មេធាវីការពារសិទ្ធិ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ស្នើសុំសាលាដំបូងរាជធានីភ្នំពេញ កោះហៅដើមបណ្តឹងរដ្ឋប្បវេណី ឆ្លើយបំភ្លឺតទល់ជាមួយលោក វន់ ពៅ ដើម្បីបញ្ចប់ពិរុទ្ធភាពកូនក្តីខ្លួន។
ពាក្យស្នើសុំឲ្យបំពេញកិច្ច ចុះថ្ងៃទី៣១ ខែមករា ឆ្នាំ២០១៤ ចុះហត្ថលេខាដោយមេធាវីប្រចាំសហភាពការងារកម្ពុជា (CLC) លោក គីម សុជាតិ ផ្ញើជូនចៅក្រមស៊ើបសួរសាលាដំបូងរាជធានីភ្នំពេញ ស្នើកោះហៅ ឈ្មោះ JAE JUNG KIM នាយកក្រុមហ៊ុន យ៉ាក ជីន (ខេមបូឌា) អ៊ីន ឈ្មោះ ម៉ាន់ ជីហេង ឈ្មោះ រស់ វិចិត្រ និង អ៊ុង រតនា ដើមបណ្តឹងរដ្ឋប្បវេណី ឆ្លើយបំភ្លឺតទល់ជាមួយជាមួយ ជនត្រូវចោទ លោក វន់ ពៅ ដើម្បីបញ្ជាក់ថា តើនៅថ្ងៃកើតហេតុថ្ងៃទី២ ខែមករា ក្រុមហ៊ុន ឬជនរងគ្រោះទាំង៣នាក់ មានរងគ្រោះ ឬខូចខាតអ្វីខ្លះ? តើការរងគ្រោះ ឬការខូចខាតនោះ ដោយសារអ្នកណា? ដោយសារលោក វន់ ពៅ ប្រើហិង្សាលើ ឬយ៉ាងណា?
លោក គីម សុជាតិ ឲ្យដឹងថា ការស្នើសុំនោះ ធ្វើឡើងដោយសារការពិនិត្យមើលចម្លើយរបស់ដើមបណ្តឹងរដ្ឋប្បវេណីទាំងអស់ គ្មានចម្លើយណាមួយ ដែលបានបញ្ជាក់ថា ជនត្រូវចោទ លោក វន់ ពៅ បានប្រព្រឹត្តហិង្សា ឬធ្វើឲ្យខូចខាតដោយចេតនានោះទេ ហើយចម្លើយនោះ ក៏ស៊ីសង្វាក់ជាមួយនឹងចម្លើយជនត្រូវចោទ ដែលបង្ហាញថា ខ្លួនមិនបានប្រព្រឹត្តដូចការចោទប្រកាន់របស់តុលាការ។
លោកមេធាវី គីម សុជាតិ ឲ្យដឹងដែរថា នាយកក្រុមហ៊ុន យ៉ាក ជីន (ខេមបូឌា) អ៊ីន បានសម្រេចដកបណ្តឹងរដ្ឋប្បវេណី លើលោក វន់ ពៅ កាលពីសប្តាហ៍មុន បន្ទាប់ពីត្រូវបានអ្នកបញ្ជាទិញរបស់ខ្លួន ដាក់សម្ពាធ។
ចៅក្រមស៊ើបសួរសាលាដំបូងរាជធានីភ្នំពេញ លោកស្រី សែម សក្តិកូឡា ដែលកាន់សំណុំរឿងនេះ បដិសេធអត្ថាធិប្បាយ ដោយថា ជាប់រវល់។
មន្ត្រីស៊ើបអង្កេតជាន់ខ្ពស់នៃអង្គការលីកាដូ លោក អំ សំអាត ដែលតាមដានករណីនេះ យល់ថា ការចូលបំភ្លឺតទល់រវាងភាគីដើមបណ្តឹង និងជនត្រូវចោទ ជាសិទ្ធិមូលដ្ឋានរបស់ជនត្រូវចោទ ដែលត្រូវទទួលបានតាមច្បាប់ ក្នុងលក្ខខណ្ឌដែលអាចផ្តល់ផលប្រយោជន៍ដល់ខ្លួន។ លោកថា ករណីនេះ បើតុលាការមិនអនុញ្ញាត គឺនាំឲ្យដំណើរការស្វែងរកយុត្តិធម៌ មានភាពខ្វះចន្លោះ។
ក្នុងហេតុការណ៍ប៉ះទង្គិចគ្នារវាងសមត្ថកិច្ច និងកម្មករ កាលពីថ្ងៃទី២ ខែមករា នៅតំបន់សេដ្ឋកិច្ចពិសេសភ្នំពេញ ខាងមុខរោងចក្រយ៉ាកជីង មនុស្ស១០នាក់ ក្នុងនោះ មានលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ត្រូវបានសមត្ថកិច្ចចាប់ខ្លួន ដោយចោទប្រកាន់ពីបទហិង្សាដោយចេតនា និងបំផ្លិចបំផ្លាញទ្រព្យសម្បត្តិអ្នកដទៃ។ ចំណែកថ្ងៃទី៣ ខែមករា ការប៉ះទង្គិចដូចគ្នា នៅមុខសួនឧស្សាហកម្មកាណាឌីយ៉ា បានបណ្តាលឲ្យកម្មករ៥នាក់ស្លាប់ ១៣នាក់ទៀត ត្រូវបានចាប់ខ្លួនទៅឃុំនៅមណ្ឌលអប់រំកែប្រែម៣ ក្នុងខេត្តកំពង់ចាម។ ក្រោយពីសាលាដំបូង បានបដិសេធសំណើសុំកូនក្តី ឲ្យនៅក្រៅឃុំ ក្រុមមេធាវីការពារក្តី ជនទាំង២៣នេះ ធ្លាប់ឲ្យដឹងថា សាលាឧទ្ធរណ៍ អាចនឹងបើកសវនាការលើសំណុំរឿងសុំក្រៅឃុំ នៅថ្ងៃទី១១ខែកុម្ភៈ ខាងមុខនេះ៕
No comments:
Post a Comment
yes