អគ្គលេខាធិការរងសហជីពសេរីកម្មករនៃព្រះរាជាណាចក្រកម្ពុជា លោក ថន ថុល ឲ្យដឹងថា កម្មកររោងចក្រកាត់ដេរ ឃីងហ្វឺស២(King First 2) ស្ថិតនៅតាមបណ្តោយផ្លូវជាតិលេខ៥១ ក្នុងឃុំត្រពាំងក្រសាំង ស្រុកអង្គស្នូល ខេត្តកណ្តាល ជាង៨០នាក់ បានដួលសន្លប់តៗគ្នា នៅព្រឹកថ្ងៃព្រហស្បតិ៍នេះ ដោយសារបរិយាកាសនៅក្នុងរោងចក្រមិនល្អ។
លោកឲ្យដឹងដែរថា ការដួលសន្លប់នេះទំនងក៏បណ្តាលមកពីកម្មករហួសកម្លាំងផងដែរ។ កម្មករត្រូវបាន បញ្ជូនទៅកាន់មន្ទីរពេទ្យព្យាបាល។ លោកថា កម្មកររោងចក្រកាត់ដេរឃីងហ្វឺស២ មានចំនួនប្រមាណជា ១០០០នាក់។ កាលពីថ្ងៃពុធម្សិលមិញ កម្មករមួយចំនួនបានក្អួតចង្អោរ និងរាករូស ដោយមិនដឹង មូលហេតុ។
ប្រធាននាយកដ្ឋានសុខភាពការងារនៃក្រសួងការងារ លោក ប៉ុក វ៉ាន់ថាត ដែលបានចុះទៅដល់ទីនោះ មានប្រសាសន៍ថា ការដួលសន្លប់បណ្តាលមកពីកត្តា ៣យ៉ាង។ ទីមួយ គឺលំហូរខ្យល់ចេញចូលមិនធ្វើតាមស្តង់ដារ ទីពីរការទុកដាក់សម្ភារៈមិនបានល្អ ឬគ្មានរបៀបនៅកន្លែងកម្មករធ្វើការ និងទីបីការបន្ថែមម៉ោងធ្វើការ។ លោកបន្តថា មន្ត្រីពាក់ព័ន្ធបានជួយអន្តរាគមន៍ ហើយប្រាប់ឲ្យកម្មករឈប់សម្រាករហូតដល់មានអាការៈធូរស្រាល។
លោកអះអាងថា លោកបានស្នើឲ្យថៅកែក្រុមហ៊ុនធ្វើយ៉ាងណាគិតគូរពីបញ្ហាសុខភាពកម្មករជាចម្បង ដើម្បីជៀសវាងបញ្ហានេះកើតឡើងទៀត៕
No comments:
Post a Comment
yes