របាយការណ៍របស់មូលនិធិពិភពលោកដែលចេញផ្សាយពីអំពើពុករលួយ
របាយការណ៍ពុករលួយមួយត្រូវបានផ្សព្វផ្សាយនិងបានធ្វើឲ្យរញ្ជួយប្រទេសកម្ពុជាជាថ្មីម្តងទៀត។ នោះគឺរបាយការណ៍របស់មូលនិធិពិភពលោក (Global Fund) ដែលបានស៊ើបអង្កេតរកឃើញអំពើពុករលួយនៅក្នុងប្រព័ន្ធសុខាភិបាលកម្ពុជា។ មន្ត្រីសុខាភិបាលជាច្រើននាក់ ត្រូវបានគេរកឃើញថាជាប់ពាក់ព័ន្ធនឹងការទទួលសំណូកពីក្រុមហ៊ុនបរទេសជាថ្នូរនឹងការទទួលបានកិច្ចសន្យាផ្គត់ផ្គង់សម្ភារៈផ្សេងៗទាក់ទងនឹងការអនុវត្តគម្រោង។ តែគ្មានអ្នកណាចេញមុខទទួលខុសត្រូវបញ្ហានេះទេ។
ហូតមកទល់ថ្ងៃនេះនៅមិនទាន់មានការបកស្រាយណាមួយឲ្យបានច្បាស់លាស់តបទៅនឹងរបាយការណ៍របស់មូលនិធិពិភពលោកដែលបានរកឃើញអំពើពុករលួយនៅក្នុងប្រព័ន្ធសុខាភិបាលកម្ពុជានៅឡើយទេ។
មូលនិធិពិភពលោក (Global Fund) ដែលជាអ្នកផ្តល់ថវិកាយ៉ាងច្រើនសន្ធឹកសន្ធាប់ដល់ផ្នែកសុខាភិបាលកម្ពុជាបានបើកការស៊ើបអង្កេតមួយដោយរកឃើញថា មន្ត្រីសុខាភិបាលកម្ពុជាយ៉ាងហោចណាស់៣នាក់បានទទួលសំណូកនិងអំណោយជាប្រាក់ជិតកន្លះលានដុល្លារពីក្រុមហ៊ុនបរទេសជាថ្នូរនឹងការទទួលបានកិច្ចសន្យាផ្គត់ផ្គង់សម្ភារៈ។
របាយការណ៍ស៊ើបអង្កេតបាននិយាយចំៗថា អតីតប្រធានមជ្ឈមណ្ឌលជាតិប្រយុទ្ធប្រឆាំងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រដែលគេស្គាល់ថាជាលោក ឌួង សុជាតិ និងមន្ត្រីថ្នាក់ក្រោមរបស់លោកម្នាក់រួមទាំងមន្ត្រីម្នាក់ទៀតនៃមជ្ឈមណ្ឌលជាតិប្រយុទ្ធប្រឆាំងជំងឺជំងឺអេដស៍ សើស្បែក និងកាមរោគដែលទទួលបន្ទុកជាអ្នកសម្របសម្រួលថ្លៃ ត្រូវបានគេរកឃើញថាជាប់ពាក់ព័ន្ធនឹងអំពើពុករលួយក្នុងការប្រើប្រាស់ថវិការបស់មូលនិធិពិភពលោក។
របាយការណ៍ជាភាសាអង់គ្លេសដែលមានកម្រាស់ ៨៣ ទំព័រនិងដែលត្រូវបានផ្សព្វផ្សាយកាលពីថ្ងៃទី១៤ វិច្ឆិកា បានរកឃើញថា មន្ត្រីទាំងនោះបានទទួលប្រាក់សំណូក និងអំណោយជាង ៤០ ម៉ឺនដុល្លារពីក្រុមហ៊ុនផ្គត់ផ្គង់មុងឈ្មោះ វេសតើហ្គាត ហ្វ្រេនសិន (Vestergaard Frandsen) ដែលមានទីតាំងនៅប្រទេសស្វីស និងក្រុមហ៊ុនសាំមិតូ ឆឺមីខល (Sumitomo Chemical Singapore) ដែលមានទីតាំងនៅប្រទេសសិង្ហបុរី។ ក្រុមហ៊ុនទាំងពីរបានផ្តល់ប្រាក់សគុណនេះ ជាថ្នូរនឹងការទទួលបានកិច្ចសន្យាប្រតិបត្តិការពីក្រសួងសុខាភិបាល។
នេះគឺជាសំណុំរឿងអាស្រូវពុករលួយដ៏ធំមួយទៀតដែលធ្វើឲ្យម្ចាស់ជំនួយខកចិត្តនិងបានធ្វើឲ្យប៉ះពាល់យ៉ាងខ្លាំងដល់កេរិ៍ឈ្មោះរបស់ប្រទេសកម្ពុជា។ ទាំងមន្ត្រីដែលត្រូវបានចោទប្រកាន់ថាបានប្រព្រឹត្តអំពើពុករលួយ ទាំងមន្ត្រីសុខាភិបាលផ្សេងទៀតមិនអាចទាក់ទងសុំការបំភ្លឺបានទេ។ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានបកស្រាយប្រាប់កាសែតក្នុងស្រុកថា ក្រសួងរបស់លោកគ្មានពាក់ព័ន្ធនឹងបញ្ហានេះទេដោយសារតែមូលនិធិពិភពលោកមិនមែនស្ថិតក្រោមការគ្រប់គ្រងផ្ទាល់ពីក្រសួងសុខាភិបាលឡើយ៕
No comments:
Post a Comment
yes