អ្នកស្រីយ៉ោម បុប្ផា និងកូនប្រុស (រូបថត ញឹម សុខន)
អង្គការលើកលែងទោសអន្តរជាតិ(Amnesty International) ទាមទារឲ្យតុលាការកំពូលកម្ពុជា ដោះលែងសកម្មជនតវ៉ាដីធ្លីតំបន់បឹងកក់ អ្នកស្រី យ៉ោម បុប្ផា ខណៈតុលាការនឹងបើកសវនាការជំនុំជម្រះលើបណ្តឹងសាទុក្ខរបស់អ្នក ស្រី នៅថ្ងៃទី២២ ខែវិច្ឆិកានេះ។
លិខិតចុះថ្ងៃទី១៨ ខែវិច្ឆិកា របស់អនុប្រធានអង្គការលើកលែងទោសអន្តរជាតិ ប្រចាំតំបន់អាស៊ី ប៉ាស៊ីហ្វិក លោកស្រី Isabelle Arradon ចាត់ទុកអ្នកស្រី យ៉ោម បុប្ផា ជាអ្នកទោសមនសិការ ដែលត្រូវបានមួលបង្កាច់ពីបទល្មើសព្រហ្មទណ្ឌ ដែលតុលាការគប្បីដោះលែងជាបន្ទាន់ និងដោយគ្មានលក្ខខណ្ឌ។
សហគមន៍មានទំនាស់ដីធ្លីចំនួនបីនៅរាជធានីភ្នំពេញ គ្រោងដើរហែក្បួនជុំវិញតុលាការកំពូលនៅម៉ោង ៣រសៀល ថ្ងៃអង្គារនេះ ដើម្បីធ្វើពិធីរំដោះគ្រោះ និងបួងសួងឲ្យតុលាការដោះលែង អ្នកស្រីយ៉ោម បុប្ផា ។
តំណាងសហគមន៍បឹងកក់ អ្នកស្រី ទេព វន្នី ឲ្យដឹងថា សហគមន៍ រួមមានទាំងព្រះសង្ឃផងនោះ នឹងដើរជុំវិញតុលាការកំពូល៣ជុំ គឺអ្នកមានជម្លោះដីធ្លីស្លៀកពាក់ស ដើរដោះទ្រនាប់ជើង មានកាន់បាយសី សូត្រធម៌ ទូងស្គរផង។ អ្នកស្រីបន្តថា ពួកគាត់ធ្វើពិធីនេះ ក្នុងគោលបំណងបណ្តេញឧបទ្រពចេញពីអ្នកស្រី យ៉ោម បុប្ផា ដើម្បីឲ្យគាត់រួចផុតពីអំពើអយុតិ្តធម៌នេះ នឹងមកជួបជុំក្រុមគ្រួសារវិញ ៖ "បួងសួងមួយទៀត ដោយមានអាចារ្យសូត្រធម៌ ហើយនិងព្រះសង្ឃអីអញ្ចឹង ដើម្បីដាស់វិញ្ញាណក្ខន្ធរបស់បុព្វការីជន ដែលស្នេហានូវយុត្តិធម៌ហើយនិងស្រលាញ់ជាតិអីអញ្ចឹងទៅ ឲ្យគាត់ជួយពាំនាំនូវយុត្តិធម៌ ឲ្យបានជាដាច់ខាតនៅក្នុងថ្ងៃទី២២ហ្នឹង ឲ្យអ្នកស្រីយ៉ោម បុប្ផា រួចខ្លួន ហើយមានសេរីភាពនិងយុត្តិធម៌ឡើងវិញ"។
អ្នកស្រី យ៉ោម បុប្ផា ត្រូវបានសមត្ថកិច្ចចាប់ខ្លួន កាលថ្ងៃទី៤ ខែកញ្ញា ឆ្នាំ២០១២ ហើយត្រូវបានសាលាដំបូងរាជធានីភ្នំពេញ ផ្តន្ទាទោសឲ្យជាប់ពន្ធនាគារ៣ឆ្នាំ និងពិន័យជាប្រាក់សរុប៦០លានរៀល ចោទពីបទប្រើហិង្សាដោយចេតនា វាយអ្នករត់ម៉ូតូឌុបពីរនាក់ឲ្យរងរបួស។ ក្រោយមកសាលាឧទ្ទណ៍ប្តូរបទចោទអ្នកស្រីទៅជាបទផ្តួចផ្តើមឲ្យមាន ហិង្សាវិញ ក្រោយពីរកមិនឃើញកំហុស និងសម្រេចឲ្យទទួលទោស២ឆ្នាំ ដោយព្យួរទោសមួយឆ្នាំ និងពិន័យជាប្រាក់ ២០លានរៀល។
អនុប្រធានផ្នែកស៊ើបអង្កេតនៃសមាគមការពារសិទ្ធិមនុស្ស អាដហុក លោក ចាន់ សុវ៉េត យល់ថា ករណីនេះ ដោយសាររកមិនឃើញកំហុសរបស់ជនជាប់ចោទ តុលាការកំពូល អាចនឹងពិចារណាលើកលែងការចោទប្រកាន់ ឬដោះលែងអ្នកស្រី យ៉ោម បុប្ផា ឲ្យនៅក្រៅឃុំបណ្តោះអាសន្ន ដើម្បីស៊ើបអង្កេតទ្បើងវិញ ៖
កាលពីសប្តាហ៍មុន មន្ត្រីសាលារាជធានីភ្នំពេញ បានហៅគ្រួសារភាគីដើមបណ្តឹង និងចុងចោទចុះហត្ថលេខាលើលិខិតមួយ ដែលបានត្រៀមជាស្រេច គឺស្នើសុំអន្តរគមន៍ពីអភិបាលរាជធានីភ្នំពេញ លោក ប៉ា សុជាតិវង្ស ដើម្បីជួយបញ្ចប់រឿងក្តី និងជាថ្នូរនឹងការដោះលែងអ្នកស្រី យ៉ោម បុប្ផា។ ប៉ុន្តែ គ្រួសារជនជាប់ចោទ បដិសេធចោល ដោយចាត់ទុកថា ទង្វើនេះជាការដាក់បន្ទុកបន្ថែមលើអ្នកស្រី យ៉ោម បុប្ផា ដែលមិនមានកំហុសដូចការចោទប្រកាន់៕
No comments:
Post a Comment
yes