ថ្នាក់ដឹកនាំគណបក្សសង្គ្រោះជាតិ នៅថ្ងៃមហាបាតុកម្មនាពេលកន្លងមក
(រូបថត តាំង វីដា)
សាលារាជធានីភ្នំពេញ អញ្ជើញប្រធាន និងអនុប្រធានគណបក្សសង្គ្រោះជាតិ ប្រជុំនៅថ្ងៃទី២១ខែធ្នូ ស្អែកនេះ ជុំវិញការគ្រប់គ្រងបាតុកម្មនៅទីលានប្រជាធិបតេយ្យ និងការដង្ហែក្បួនបាតុកម្មដោយសន្តិវិធីរបស់គណបក្សនេះ ដើម្បីពង្រឹងសន្តិសុខ សណ្តាប់ធ្នាប់សាធារណៈ។
នៅក្នុងលិខិតរបស់សាលារាជធានីភ្នំពេញ ផ្ញើជូនលោក សម រង្ស៊ី ប្រធានគណបក្សសង្គ្រោះជាតិ នៅថ្ងៃទី២០ ខែធ្នូ ឆ្នាំ២០១៣នេះ ឲ្យដឹងថា ការរៀបចំសំដែងមតិដែលដឹកនាំដោយគណបក្សសង្គ្រោះជាតិ ក្នុងរយៈពេល ៥ថ្ងៃកន្លងមកនេះ នៅមានប្រការមិនប្រក្រតីមួយចំនួន ដែលចាំបាច់ត្រូវកែលម្អបន្ទាន់ ដូចជា បញ្ហាបរិស្ថានអនាម័យនៅទីលានប្រជាធិបតេយ្យនិងសួនច្បារសាធារណៈ ការងារសន្តិសុខនិងសណ្តាប់ធ្នាប់ចរាចរណ៍តាមផ្លូវ ការគ្រប់គ្រងកម្លាំងអ្នកចូលរួមបាតុកម្ម និងការសម្តែងមតិប្រើពាក្យសម្តីប៉ះពាល់ដល់សិទ្ធបុគ្គលយ៉ាងធ្ងន់ធ្ងរ ដែលជាការប្រមាថមួយប្រាសចាកពីព្រំដែននៃសិទ្ធិបញ្ចេញមតិដែលមានចែង ក្នុងច្បាប់។
លិខិតដដែល បន្តដោយអញ្ជើញថ្នាក់ដឹកនាំគណបក្សសង្គ្រោះជាតិទាំងពីររូប គឺលោក សម រង្ស៊ី និងលោក កឹម សុខា ប្រធាននិងអនុប្រធានគណបក្សសង្គ្រោះជាតិ ជួបប្រជុំពិភាក្សាជាមួយលោក ប៉ា សុជាតិវង្ស អភិបាលរាជធានីភ្នំពេញ នៅថ្ងៃសៅរ៍ ទី២១ ខែធ្នូ ឆ្នាំ២០១៣ វេលាម៉ោង ៩ព្រឹក នៅសាលារាជធានីភ្នំពេញ ដើម្បីពង្រឹងកិច្ចសហការរវាងរដ្ឋបាលរាជធានីភ្នំពេញ និងគណបក្សសង្គ្រោះជាតិ ក្នុងការធានាសន្តិសុខ សណ្តាប់ធ្នាប់សាធារណៈ ស្របទៅតាមច្បាប់ស្តីពីការធ្វើបាតុកម្មដោយសន្តិវិធី។
គណបក្សសង្គ្រោះជាតិ បានធ្វើមហាបាតុកម្មអហិង្សានៅទីលានប្រជាធិបតេយ្យ រយៈពេល៥ថ្ងៃមកហើយ គិតត្រឹមថ្ងៃសុក្រ ទី២០ ខែធ្នូនេះ ដោយបានដង្ហែក្បួនទៅកាន់តំបន់នានាក្នុងរាជធានីភ្នំពេញ ដើម្បីទាម ទារឲ្យមានការបោះឆ្នោតឡើងវិញ និងជំរុញឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង។ តែទោះជាយ៉ាងណា លោកនាយករដ្ឋមន្ត្រី ហ៊ុន សែន បានបដិសេធការទាមទារនេះ ដោយលោកថា ការបោះឆ្នោតឡើងវិញ មិនអាចធ្វើទៅបានទេ ព្រោះសភាបច្ចុប្បន្នមិនត្រូវបានរំលាយ ដូចមានចែងក្នុងរដ្ឋធម្មនុញ្ញ៕
No comments:
Post a Comment
yes