់១១០៤ បង្កើតឲ្យមានចម្ងល់ជាច្រើន។ ប្រសិនបើ គ.ជ.ប ស្អាតស្អំ ជាពិសេសគណបក្សប្រជាជនកម្ពុជាជឿជាក់ថាខ្លួនពិតជាទទួលបានជ័យជំនះមែននោះ មិនមានអ្វីត្រូវខ្លាចក្នុងការផ្ទៀងផ្ទាត់តួលេខនៃការរាប់សន្លឹកឆ្នោតឡើងវិញនោះទេដើម្បីកុំឲ្យមហាជនមានមន្ទិលសង្ស័យ ហើយរឿងសំខាន់បំផុតនោះ នៅពេលដែលគ.ជ.ប មិនដោះស្រាយភាពមិនប្រក្រតីឲ្យមានតម្លាភាពធ្វើឲ្យលទ្ធផលបោះឆ្នោតផ្ទុយពីឆន្ទៈរបស់ប្រជារាស្ត្រ គ.ជ.ប ត្រូវតែទទួលខុសត្រូវរាល់បាតុភាពដែលកើតមានឡើងក្នុងពេលអនាគតដ៏ខ្លីខាងមុខនេះ។
លោកប្រធាន សម រង្ស៊ី ដែល បានទៅប្រកាសជ័យជំនះរបស់គណបក្សសង្គ្រោះជាតិនៅសហរដ្ឋអាមេរិកបានបញ្ជាក់យ៉ាងច្បាស់ថា គ្រប់មណ្ឌលដែលថ្នាក់ដឹកនាំគណបក្សប្រជាជនឈរឈ្មោះបោះឆ្នោត សុទ្ធតែចាញ់ឆ្នោតយ៉ាងអាម៉ាស់មុខ ដូចជាមណ្ឌលខេត្តកណ្តាល លោក ហ៊ុន សែន ជាអនុប្រធានគណបក្សប្រជាជនកម្ពុជា និងជាបេក្ខជននាយករដ្ឋមន្ត្រី ឈរជាបេក្ខជនតំណាងរាស្ត្រលំដាប់លេខ១ ទីបំផុតក្នុងមណ្ឌលខេត្តកណ្តាលនេះ គណបក្សសង្គ្រោះជាតិឈ្នះបាន ៦អាសនៈ ហើយគណបក្សប្រជាជនកម្ពុជាទទួលបានតែ៥អាសនៈប៉ុណ្ណោះ។ តាមការគ្រោងទុកលោកប្រធានសម រង្ស៊ី ត្រូវឈរឈ្មោះ នៅមណ្ឌលខេត្តកណ្តាល ដើម្បីប្រជែងជាមួយលោក ហ៊ុន សែន ជាការស្ទាបស្ទង់សំឡេងគាំទ្ររបស់ពលរដ្ឋចំពោះគណបក្សសង្គ្រោះជាតិ ថាតើមានច្រើនប៉ុនណា ប៉ុន្តែលោកប្រធាន សម រង្ស៊ី ត្រូវបានគេរារាំងមិនឲ្យចូលរួមបោះឆ្នោត និងឈរឈ្មោះនៅមណ្ឌលខេត្តកណ្តាល ប្រជែងជាមួយលោក ហ៊ុន សែន នោះទេ ហើយប្រសិនបើលោកប្រធាន សម រង្ស៊ី មានវត្តមានឈរឈ្មោះបោះឆ្នោតនៅមណ្ឌលខេត្តកណ្តាល ប្រហែលជាគណបក្សសង្គ្រោះជាតិអាចរកបានដល់៨អាសនៈឯណោះ។
សម្រាប់មណ្ឌលខេត្តកំពង់ចាម ដែលមានលោក ហេង សំរិន ជាប្រធានកិត្តិយសរបស់គណបក្សប្រជាជនកម្ពុជា ឈរជាបេក្ខជនតំណាងរាស្ត្រលេខរៀងទី១ ក៏ចាញ់ឆ្នោតយ៉ាងអាម៉ាស់មុខផងដែរ ហើយនៅខេត្តកំពង់ចាម លោក កឹម សុខា ជាអនុប្រធានគណបក្សសង្គ្រោះជាតិ បានឈរឈ្មោះនៅទីនោះ អាចដណ្តើមបានជ័យជំនះរហូតដល់១០អាសនៈ ឯគណបក្សប្រជាជនទទួលបានតែ ៨អាសនៈប៉ុណ្ណោះ។ មណ្ឌលកំពង់ចាមនេះផងដែរ ប្រសិនបើគ្មានការជិះជាន់សង្កត់សង្កិនគំរាមកំហែងប្រជាពលរដ្ឋឬគ្មានការលួចបន្លំសន្លឹកឆ្នោតទេ នោះគណបក្សសង្គ្រោះជាតិ អាចទទួលបានដល់ទៅ១២អាសនៈ ដូច្នេះបង្ហាញឲ្យឃើញថា សន្ទុះគាំទ្ររបស់គណបក្សសង្គ្រោះជាតិមានការកើនឡើងហួសពីការរំពឹងទុកគ្រប់ទីកន្លែង។
សម្រាប់មណ្ឌលរាជធានីភ្នំពេញ ដែលលោក ជា ស៊ីម ប្រធានគណបក្សប្រជាជនកម្ពុជាឈរឈ្មោះ នៅលំដាប់លេខ១ក៏ចាញ់ឆ្នោតយ៉ាងអាម៉ាស់មុខផងដែរ គឺគណបក្សសង្គ្រោះជាតិទទួលបានដល់ទៅ៧អាសនៈខណៈដែលគណបក្សប្រជាជនទទួលបានតែ៥អាសនៈប៉ុណ្ណោះ។ យ៉ាងណាក៏ដោយ សំឡេងដែលគណបក្សសង្គ្រោះជាតិទទួលបាននៅពេលនេះសុទ្ធសឹងតែជាសំឡេងដែលសេសសល់ពីការទិញដូរ ការបំភិតបំភ័យ និងការលួចបន្លំ ហើយប្រសិនបើមានការបោះឆ្នោតដោយសេរីត្រឹមត្រូវនិងយុត្តិធម៌នោះ គណបក្សសង្គ្រោះជាតិ ស្ទើរតែគ្រប់គ្រងអាសនៈនៅក្នុងរដ្ឋសភាជាតិយ៉ាងតិច ២ភាគ៣។
បើយើងពិនិត្យមើលតាមហេតុផលជាក់ស្តែង យើងអាចវាយតម្លៃបានថា ប្រសិនបើគណបក្សប្រជាជនកម្ពុជា ពិតជាមានឱកាសឈ្នះឆ្នោតដោយតម្លាភាព ម្លេ៉ះសមមណ្ឌលដែលមេដឹកនាំគណបក្សប្រជាជនកម្ពុជាឈរឈ្មោះបោះឆ្នោត ពិតជាឈ្នះឆ្នោតយ៉ាងភ្លូកទឹកភ្លូកដី ជាមិនខានឡើយ ហើយបើគណបក្សប្រជាជនកម្ពុជាតាំងចិត្តជាកីឡាករ ប្រកួតយកឈ្នះចាញ់ប្រកបដោយកិត្តិយសនិងសេចក្តីថ្លៃថ្នូរក៏គ្មានអ្វីត្រូវខ្លាចចំពោះការទាមទារឲ្យផ្ទៀងផ្ទាត់តួលេខចំនួនសន្លឹកឆ្នោតឡើងវិញ ឲ្យស្របតាមទម្រង់ផ្លូវការ ១១០៤ ដើម្បីបង្ហាញឲ្យប្រជារាស្ត្រខ្មែរទូទៅអស់មន្ទិលសង្ស័យ។ យ៉ាងណាក៏ដោយប្រជារាស្ត្រខ្មែរទូទៅនៅតែមិនជឿថា គណបក្សប្រជាជនកម្ពុជាទទួលបានសំឡេងឆ្នោតច្រើនជាងគណបក្សសង្គ្រោះជាតិ ដូចដែល គ.ជ.ប បានប្រកាសលទ្ធផលបណ្តោះអាសន្ននោះទេ ដូច្នេះប្រជារាស្ត្រខ្មែរទូទៅបានប្តេជ្ញារួចហើយ ក្នុងការការពារជ័យជំនះ ការពារសេចក្តីសង្ឃឹម របស់ពួកគាត់ មិនទុកឱកាសឲ្យ គ.ជ.ប និងអ្នកកាន់អំណាចលួចបន្លំសន្លឹកឆ្នោត លួចយកជ័យជំនះរបស់គណបក្សសង្គ្រោះជាតិ បានជាដាច់ខាត។ បើតាមការព្រមានរបស់លោក សុរិយា ស៊ូប៊ែរឌី គឺលោកមើលឃើញថា ប្រសិនបើការបោះឆ្នោតមិនឆ្លុះបញ្ចាំងពីការពិត មិនត្រឹមត្រូវតាមឆន្ទៈរបស់ប្រជាពលរដ្ឋអាចនាំឲ្យប្រទេសកម្ពុជាជួបអស្ថិរភាពឬអាចមានអំពើហិង្សាយ៉ាងអាក្រក់កើតឡើងដោយសារមហាបាតុកម្មផុសចេញពីទឹកចិត្តប្រជារាស្ត្រខ្មែរដែលមិនទទួលស្គាល់លទ្ធផលបោះឆ្នោតលួចបន្លំបំពានឆន្ទៈពួកគាត់៕
No comments:
Post a Comment
yes