អង្គការឃ្លាំមើលការរំលោភសិទ្ធិមនុស្សលីកាដូ (LICADHO) ទទូចជាថ្មីទៀត ឲ្យរដ្ឋាភិបាលចាត់វិធានការ ដាក់ទណ្ឌកម្មចំពោះកងកម្លាំងសមត្ថកិច្ច ដែលប្រើអាវុធបាញ់សម្លាប់ ប្រជាពលរដ្ឋ និងក្រុមអ្នកតវ៉ាដោយសន្តិវិធី ដើម្បីលុបបំបាត់និទណ្ឌភាពនៅកម្ពុជា។
របាយការណ៍របស់អង្គការលីកាដូ ចំនួន៥ទំព័រ ចេញផ្សាយថ្ងៃទី២៣ ខែវិច្ឆិកា ចំទិវាអន្តរជាតិ ស្តីពីការបញ្ចប់និទណ្ឌភាពឆ្នាំ២០១៣ បានរកឃើញថា គិតត្រឹមឆ្នាំ២០១២ ដល់ឆ្នាំ២០១៣នេះ សមត្ថកិច្ចបានប្រើអាវុធ បាញ់បង្ក្រាប ក្រុមអ្នកតវ៉ា រឿងដីធ្លី កម្មករទាមទារលក្ខខណ្ឌការងារ និងជម្លោះបុគ្គល ជាដើម រហូតជិត២០ករណី ក្នុង១០ករណីបណ្តាលឲ្យជនរងគ្រោះស្លាប់ និង៩ករណីរងរបួស។
របាយការណ៍បន្តថា ករណីទាំងនោះជនដៃដល់ មិនត្រូវបានរដ្ឋាភិបាលយកមកផ្តន្ទាតាមច្បាប់ទេ ចំណែកគ្រួសាររងគ្រោះមួយចំនួន ត្រូវបានអាជ្ញាដាក់សម្ពាធឲ្យទទួលសំណង ត្រឹមតែ ១៥០០ ទៅ១៨០០ដុល្លារអាមេរិកប៉ុណ្ណោះ ជាថ្នូរនឹងការដកពាក្យបណ្តឹង។
លីកាដូបង្ហាញថា កាលពីថ្ងៃទី៣០ ខែមិនា ឆ្នាំ២០១២ កសិករម្នាក់ នៅឃុំព្រែកអាជីរ ស្រុកក្រូចឆ្មារ ខេត្តកំពង់ចាម ត្រូវបានអនុប្រធានប៉ុស្តិ៍ បាញ់ចំដើមទ្រូងស្លាប់ភ្លាមៗ នៅកន្លែងកើតហេតុ ដោយសារជម្លោះបុគ្គល។ ការបាញ់សម្លាប់កុមារី ហេង ចន្ថា អាយុ១៤ឆ្នាំនៅឃុំកំពង់ដំរី ស្រុកឆ្លូង ខេត្តក្រចេះ។
ករណី សមត្ថកិច្ចប្រើគ្រាប់ពិតបាញ់បង្ក្រាបកម្មកររោងចក្រSL នៅគល់ស្ពានស្ទឹងមានជ័យ នាថ្ងៃទី១២ ខែវិច្ឆិកា ឆ្នាំ២០១៣ បណ្តាលឲ្យស្ត្រីអ្នកលក់បាយតាមថ្នល់ម្នាក់ ឈ្មោះ អេង សុខុម ស្លាប់ និងមនុស្ស៩នាក់រងរបួស។
ករណីបាញ់នៅស្ពានអាកាសក្បាលថ្នល់ នៅថ្ងៃទី១៥ ខែកញ្ញា ចំថ្ងៃធ្វើមហាបាតុកម្មរបស់គណបក្សសង្គ្រោះជាតិ បណ្តាលឲ្យបុរសម្នាក់ឈ្មោះ ម៉ៅ សុខចាន់ ស្លាប់ជាដើម ដែលអង្គការលីកាដូ រកឃើញថា ជនដែលបានប្រព្រឹត្តិបទល្មើលនោះ មិនត្រូវបានយកមកផ្តន្ទាទោសទេ ដែលកត្តាជំរុញឲ្យនិទណ្ឌភាពនៅតែបន្តកើតឡើងគួរឲ្យព្រួយបារម្ភ។
លីកាដូព្រួយបារម្ភថា ប្រសិនបើនិទណ្ឌភាពបែបនេះនៅតែបន្ត ទៅថ្ងៃអនាគត អាចបង្កឲ្យមានហិង្សាកាន់តែខ្លាំងឡើង។ របាយការណ៍បានដកស្រង់សម្តីនាយិកាអង្គកាលីកាដូ លោកស្រី ណាលី ពីឡូត មកចុះផ្សាយថា ប្រសិនបើរដ្ឋាភិបាលមិនដាក់ទោស អ្នកដែលប្រព្រឹត្តល្មើសទេ នោះ ការរំលោភសិទ្ធិមនុស្សដ៏ធ្ងន់ធ្ងរនៅតែបន្តកើតមាន ដោយសារអ្នកប្រព្រឹត្តល្មើស មិនភ័យខ្លាចនិងប្រព័ន្ធច្បាប់នៅកម្ពុជា។ លោកស្រីថា និទណ្ឌភាពបានកើនឡើងគួរឲ្យភ័យខ្លាច ហើយការកាត់ទោសវិញ គួរឲ្យអស់សំណើច ដូចជាករណីលោក ឈូក បណ្ឌិតជាដើម៕
No comments:
Post a Comment
yes