កងកម្លាំងអាជ្ញាធររាជធានីភ្នំពេញ នៅក្បែរទីលានប្រជាធិបតេយ្យ គណៈមានក្រុមអ្នក
តវ៉ាប៉ុនប៉ងចូលតវ៉ានៅទីលានប្រជាធិបតេយ្យ នៅព្រឹកថ្ងៃទី២៦ មករា ឆ្នាំ២០១៤
មន្ត្រីជាន់ខ្ពស់ក្រសួងមហាផ្ទៃ បានព្រមានចាត់វិធានការតាមផ្លូវច្បាប់ទៅលើមេដឹកនាំសហជីព និងសង្គមស៊ីវិលខ្លះ ដែលមានៈរៀបចំទិវាពលកម្មអន្តរជាតិ នៅថ្ងៃទី១ ខែឧសភា នាទីលានប្រជាធិបតេយ្យ ដោយមិនគោរពតាមការណែនាំរបស់អាជ្ញាធរមូលដ្ឋាន។ ប៉ុន្តែមន្ត្រីសង្គមស៊ីវិលថ្លែងថា នឹងរក្សាជំហរដឹកនាំកម្មករប្រារព្ធទិវានេះទៅតាមការគ្រោងទុក និងមិនញញើតចំពោះសារគំរាមរបស់ប៉ូលិសនោះទេ។
លោកនាយឧត្ដមសេនីយ៍ ខៀវ សុភ័គ មន្ត្រីនាំពាក្យក្រសួងមហាផ្ទៃ មានប្រសាសន៍នៅថ្ងៃអង្គារ ទី២៩ ខែមេសា ថា បើមេដឹកនាំសហជីព ឬសមាគមខ្លះរឹងទទឹង ឬមានៈ បន្តរៀបចំទិវាពលកម្មអន្តរជាតិ នៅថ្ងៃទី១ ខែឧសភា នាទីលានប្រជាធិបតេយ្យ ប្រឆាំងការណែនាំរបស់ក្រសួងមហាផ្ទៃ ឬសាលាក្រុងភ្នំពេញ ត្រូវតែទទួលខុសត្រូវចំពោះមុខច្បាប់។
លោកបន្តថា ក្រសួងមហាផ្ទៃ នឹងមិនអនុញ្ញាតឲ្យមានការប្រមូលផ្ដុំគ្នានៅទីលានប្រជាធិបតេយ្យជាដាច់ខាតនៅក្នុងកាលៈទេសៈនេះ។ ប៉ុន្តែលោកថា សង្គមស៊ីវិលទាំងនោះអាចរៀបចំទិវាពលកម្មអន្តរជាតិនេះនៅតាមទីកន្លែងឯកជន ឬនៅតាមទីស្នាក់ការរៀងៗខ្លួនជំនួសវិញ។
លោក ខៀវ សុភ័គ៖ «អាជ្ញាធរលោកហាមមិនឲ្យធ្វើទេ គឺវាប៉ះពាល់ដល់សន្តិសុខសណ្ដាប់ធ្នាប់យោងតាមច្បាប់ដែលនៅជាធរមាន។ បើសិនជាគាត់នៅតែមានៈអ៊ីចឹង? សុំឲ្យគាត់ទទួលខុសត្រូវចំពោះយថាហេតុអ្វីមួយដែលកើតឡើង ឬក៏ការខូចខាត។ ដូចអ្វីដែលបានកើតឡើងកន្លងមកនៅផ្លូវវ៉េងស្រេងអ៊ីចឹង បាត់បង់ជីវិតមនុស្ស បាត់បង់ទ្រព្យសម្បត្តិមិនទាន់មាននរណាទទួលខុសត្រូវទេ ហើយបើគាត់នៅរឹងទទឹងឲ្យគាត់ទទួលខុសត្រូវចំពោះមុខច្បាប់ សូមប្រាប់មុនឲ្យហើយ»។
កាលពីសប្ដាហ៍មុនតំណាងសហព័ន្ធសហជីពនិងសមាគមជិត ២០ស្ថាប័ន បានដាក់លិខិតជូនដំណឹង ជូន លោក ប៉ា សុជាតិវង្ស អភិបាលសាលារាជធានីភ្នំពេញ ដោយស្នើទីតាំងទីលានប្រជាធិបតេយ្យ ប្រារព្ធទិវាពលកម្មអន្តរជាតិ ថ្ងៃទី១ ខែឧសភា។ ប៉ុន្តែសំណើនេះត្រូវថ្នាក់ដឹកនាំសាលារាជធានីបដិសេធ។
ប្រធានសម្ព័ន្ធសហជីពជាតិ លោក ហ្វា សាលី ស្ថិតក្នុងចំណោមមេដឹកនាំសហជីព និងសមាគមច្រើនទៀតថ្លែងថា សហជីពលោកនឹងរក្សាជំហរដឹកនាំកម្មករធ្វើពិធីអបអរទិវាពលកម្មអន្តរជាតិ នៅថ្ងៃទី១ ខែឧសភា មិនផ្លាស់ប្ដូរទេ ទោះអាជ្ញាធរមិនអនុញ្ញាត ឬប៉ូលិសគំរាមបង្ក្រាប និងចាត់វិធានការតាមផ្លូវច្បាប់បែបណាក្តី។
លោកថា តាមគម្រោងទិវានេះអាចមានមនុស្សចូលរួមប្រមាណ ៥ពាន់នាក់ ហើយសហជីពក៏បានអញ្ជើញតំណាងគណបក្សប្រជាជនកម្ពុជា និងគណបក្សសង្គ្រោះជាតិ ឲ្យចូលរួមស្តាប់កង្វល់របស់ក្រុមកម្មករ និងមន្ត្រីរាជការនៅក្នុងពិធីនោះដែរ ប៉ុន្តែពិធីនេះ មិនមានការដើរហែក្បួនទេ៖ «ទោះក្រសួងមហាផ្ទៃ មិនអនុញ្ញាតក៏យើងនៅតែធ្វើដែរ គឺជំហររបស់យើង ធ្វើដាច់ខាត ហើយជួបជុំគ្នានៅទីលានប្រជាធិបតេយ្យ ធ្វើជាកន្លែងអបអរសាទរទិវាពលកម្មអន្តរជាតិលើកទី១២៨ ដែលរំលឹកអំពីទុក្ខវេទនារបស់កម្មករជាដើម»។
លោក ហ្វា សាលី ឲ្យដឹងទៀតថា តំណាងសហជីព សមាគម និងក្រុមកម្មករ នឹងយកទិវាពលកម្មអន្តរជាតិ ១ ឧសភា ទទូចស្នើឲ្យរដ្ឋាភិបាលពិចារណាដំឡើងប្រាក់ឈ្នួលកម្មករឲ្យបាន ១៦០ដុល្លារ និងស្នើឲ្យតុលាការ ឬរដ្ឋាភិបាលដោះលែងមន្ត្រីសិទ្ធិមនុស្ស និងកម្មករចំនួន ២៣នាក់ ដែលសមត្ថកិច្ចចាប់ខ្លួនដាក់ក្នុងពន្ធនាគារក្នុងព្រឹត្តិការណ៍តវ៉ាទាមទារដំឡើងប្រាក់ខែជូនកម្មករកាលពីដើមខែមករា ឲ្យមានសេរីភាពវិញ។
ទាក់ទិនបញ្ហានេះ មន្ត្រីនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា មូលហេតុដែលអាជ្ញាធរមិនអនុញ្ញាតឲ្យសង្គមស៊ីវិលរៀបចំទិវាពលកម្មអន្តរជាតិ ថ្ងៃទី១ ខែឧសភា នៅទីលានប្រជាធិបតេយ្យ ដោយសារក្រុមការងារស៊ើបអង្កេតអំពីបញ្ហាប៉ះពាល់នៃការប៉ះទង្គិចគ្នារវាងក្រុមបាតុករបក្សប្រឆាំង និងសមត្ថកិច្ច កាលពីដើមខែមករា ឆ្នាំ២០១៤ មិនទាន់ស៊ើបអង្កេតចប់នៅឡើយ៕
No comments:
Post a Comment
yes