បំណែកសត្វកែះ ដែលឈ្មួញជួញដូរកន្លងមកហើយត្រូវសមត្ថកិច្ចចាប់បាន
រូបថត សហការី
អង្គការសម្ព័ន្ធសត្វព្រៃបានចេញផ្សាយស្ថិតិចាប់សត្វខុសច្បាប់ សម្រាប់រយៈពេល ៩ ខែដើមឆ្នាំនេះកាលពីថ្ងៃពុធ ដោយបានបង្ហាញថា ការជួញដូរសត្វព្រៃខុសច្បាប់នៅតែជាបញ្ហាចម្បងសម្រាប់ប្រទេស កម្ពុជា បើទោះជាមានការរីកចម្រើនខ្លះ ក្នុងរយៈពេល ១២ ឆ្នាំចុងក្រោយនេះក៏ដោយ។
យោងតាមស្ថិតិរបស់អង្គការសម្ព័ន្ធសត្វព្រៃ ក្រុមសង្គ្រោះសត្វព្រៃបន្ទាន់ជាគម្រោងដែលអនុវត្តដោយកងរាជអាវុធហត្ថ និងមន្រ្តីរដ្ឋបាលព្រៃឈើ បានរឹបអូសសត្វព្រៃរស់បានជាង ២ ពាន់ក្បាល ហើយសត្វងាប់ចំនួនជាង ២៣០០ ក្បាល គិតត្រឹមចុងខែ កញ្ញា ជាមួយគ្នានឹងការចាប់ខ្លួនអ្នកជួញដូរសត្វព្រៃបាន ១២៥ នាក់ទៀតផង។
ក្នុងរវាងឆ្នាំ ២០០១ ដែលជាឆ្នាំចាប់ផ្តើមក្រុមកាងារឆ្លើយតបសង្គ្រោះសត្វព្រៃបន្ទាន់ និងឆ្នាំ ២០១២ ក្រុមនេះបានធ្វើការរឹបអូសសត្វរស់ជាមធ្យម ៤៤០០ ក្បាលក្នុងមួយឆ្នាំ។
លោកស្រី Suwanna Gauntlett នាយកប្រតិបតិ្តនៅអង្គការសម្ព័ន្ធសត្វព្រៃ បានថ្លែងថា ខណៈដែលការរឹបអូសមានលំនឹងក្នុងប៉ុន្មានឆ្នាំចុងក្រោយនេះ ទីផ្សារងងឹតបានធ្វើឲ្យវាមានការពិបាកខ្លាំងឡើងក្នុងការវាស់វែងពីទំហំនៃការជួញដូរសត្វព្រៃ។
ខណៈពេលសត្វដែលធ្លាប់តែជួញដូរញឹកញាប់មិនសូវត្រូវបានធ្វើការរឹបអូសនាពេលថ្មីៗនេះ លោកស្រី Gauntlett បានថ្លែងថា គឺដោយសារមូលហេតុខុសប្រក្រតី។
លោកស្រី Gauntlett បាន បញ្ជាក់ថា៖ «ដំបូង យើងរឹបអូសសត្វបានច្រើន ដូចជា សត្វដំរី និងសត្វខ្លា។ កាលពី ៦ ឬ ៧ ឆ្នាំមុន សត្វទាំងនោះបាត់អស់។ ហើយបន្ទាប់ពីសត្វខ្លា និងដំរី គឺសត្វខ្លាឃ្មុំ»។
ទោះជាយ៉ាងណា លោកស្រីបានបន្តថា ពីរឆ្នាំចុងក្រោយនេះ ការរឹបអូសសត្វខ្លាឃ្មុំមានចំនួនធ្លាក់ចុះ ដោយសារតែចំនួនសត្វនេះបានធ្លាក់ចុះ។
ឥឡូវនេះសត្វដែលជួញដូរញឹកញាប់បំផុតមួយ គឺសត្វ ពង្រួល។ យោងតាមលោកស្រី Gauntlett បានឲ្យដឹងថា សាច់សត្វ ពង្រួល អាចលក់បាន ក្នុងតម្លៃ ៣០០ ដុល្លារក្នុងមួយគីឡូក្រាម ចំណែកស្បែកមួយគីឡូក្រាមដែលប្រើផ្សំថ្នាំបុរាណ អាចលក់បានប្រមាណជា ៣ ពាន់ដុល្លារអាមេរិក។
ប៉ុន្តែ លោកស្រីបន្តថា៖ «សត្វទាំងអស់គ្មានការលើកលែងទេ»។ ពួកវាកំពុងស្ថិតក្នុងគ្រោះថ្នាក់ដោយសារការបរបាញ់របស់ជនឱកាសនិយម។
លោកស្រីបន្តថា៖ «គេដាក់អន្ទាក់នៅក្នុងព្រៃ ៦០០ លើកហើយយើងបានចាត់ទុកថា ជាជញ្ជាំងមរណៈ ហើយគ្មានសត្វណាអាចរត់រួចនោះទេ។ ដូច្នេះ ពេលគេនិយាយថា កសិករទាំងនេះកំពុងធ្វើដើម្បីចិញ្ចឹមជីវិត ហើយគេសម្លាប់ជ្រូកព្រៃក៏ព្រោះតែជីវភាពគ្រួសារនោះវាមិនមែនជាការពិតទេ»៕
No comments:
Post a Comment
yes