សាលារាជធានីភ្នំពេញ នៅថ្ងៃអង្គារស្អែកនេះ នឹងជួបជាមួយក្រុមអង្គការសង្គមស៊ីវិល ចំនួន១៧ដែលធ្វើការពាក់ព័ន្ធ ផ្នែកសិទ្ធិមនុស្ស និងសិទ្ធិដីធ្លី ដើម្បីពិភាក្សារកដំណោះស្រាយរឿងវិវាទដីធ្លីអូសបន្លាយ នៅសហគមន៍បុរីកីឡា។
តំណាងអ្នកភូមិបុរីកីឡា អ្នកស្រី ឆាយ គឹមហ៊ន អះអាងប្រាប់អ្នកសារព័ត៌មាន ក្រោយជួបមន្ត្រីសាលារាជធានីភ្នំពេញ នាព្រឹកថ្ងៃចន្ទនេះថា រដ្ឋបាលសាលារាជធានីភ្នំពេញ បានផ្ញើលិខិត ចំនួន១៧ កោះអញ្ជើញ មន្ត្រីសង្គមស៊ីវិល ដើម្បីពិភាក្សា នៅម៉ោង៣រសៀល ថ្ងៃទី២៨ ខែមេសាស្អែកនេះ នៅសាលារាជធានីភ្នំពេញដើម្បីស្វែងយល់ពីទស្សនៈសង្គមស៊ីវិលជុំវិញជម្លោះដីធ្លី នៅសហគមន៍បុរីកីឡា។
ស្ត្រីរូបនោះបន្តថា អង្គការដែលសាលារាជធានី អញ្ជើញឲ្យចូលរួមនោះមាន អង្គការលីកាដូ សមាគមការពារសិទ្ធិមនុស្សអាដហុក អង្គការសិទ្ធិលំនៅឋាន អង្គការធាងត្នោត និងមជ្ឈមណ្ឌលអប់រំច្បាប់សម្រាប់សហគមន៍ជាដើម។
អ្នកស្រី ឆាយ គឹមហ៊ន បន្តថា សាលារាជធានីឲ្យដឹងដែរថា ក្រោយពីជួបជាមួយអង្គការសង្គមស៊ីវិល សាលារាជធានី នឹងកោះអញ្ជើញភាគីតំណាងក្រុមហ៊ុនផានអ៊ីមិចមកពិភាក្សាបន្ត មុនបើកវេទិការសាធារណៈ។
មន្ត្រីឃ្លាំមើលការរំលោភសិទ្ធិមនុស្ស នៅអង្គការលីកាដូ លោក អំ សំអាត អះអាងថា លោកមិនទាន់ទទួលបានលិខិតអញ្ជើញនោះនៅឡើយទេ។ ប៉ុន្តែលោកយល់ថា បើសាលារាជធានីមានវិធានការបែបនេះមែន នោះជនរងគ្រោះនឹងអាចទទួលបានយុត្តិធម៌ ពីការបណ្តេញចេញ។
កាលពីដើមឆ្នាំ២០១២សហគមន៍បុរីកីឡា បានដាក់ពាក្យប្តឹងក្រុមហ៊ុន ផានអ៊ីមិច ពីបទឧក្រិដ្ឋទាក់ទិននឹងការបញ្ជាឲ្យប្រើគ្រឿងចក្រ និងកម្លាំងប្រដាប់អាវុធ រាប់រយនាក់បណ្តេញពួកគេចេញទាំងបង្ខំឲ្យទៅនៅជាយក្រុង ដោយផ្តល់សំណងតិចតួច។
ចាប់ពីពេលនោះមកអ្នករងគ្រោះ នៅសហគមន៍បុរីកីឡា ដែលមិនព្រមចាកចេញ បានចេញតវ៉ា ទាមទារសំណងរហូតសព្វថ្ងៃនេះ ដោយជំរុញឲ្យក្រុមហ៊ុនសង់អាគារចំនួន១០តាមកិច្ចសន្យា ខណៈក្រុមហ៊ុនសង់បានតែ៨អាគារ ក៏ចាប់ផ្តើមបណ្តេញប្រជាពលរដ្ឋចេញ។
អ្នករងគ្រោះអះអាងថា ពួកគេជាង១០០គ្រួសារ អស់ផ្ទះសម្បែង កំពុងបោះតង់បណ្តោះអាសន្ននៅលើគំនរសំរាម ដើម្បីត្រៀមចេញតវ៉ាទាមទារសំណង ប្រឆាំងនឹងការបណ្តេញចេញនេះ៕
No comments:
Post a Comment
yes