យាយខ្លី កាលមិនទាន់សង្គ្រោះបន្ទាន់
មកទល់នឹងថ្ងៃច័ន្ទទី២៨ មេសានេះ អុ្នកស្រី នេត្រ ផល្លី ហៅយាយខ្លី កំពុងស្ថិតក្នុងបន្ទប់សង្គ្រោះបន្ទាន់នៅឡើយទេ ក្រោយពីចូលសម្រាកនៅមន្ទីរពេទ្យកាលម៉ែត្រប្រមាណជាង២០ថ្ងៃ។ កូនអ្នកស្រីប្រាប់ថា អ្នកស្រីសង្ឃឹមតិចណាស់ សម្រាប់លទ្ធផលចុងក្រោយនេះ។
អ្នកស្រីរ៉ុម វ័យ៣៤ឆ្នាំ ជាកូនទី៤ របស់យាយខ្លីប្រាប់កាលពីល្ងាចថ្ងៃអាទិត្យទី២៧ មេសា ថា រយៈពេលជាង២០ថ្ងៃនៅក្នុងមន្ទីរពេទ្យកាល់ម៉ែត្រ មិនមានសភាពធូរស្រាលនោះទេ ពោលគឺកាន់តែធ្ងន់ធ្ងរ និងធ្លាក់ដល់ដង្ហើមចង្រិតធ្វើឲ្យកូនៗភ័យអស់ព្រលឹងម្ដងៗ។ ជាក់ស្ដែងក្រោយ បញ្ចូនទៅក្នុងបន្ទប់សង្គ្រោះបន្ទាប់កាលពីល្ងាចថ្ងៃទី២៥ មេសា អ្នកស្រីនៅតែស្ថិតក្នុងសភាព ដែលពិបាកសង្ឃឹម។ ហេតុដែលនាំឲ្យអ្នកស្រីខ្លី ឈានដល់ដំណាក់កាលនេះ គឺបណ្ដាលមកពីអ្នកស្រីចាប់ផ្ដើមឡេសឡះ ហូបបាយលែងបាន ហើយគិតតែស្រែកឈឺសព្វខ្លួនប្រាណ ក្នុងពេលដែលអ្នកស្រីហូបអ្វីក៏ស្ទើរតែលែងបាន និងពឹងទាំងស្រុងលើអុកស៊ីសែន និងថ្នាំស៊ីរ៉ូម។ ក្នុងមួយថ្ងៃអ្នកស្រីពិសារបបរបានតែមួយកូនចានប៉ុណ្ណោះ និងស្ថិតក្នុងសភាពចាក់ថ្នាំឲ្យសន្លប់ស្ដូកស្ដឹងច្រើនជាង ដើម្បីកុំឲ្យអ្នកស្រីដឹងខ្លួន ហើយស្រែកឈឺ។
អ្នកស្រីរ៉ុម ជាអ្នកមើលថែ ឲ្យដឹងថា យាយខ្លី មិនអាចកំរើកបានឡើយ ដោយសារតែសភាពនៃឆ្អឹងពុកនៅត្រង់ត្រកៀក
និងនៅបរិវេណផ្សេងនោះ មានសភាពពុកផុយខ្លាំង។ ឆ្អឹងដែលបានពុកនោះ បានបង្កឲ្យលោកយាយឈឺចាប់ ដោយសូម្បីតែមិនអាចកម្រើកបាន ពិសេសនៅពេលមានមនុស្សទៅប៉ះខ្លួនប្រាណអ្នកស្រី ឬទៅរង្គើរ គឺរឹតតែធ្វើឲ្យអ្នកស្រីស្រែករោទិ៍ដូចត្រូវគេវាយ។ ក្រុមគ្រូពេទ្យបានទាមទារឲ្យមានការវះកាត់ ប៉ុន្តែដោយសារពិនិត្យឃើញថា ជំងឺទឹកនោមផ្អែមរបស់អ្នកស្រី នឹងមិនអាចឲ្យមុខរបួសដែលវះជាសះបាន ទើបក្រុមគ្រូពេទ្យដំអក់ ហើយមិនដឹងថាត្រូវជួយសង្គ្រោះអ្នកស្រីពាក់ព័ន្ធនឹងបញ្ហាឆ្អឹងពុកនេះ ដោយពិធីណា។
អ្នកស្រីសារ៉ុម បញ្ជាក់ថា លោកយាយខ្លី វង្វេងវង្វាន់ច្រើនជាងចងចាំ ព្រោះថ្នាំស្ពឹកដែលបំបាត់ការឈឺចាប់ព្រោះតែបញ្ហាឆ្អឹងពុកនោះ ភាគច្រើនបានធ្វើឲ្យអ្នកស្រីសន្លប់ស្ងៀម និងវង្វេងមិនស្គាល់សូម្បីតែកូនរបស់ខ្លួន។ សភាពនេះ បានកើតឡើងប្រមាណ ជា៤ថ្ងៃចុងក្រោយ ពោលតាំងពី មុនបញ្ជូនទៅកាន់បន្ទប់សង្គ្រោះបន្ទាន់ម្ល៉េះ។ មកទល់នឹងពេលនេះ ឲ្យតែអ្នកស្រីដឹងខ្លួន គឺស្រែកថ្ងូររហូត។ ជំងឺ៥ប្រភេទដែលកំពុងបង្កផលវិបាកនាពេលនេះ គឺជំងឺពុកឆ្អឹង ជំងឺទឹកនោមផ្អែម ជំងឺលើសឈាម ជំងឺមានជាតិពុលក្នុងខ្លួនហួសកម្រិត និងជំងឺថ្មីមួយទៀត ដែលទើបតែរកឃើញក្នុងពេលសង្គ្រោះ គឺជំងឺរបេងឆ្អឹង ដែលកំពុងស៊ីឆ្អឹងឲ្យពុកនោះតែម្ដង។ ប៉ុន្មានថ្ងៃមុន ក្រុមគ្រូពេទ្យបានសាកល្បងឲ្យអ្នកស្រីលេបថ្នាំរបេងឆ្អឹង ប៉ុន្តែសារជាតិថ្នាំនោះ បែរជាធ្វើឲ្យអ្នកស្រីទន់ខ្លួន និងស្ទើរតែដាច់ដង្ហើមម្ដងៗព្រោះតែពិបាកទ្រាំ ទើបតម្រូវឲ្យផ្អាកលេបថ្នាំកាលពី២ថ្ងៃមុន។
កាលពីល្ងាចថ្ងៃទី២៦ មេសា អ្នកស្រីខ្លី ត្រូវក្រុមគ្រូពេទ្យ បានសុងយកជាតិពុលចេញ ប៉ុន្តែសភាពនៃការសង្គ្រោះបន្ទាន់ នៅតែធ្វើឲ្យកូនៗទាំង៥ ដែលផ្លាស់ប្ដូរគ្នាថែទាំ អស់សង្ឃឹមជាដដែលទេ ដោយសារតែសភាពនៃការធូរស្រាលនៅតែឃើញពន្លឺតូច។ មកទល់ពេលនេះ អ្នកស្រីខ្លីមានវ័យ៦៣ឆ្នាំហើយ ដោយអ្នកស្រីមិនសល់អ្វីក្រៅពីដីស្រែមួយដុំនៅខេត្តព្រៃវែង ដែលបានប្រកាសលក់តាំងពីមិនទាន់ធ្ងន់ហើយលក់មិនដាច់នោះទេ។ អ្នកនាំពាក្យរបស់លោកស្រី និយាយថា «ម៉ែខ្ញុំ ប្រហែលជាអស់សង្ឃឹមច្រើនជាងសង្ឃឹម ព្រោះសភាពឆ្អឹងពុករបស់គាត់ ប្រហែលជាអាចឲ្យគាត់ពិការតែម្ដងបើអាចធូរស្រាល អ្វីដែលសំខាន់ គាត់ហូបអត់បាន ចង់វះកាត់ឆ្អឹងគាត់ក៏អត់បាន ព្រោះជំងឺទឹកនោមផ្អែមគាត់ក៏ធ្ងន់ មើលទៅពួកខ្ញុំអត់មានសង្ឃឹមច្រើនទេ»។ អ្នកស្រីរ៉ុម ប្រាប់ថា មួយរយៈមុន ដែលមានតារាសិល្បៈ និងសប្បុរជនមួយចំនួនជ្រោមជ្រែង កូនៗគ្រាន់បានទិញថ្នាំសង្កូវឲ្យអ្នកស្រីបានខ្លះ ប៉ុន្តែនាមួយរយៈនេះ សភាពជំងឺកាន់តែធ្ងន់ កូនចៅកាន់តែអស់លទ្ធភាព ដោយស្ទើរតែគ្មានប្រាក់ឈ្នួលផ្ទះ ដែលជួលនៅដោយរៀងៗខ្លួននោះផង។
No comments:
Post a Comment
yes