លោក នាង សុឃុន យុវជនសម្ព័ន្ធកូនខ្មែរអ្នកស្នេហាជាតិ (រូបថត៖ តាំង វីដា)
យុវជនម្នាក់ មកពីសម្ព័ន្ធកូនខ្មែរអ្នកស្នេហាជាតិ លោក នាង សុឃុន នៅព្រឹកថ្ងៃព្រហស្បតិ៍នេះ នឹងចូលបំភ្លឺ ជុំវិញបណ្តឹងរបស់លោក ដែលប្តឹងលោក ហ៊ុន សែន ពាក់ព័ន្ធនឹងបទល្មើសកាត់ទឹកដីកោះត្រល់ និងកោះក្រចកសេះ ឲ្យវៀតណាម។
លោក មាស ច័ន្ទពិសិដ្ឋ ព្រះរាជអាជ្ញារង សម្រេចកោះហៅរូបលោក ឲ្យចូលបំភ្លឺពីដំណើររឿងបណ្តឹងរបស់ខ្លួន នៅអយ្យការអមសាលាដំបូងរាជធានីភ្នំពេញ នៅថ្ងៃទី២៧ ខែកុម្ភៈ ឆ្នាំ២០១៤នេះ វេលាម៉ោង៩ព្រឹក។
លោក នាង សុឃុន មានប្រសាសន៍ថា លោកមានឯកសារមួយច្បាប់ទាក់ទងនឹងកិច្ចព្រមព្រៀងទីក្រុងប៉ារីស ត្រង់មាត្រា១និង៤ ដែលលើកឡើងពីការលុបចោលកិច្ចព្រមព្រៀងទាំងឡាយណា ដែលមិនមានប្រយោជន៍ដល់ពលរដ្ឋ និងប្រទេសជាតិ។ លោកអះអាងដោយមានជំនឿចិត្តថា បើបណ្តឹងនេះ ដំណើរការត្រឹមត្រូវនោះ ជនល្មើសនឹងត្រូវផ្តនា្ទទោសតាមច្បាប់ ហើយកោះត្រល់ និងកោះក្រចកសេះ នឹងត្រូវប្រគល់មកកម្ពុជា តាមយន្តការអន្តរជាតិ។
កន្លងមកមន្ត្រីរដ្ឋាភិបាល ធ្លាប់អះអាងឆ្លើយតប ទៅនឹងបណ្តឹងរបស់យុវជនរូបនេះ ជាបណ្តឹងដែលគ្មានមូលដ្ឋានច្បាប់ ធ្វើឡើងដោយមិនពិចារណា និងមិនយល់ច្បាស់ពីប្រវត្តិសាស្ត្រកម្ពុជា។
ពាក់ព័ន្ធនឹងកោះ ត្រល់នេះ កាលពីថ្ងៃទី០៩ ខែសីហា ឆ្នាំ២០១២ លោកនាយករដ្ឋមន្ត្រី ហ៊ុន សែន បានចូលបំភ្លឺក្នុងរដ្ឋសភាថា ការបាត់បង់កោះត្រល់ គឺបាត់តាំងពីឆ្នាំ១៩៣៩មកម្ល៉េះ នៅពេលដែលកម្ពុជានៅក្រោមអាណានិគមបារាំង ហើយត្រូវបានលោក Previe(ប្រេវីយេ) ជនជាតិបារាំងជាអ្នកគ្រប់គ្រងនៅតំបន់ឥណ្ឌូចិន បានកាត់កោះនោះឲ្យវៀតណាម។ លោកនាយករដ្ឋមន្ត្រី ក៏បានបន្ថែមថា អតីត ព្រះ មហាក្សត្រ ដែលជាអ្នកដឹកនាំប្រទេសនៅពេលនោះក៏ទទួលស្គាល់ថា កោះត្រល់ត្រូវបានប្រគល់ឲ្យវៀត ណាមដែរ ហើយលោកនាយករដ្ឋមន្ត្រីថា ប្រសិនបើនរណាចង់ដណ្តើមយកកោះត្រល់វិញទៅដណ្តើមខ្លួនឯងចុះ លោកមិនចូលរួមទេ៕
No comments:
Post a Comment
yes