លោក វន់ ពៅ ប្រធានសមាគមប្រជាធិបតេយ្យឯករាជ្យនៃ
សេដ្ឋកិច្ចក្រៅប្រព័ន្ធ (រូបថត សុទ្ធ គឹមសឿន)
តុលាការកំពូល តម្កល់សេចក្ដីសម្រេចរបស់សាលាឧទ្ធរណ៍ ដែលបានសម្រេចមិនឲ្យ លោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងអ្នកជាប់ឃុំ២០នាក់ផ្សេងទៀត ឲ្យនៅក្រៅឃុំបណ្តោះអាសនុ្ន ព្រោះតែសវនាការកំពុងដំណើរការ។
សេចក្ដីសម្រេចនេះ ធ្វើឡើងនៅក្នុងបន្ទប់សវនាការនៃតុលាការកំពូល នៅវេលាម៉ោង ៨ព្រឹក ថ្ងៃសុក្រនេះ ដោយលោកចៅក្រម ឃឹម ប៉ុន នៅចំពោះមុខអ្នកសារព័ត៌មាន និងមេធាវីការពារក្ដីជនជាប់ចោទ។
លោកសំ សុខគង់ មេធាវីការពារក្តី លោក វន់ ពៅ និងជនជាប់ចោទទាំង២១នាក់ មានប្រសាសន៍បន្ទាប់ពីចេញពីបន្ទប់សវនាការនៅព្រឹកថ្ងៃសុក្រ ទី០៩ នេះថា ក្រុមមេធាវីរបស់លោកមានការសោកស្តាយយ៉ាងខ្លាំង ដែលចៅក្រមតុលាការកំពូលកាត់សេចក្តីមានលក្ខណៈច្របូកច្របល់បែបនេះ ខណៈជនជាប់ចោទទាំងនោះ មានឯកសារគ្រប់គ្រាន់ក្នុងការស្នើសុំនៅក្រៅឃុំ <<ការដែលតុលាការកំពូលគាត់ យោងទៅលើចំណុចពាក់ព័ន្ធនឹងរឿងអង្គសេចក្តី និងរឿងនៅក្រៅឃុំនេះ គាត់យកមកដាក់មកលូកឡំគ្នា ពីព្រោះទោះបីជាដំណើរការរឿងអង្គសេចក្តីកំពុងដំណើរការក៏ដោយ ប៉ុន្តែរឿងនៅក្រៅឃុំសំខាន់ទៅលើ ថាតើមានឯកសារ ឬមានភស្តុតាងអីខ្លះដែលអាចធានាបានថាជនជាប់ចោទគាត់អាចធានាខ្លួន ហើយគាត់នឹងមកចូលបញ្ហាញខ្លួននៅគ្រប់ដំណាក់កាលនៃនីតិវិធីរបស់តុលាការ>>។
បន្ទាប់បានទទួលដំណឹងថា តុលាការកំពូលតម្កល់សេចក្ដីសម្រេចរបស់សាលាឧទ្ធរណ៍ មិនឲ្យជនជាប់ចោទនៅក្រៅឃុំ ប្រជាពលរដ្ឋអ្នកគ្រាំទ្រលោកវន់ ពៅ និងគ្រួសារជនជាប់ចោទ បានទ្រហោរយំ ហើយចាត់ទុកសេចក្ដីសម្រេចនេះ ថាជារឿងអយុត្តិធម៌មួយទៅលើជនជាប់ចោទ <<ហើយអ្វីដែលខ្ញុំអស់សង្ឃឹមមែនទែន ដោយសារតែយើងសុំធានាឲ្យនៅក្រៅឃុំដើម្បីព្យាបាលជំងឺរបស់គាត់ នៅតែគេមិនអនុញាត នេះជារឿងមួយដែលធ្វើឲ្យខ្ញុំរឹតតែមានអារម្មណ៍ថា ឈឺចាប់ខ្លាំងមែនទែន ដោយសារតែតុលាការ ហេតុអីបានមិនឲ្យគាត់នៅក្រៅឃុំ អយុត្តិធម៌ណាស់តុលាការ គ្រាន់តែទាមទារប្រាក់ខែ១៦០ដុល្លា ទាហានឆ័ត្រយោងលេខ៩១១ បាញ់ប្រហារកម្មករ ហេតុអីក៏តុលាការមិនរកយុត្តិធម៌ឲ្យគាត់ផង គ្រាន់តែគាត់ទៅទាមទារដើម្បីឲ្យមានប្រាក់ខែរស់នៅសមរម្យ តុលាការអយុត្តិធម៌ដាក់គាត់មិនឲ្យគាត់>>។
គ្រួសារជនជាប់ចោទទ្រហោរយំនៅមុខតុលាការ បន្ទាប់ពីបានស្តាប់សេចក្តីសម្រេច (រូបថត ជន ស្រីណុច)
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស នៃអង្គការលីកាដូ លោក អំ សំអាត ដែលបានតាមដានព្រឹត្តិការណ៍នេះ មានប្រសាសន៍ថា លោកមានការសោកស្តាយ ដែលតុលាការកាត់សេចក្តីបែបនេះ ព្រោះជនជាប់ទាំង២១នាក់នោះ ជាប់ត្រឹមបទមជ្ឈិម មិនតែប៉ុណ្ណោះពួកគេកំពុងមានជំងឺជាទម្ងន់ទៀត។ លោករិះគន់តុលាការថា ធ្វើការមិនឯករាជ្យ ស្ថិតក្រោមសម្ពាធនយោបាយ <<តុលាការមិនមានភាពឯករាជ្យ ដោយសារតែបញ្ហានិយោបាយជាអ្នកលូកឡំ អ្នកដែលមានអំណាចជាអ្នកគ្រប់គ្រងទៅលើប្រព័ន្ធតុលាការ គេហៅថាប្រព័ន្ធតុលាការបែបបក្ស មិនមែនប្រព័ន្ធតុលាការបែបរដ្ឋបាលដើម្បីយុត្តិធម៌សម្រាប់ពលរដ្ឋ>>។
ជនជាប់ចោទ២១ នាក់នេះ ដែលក្នុងនោះមាន លោកវន់ ពៅ គឺជាសកម្មជនតំណាងសង្គម និងកម្មករដែលត្រូវបានចាប់ខ្លួននៅថ្ងៃទី២ និងទី៣ ខែមករា ក្នុងហេតុការណ៍បង្ក្រាបមួយទៅលើការតវ៉ារបស់កម្មករ ដែលទាមទារដំឡើងប្រាក់ឈ្នួលសមរម្យ១៦០ដុល្លារ ហើយពេលនោះបង្កឲ្យមានអំពើហិង្សាផ្ទុះឡើង នៅខាងមុខរោងចក្រយ៉ាក់ជីង ខណ្ឌពោធិ៍សែនជ័យ និងនៅខាងមុខសួនកាណាឌីយ៉ាផ្លូវស្រេង។ រហូតមកដល់ពេលនេះ កងកម្លាំងរដ្ឋាភិបាលដែលបង្ក្រាបទៅលើអ្នកតវ៉ា បណ្ដាលឲ្យមានអ្នកស្លាប់ និងរបួសរាប់សិបនាក់នោះ មិនទាន់ត្រូវបានចាប់ខ្លួនមកផ្ដន្ទាទោសនៅឡើយទេ៕
No comments:
Post a Comment
yes