កម្មកររោងចក្រSLនៅតែបន្តធ្វើបាតុកម្មព្រោះតែគ្មានដំណោះស្រាយ
ក្រុមកម្មកររាប់រយនាក់ នៅរោងចក្រ SL នឹងបន្តប្រមូលផ្តុំ ធ្វើកូដកម្មឡើងវិញ នៅថ្ងៃទី២០វិច្ឆិកា។ ជាការប្រមូលផ្តុំតវ៉ា ក្រោយពីមានសេចក្តីសម្រេចរបស់រដ្ឋាភិបាល ដែលតម្រូវឲ្យថៅកែរោងចក្រ ទទួលយកដំណោះស្រាយបញ្ចប់ជម្លោះដ៏រ៉ាំរ៉ៃជាង ៣ ខែមកហើយ។ ប៉ុន្តែ សេចក្តីសម្រេចរបស់រដ្ឋាភិបាល កាលពីថ្ងៃទី១៥វិច្ឆិកា មិនទាន់បានប្រជុំរួម ដើម្បីអនុវត្តនៅឡើយទេ។
បន្ទាប់ពីឈប់សម្រាកបុណ្យអុំទូករយៈពេល ៤ ថ្ងៃ គិតចាប់ពីថ្ងៃសៅរ៍ទី១៦វិច្ឆិកា គឺនៅថ្ងៃទី២០ វិច្ឆិកា ក្រុមកម្មករប្រមាណ ៣០០០ នាក់ នឹងបន្តការប្រមូលផ្តុំ ធ្វើកូដកម្មតវ៉ាឡើងវិញ នៅមុខរោង ចក្រ SL ស្ថិតនៅផ្លូវលេខ ៣៧១ ក្នុងសង្កាត់បឹងទំពន់ ខណ្ឌមានជ័យ រាជធានីភ្នំពេញ។
ការប្រមូលផ្តុំ តវ៉ាមិនចូលធ្វើការរបស់កម្មករ នៅថ្ងៃទី២០វិច្ឆិកាស្អែកនេះ ដោយសារតែក្រុមហ៊ុន មិន ទាន់អនុវត្តតាមសេចក្តីសម្រេចរបស់រដ្ឋាភិបាល ដើម្បីឈានទៅបញ្ចប់ជម្លោះនៅរោងចក្រ SL ជាង ៣ ខែមកហើយ។ សេចក្តីសម្រេចរបស់គណៈរដ្ឋមន្ត្រី កាលពីថ្ងៃទី១៥វិច្ឆិកា បានតម្រូវឲ្យថៅ កែរោងចក្រ SL ដកលោក មាស សត្ថា ចេញពីរោងចក្រ ការព្រមព្រៀងបើកប្រាក់ខែ ៥០ភាគរយឲ្យកម្មករ ក្នុងរយៈពេលធ្វើកូដកម្មជាង ៣ ខែមកនេះ ព្រមទាំងការតម្រូវឲ្យថៅកែរោងចក្រ ទទួលយកតំណាងកម្មករទាំង ១៩ នាក់ អោយចូលធ្វើការឡើងវិញ។ នេះបើតាមការបញ្ជាក់របស់លោក តេង រី តំណាងកម្មករ។
លោក តេង រី ស្ថិតក្នុងចំណោមតំណាងកម្មករ ទាំង១៩នាក់ ដែលត្រូវបានរោងចក្រ បណ្តេញចេញ បានជំរុញឲ្យក្រសួងការងារកោះប្រជុំជាបន្ទាន់មួយ រវាងថៅកែរោងចក្រ និងតំណាងកម្មករ ដើម្បីអនុវត្តនូវសេចក្តីសម្រេចរបស់រដ្ឋាភិបាល ឈានទៅបញ្ចប់ជម្លោះតវ៉ា។ តាមតំណាងកម្មករ បើសិនជាថៅកែរោងចក្រ SL ព្រមព្រៀងទទួលយកតំណាងកម្មករ ទាំង១៩នាក់ ឲ្យចូលធ្វើការឡើងវិញ នោះបញ្ហានឹងត្រូវបញ្ចប់។
យ៉ាងណាក៏ដោយ លោក ប្រាក់ ចាន់ធឿន អគ្គលេខាធិការនៃគណៈកម្មការដោះស្រាយបញ្ហាកូដកម្ម និងបាតុកម្មគ្រប់មុខសញ្ញារបស់ក្រសួងការងារ បានសន្យាថា បន្ទាប់ពីឈប់សម្រាកបុណ្យអុំទូក គឺនៅថ្ងៃទី២០វិច្ឆិកា ក្រុមការងារក្រសួងនឹងចុះទៅកាន់រោងចក្រ SL ហើយនឹងកោះប្រជុំ អនុវត្តនូវសេចក្តីសម្រេចរបស់ទីស្តីការគណៈរដ្ឋមន្ត្រី ដើម្បីបញ្ចប់ជម្លោះតវ៉ា៕
No comments:
Post a Comment
yes