កម្ពុជាបានចំណាត់ថ្នាក់ទាបជាងសាធារណរដ្ឋស៊ីរី (Syrian- Arab) នៅក្នុងសន្ទស្សន៍ចេញផ្សាយកាលពីថ្ងៃចន្ទដែលធ្វើការវាស់ស្ទង់លើភាពជិតស្និទ្ធរវាងរដ្ឋាភិបាលនិងប្រជាជនខ្លួន។
សន្ទស្សន៍ស្តីពី «ភាពជិតស្និទ្ធរបស់រដ្ឋាភិបាល» បានដាក់ចំណាត់ថ្នាក់លើ ប្រទេស ១៨២ ដោយផ្អែកលើការវាស់ស្ទង់អំពីអភិបាលកិច្ចមូលដ្ឋានចាប់តាំងពីទសវត្សរ៍ ៨០ ដោយបង្ហាញអំពីស្វយតភាពនយោបាយ សារពើពន្ធនិងរដ្ឋបាលនៃ «របបអភិបាលកិច្ចពហុបញ្ជា»។ នេះបើតាមឯកសាររបស់អ្នកនិពន្ធ Maksym Ivanyana ដែលជាអ្នកសេដ្ឋកិច្ចបេក្ខជនបណ្ឌិតនៅសាកលវិទ្យាល័យ Michigan និងអ្នកនិពន្ធ Anwar Shah នៅវិទ្យាស្ថាន Brookings។
លោក Shah និង Ivanyana បានសរុបទិន្នន័យបង្កើត «សន្ទស្សន៍វិមជ្ឈការ» បន្ទាប់មកធ្វើការសម្រួលតាមលំដាប់ថ្នាក់ប្រទេសដើម្បីបង្កើត «សន្ទស្សន៍ភាពជិតស្និទ្ធរបស់រដ្ឋាភិបាល» នេះ។
ទិន្នន័យដែលបានប្រើសម្រាប់ការដាក់ចំណាត់ថ្នាក់ប្រទេសទាំង ១៨២ នេះគឺត្រូវបានយកមកពីពាក់កណ្តាលទសវត្សរ៍ ទី២០ ដោយភាគច្រើនបំផុតពីឆ្នាំ ២០០៥។
កម្ពុជា ត្រូវបានដាក់ចំណាត់វិមជ្ឈការទាប នៅក្នុង «សន្ទស្សន៍ភាពជិតស្និទ្ធរបស់រដ្ឋាភិបាល» ទាបជាងប្រទេស ថៃ ដែលមានលំដាប់ថ្នាក់ ៣៨ វៀតណាម លំដាប់ថ្នាក់ ៦០ ឡាវ លំដាប់ថ្នាក់ ៧៨ ស្រីលង្កា ៩១ ប៉ុន្តែឈ្នះប្រទេស មីយ៉ាន់ម៉ា មានចំណាត់ថ្នាក់ ១៧៩។
លោក Shah និង Ivanyana បានបញ្ជាក់ថា កំណែទម្រង់វិមជ្ឈការរីករាលដាលយ៉ាងខ្លាំងក្នុងពិភពលោករយៈពេលបីទសវត្សរ៍ចុងក្រោយនេះ ដោយផ្តល់ការសម្រេចចិត្តរបស់រដ្ឋាភិបាលទៅថ្នាក់ក្រោមខ្លាំងជាងមុន។
ឯកសារស្រាវជ្រាវនេះដែលមានចំណងជើងថា៖ «តើរដ្ឋាភិបាលរបស់អ្នកជិតស្និទ្ធយ៉ាងម៉េចចំពោះប្រជាជន? សូចនាករទូទាំងពិភពលោកស្តីពីការទៅរកថ្នាក់មូលដ្ឋាននិង វិមជ្ឈការ» បានឲ្យដឹងទៀតថា៖ «លទ្ធផលនៃការដាក់ចំណាត់ថ្នាក់នេះអាចមានប្រយោជន៍នៅក្នុងការយល់ដឹងអំពីការចាប់ផ្តើមនៃបដិវត្តន៍ Arab Spring និងចលនានយោបាយដទៃៗទៀត រួមទាំងរលកនៃការមិនពេញចិត្តចំពោះអភិបាលកិច្ចនៅជុំវិញពិភពលោក»។
លោក ខៀវ សុភ័គ អ្នកនាំពាក្យក្រសួង មហាផ្ទៃ ចង្អុលបង្ហាញថា ខណៈមិនទាន់បានឃើញឯកសារនេះ ប្រជាជនកម្ពុជាផ្តោតការយកចិត្តទុកដាក់ចំពោះរដ្ឋាភិបាល របស់ខ្លួនជាងកាលពីពេលមុន។ លោកថ្លែងថា៖ «យើងយល់ថា ស្ថិរភាពនៃរដ្ឋាភិបាលនេះគឺខ្លាំង ហើយយើងបាននិងកំពុងធ្វើការជាប្រចាំដើម្បីឲ្យការភ្ជាប់ទំនាក់ទំនងនឹងប្រជាជនបានប្រសើរឡើង»។ លោកថា ការភ្ជាប់ទំនាក់ទំនងរវាងរដ្ឋាភិបាលទៅប្រជាជនអាចមើលឃើញក្នុងសមត្ថភាពប្រជាជន ដែលរៀបចំនៅកម្រិតថ្នាក់មូលដ្ឋានជាឫសគល់។
អ្នកនាំពាក្យគណបក្សសង្គ្រោះជាតិ មិនអាចទាក់ទងបានទេពីម្សិលមិញ៕
No comments:
Post a Comment
yes