.jpg)
ប្រធានសហភាពសហជីពកម្ពុជា លោក រ៉ុង ឈុន ថ្លែងក្នុងសន្និសីទកាសែតអំពី
ជំហររបស់សហរដ្ឋអាមេរិក និងកាណាដា ជុំវិញការប្រើអំពើហិង្សាលើកម្មករ
នៅថ្ងៃ៨ ឧសភា ឆ្នាំ២០១៤
មេដឹកនាំសហជីពកម្មកររំពឹងថា សមាជិករដ្ឋសភា និងព្រឹទ្ធសភាសហរដ្ឋអាមេរិក នឹងលើកយកបញ្ហាដែលកំពុងកើតមានដ៏ចម្រូងចម្រាសប្រឆាំងកម្មករ ដាក់ជូនរដ្ឋាភិបាលលោកប្រធានាធិបតី បារ៉ាក់ អូបាម៉ា (Barack Obama) ក្នុងការពិចារណាដាក់សម្ពាធ និងហ៊ុមព័ទ្ធសេដ្ឋកិច្ចប្រឆាំងរដ្ឋាភិបាលលោកនាយករដ្ឋមន្ត្រី ហ៊ុន សែន។
ក្ដីរំពឹងចំពោះកិច្ចអន្តរាគមន៍របស់ប្រទេសមហាអំណាចផ្នែកសព្វាវុធនៅពេលនេះ នៅបន្ទាប់ពីក្រុមសហជីពបានទាមទារសុំឲ្យសហគមន៍អន្តរជាតិ ប្រតិកម្មប្រឆាំងការប្រើហិង្សាលើកម្មករដែលទាមទារប្រាក់ខែកាលពីដើមខែមករា ឆ្នាំ២០១៤ កន្លងទៅ។
ការស្វែងរកកិច្ចអន្តរាគមន៍ពីប្រទេសមហាអំណាចរបស់ក្រុមសហជីពនេះ ធ្វើឡើងនៅចំពេលដែលស្ថានការណ៍នយោបាយនៅកម្ពុជា បន្តជាប់គាំង និងកើតមានអំពើហិង្សាជាញឹកញាប់ទៅលើអ្នកតស៊ូមតិទាមទារសិទ្ធិសេរីភាព។
ប្រធានសហភាពសហជីពកម្ពុជា អះអាងថា ទាំងសមាជិករដ្ឋសភា និងព្រឹទ្ធសភា សហរដ្ឋអាមេរិក និងប្រទេសកាណាដា សន្យាថា នឹងយកសំណើរបស់សហជីពផ្នែកវិស័យឧស្សាហកម្មកាត់ដេរនៅកម្ពុជា ដាក់ទៅរដ្ឋាភិបាលដើម្បីពិចារណា និងចាត់វិធានការប្រឆាំងរដ្ឋាភិបាលលោក ហ៊ុន សែន។
លោក រ៉ុង ឈុន ដែលជាប្រធានសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា ផង ឲ្យដឹងនៅថ្ងៃទី៨ ឧសភា ថា ក្នុងពេលដ៏ឆាប់ខាងមុខនេះ ទាំងសមាជិករដ្ឋសភា ព្រឹទ្ធសភា សហរដ្ឋអាមេរិក និងប្រទេសកាណាដា នឹងយកសំណើរបស់សហជីពដែលលើកពីបញ្ហាហិង្សារបស់រដ្ឋាភិបាលលោកនាយករដ្ឋមន្ត្រី ហ៊ុន សែន ប្រឆាំងកម្មករ ដាក់ទៅរដ្ឋាភិបាលលោកប្រធានាធិបតី អូបាម៉ា ដើម្បីចាត់វិធានការ។
ថ្លែងនៅក្នុងសន្និសីទកាសែតក្រោយបញ្ចប់ទស្សនកិច្ចជាង ១ខែ នៅទីស្នាក់ការរបស់លោកក្នុងរាជធានីភ្នំពេញ នាថ្ងៃទី៨ ឧសភា លោក រ៉ុង ឈុន មានជំនឿថា កិច្ចអន្តរាគមន៍លើកនេះ នឹងមិនឥតប្រយោជន៍ឡើយ។ បន្ទាប់ពីបញ្ចប់ទស្សនកិច្ចកាលពីថ្ងៃទី៦ ឧសភា ក្រោយពេលចេញដំណើរទៅសហរដ្ឋអាមេរិក និងកាណាដា កាលពីថ្ងៃទី២៦ ខែមីនា នោះ លោកអះអាងថា ការសន្យានៅពេលនេះរបស់សមាជិករដ្ឋសភា និងព្រឹទ្ធសភា ប្រទេសមហាអំណាចមានភាពម៉ឺងម៉ាត់ណាស់ជុំវិញបញ្ហាប្រឆាំងសិទ្ធិមនុស្សនៅកម្ពុជា ជាពិសេសប្រឆាំងកម្មករដែលទាមទារប្រាក់ខែដោយអហិង្សាដើម្បីរស់នោះ។
លោក រ៉ុង ឈុន៖ «សហរដ្ឋអាមេរិកក៏បានលើកសំណួរសួរខ្ញុំដែរថា ចង់ឲ្យសហរដ្ឋអាមេរិកធ្វើស្អី ហើយបើសហរដ្ឋអាមេរិកធ្វើវានឹងប៉ះពាល់ តើលោកដឹងអត់ថាវានឹងប៉ះពាល់ពីណា? ខ្ញុំឆ្លើយថា ខ្ញុំដឹងប៉ះពាល់មុនគេគឺកម្មករ ប៉ុន្តែប្រជាពលរដ្ឋខ្មែរ ទាំងកម្មករ ទាំងគ្រូបង្រៀន ទើបតែនឹងប៉ះពាល់ អាមេរិកដាក់ទណ្ឌកម្មទេ។ បើសិនអាមេរិកដាក់ទណ្ឌកម្មមែន ប៉ុន្តែប្រជាពលរដ្ឋខ្មែរ គ្រូបង្រៀន កម្មករប៉ះពាល់ជាង ៣០ឆ្នាំមកហើយ។ ផលប៉ះពាល់ហ្នឹងដែលមិនទាន់បានផ្ដល់ដំណោះស្រាយឲ្យពួកគាត់»។
ក្នុងព្រឹត្តិការណ៍បង្ក្រាបដ៏ហិង្សាកាលពីដើមខែមករា ឆ្នាំ២០១៤ កន្លងទៅ យ៉ាងហោចណាស់ក៏មនុស្ស ៤នាក់បានស្លាប់ភ្លាមៗ ចំណែកជិត ៤០នាក់ទៀត (៣៧) រងរបួសធ្ងន់និងស្រាល។ លើសពីនេះ សកម្មជនសិទ្ធិមនុស្ស មន្ត្រីសហជីព និងកម្មករ ២៣នាក់ ត្រូវជាប់ពន្ធនាគារ ខណៈពេលដែលមនុស្សម្នាក់បាត់ខ្លួននៅឡើយ។
ឆ្លើយតបបញ្ហានេះ លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រីផង អះអាងយ៉ាងមុតមាំថា រដ្ឋាភិបាលពុំខ្វល់សោះឡើយចំពោះកិច្ចអន្តរាគមន៍របស់លោក រ៉ុង ឈុន នៅពេលនេះ។ លោកចាត់ទុកថា មកដល់ពេលនេះទៅហើយ លោក រ៉ុង ឈុន នៅតែជាមនុស្សមិនដឹងអ្វីសោះ។ លោកអះអាងថា បណ្ដាប្រទេសនៅក្នុងពិភពលោក រហូតមកដល់ពេលនេះគេបានបោះបង់ចោលអស់ទៅហើយរឿងការដាក់ទណ្ឌកម្មណាមួយនោះ។ ហេតុនេះការលើកឡើងរបស់លោក រ៉ុង ឈុន វាគួរឲ្យខ្មាស និងរឹតតែហួសសម័យកាលទៅទៀត អ្វីដែលគប្បីនិយាយនៅពេលនេះ គឺកិច្ចសហប្រតិបត្តិការរវាងប្រទេសនិងប្រទេសប៉ុណ្ណោះ។
លោក ផៃ ស៊ីផាន៖ «នេះជាបំណងរបស់លោក រ៉ុង ឈុន។ បំណងអំពីការប្រឆាំងកំហឹង និងការឈ្នានីសរាល់អ្វីដែលជាផលប្រយោជន៍របស់កម្មករ ឬប្រយោជន៍ប្រជាពលរដ្ឋ។ យើងដឹងហើយ ពិភពលោកគេបោះបង់ចោលអំពីការដាក់ទណ្ឌកម្ម មានតែលោក រ៉ុង ឈុន មួយទេ ដែលទើបចេញពីព្រៃមក។ លោកនៅមានគំនិតដដែល»។
ចំណែកលោក រ៉ុង ឈុន វិញព្រមានថា បើរដ្ឋាភិបាលរបស់លោក ហ៊ុន សែន និងបរិវាររបស់ខ្លួននៅតែបន្តប្រើហិង្សា និងបាញ់បង្ក្រាបប្រឆាំងកម្មករ សកម្មជនសិទ្ធិមនុស្ស និងគ្រូបង្រៀនបន្តទៀត។ លោកបញ្ជាក់ថា នោះជីវិតនយោបាយចុងក្រោយរបស់លោកនាយករដ្ឋមន្ត្រី ហ៊ុន សែន នឹងជិតបញ្ចប់ហើយ៕
No comments:
Post a Comment
yes