ពលរដ្ឋប្រមាណ៥០គ្រួសារ នៅស្រុកអន្លង់វែង ខេត្ដឧត្ដរមានជ័យ ភ័យខ្លាចនិងបារម្ភបាត់បង់ដីចម្ការ ដោយសារមានទាហានបាញ់គំរាម និងក្រុមហ៊ុន សុខារិទ្ធិ ហាមឃាត់មិនឲ្យបង្កបង្កើនផលលើដីដែលពួកគាត់កាន់កាប់ជិត១០ឆ្នាំមកហើយ។
ពលរដ្ឋនៅឃុំអន្លង់វែង ស្រុកអន្លង់វែង លោក ហឿង ហាក់ ប្រាប់VODនៅថ្ងៃអង្គារនេះថា កាលពីថ្ងៃទី២៤ខែឧសភា តំណាងក្រុមហ៊ុនសុខារិទ្ធិ និងសហគមន៍សង្គ្រោះព្រៃឈើ នៅស្រុកអន្លង់វែង បានហាមឃាត់ពួកគាត់ មិនឲ្យដាំដុះលើដីដែលខ្លួនកាន់កាប់តាំងពីឆ្នាំ២០០៨មក ដោយបារម្ភខ្លាចពលរដ្ឋយកជាកម្មសិទ្ធិ។ លោកបន្ដថា កន្លងមកក៏មានក្រុមយោធា ប្រើអាវុធ បាញ់គំរាម និងតំណាងក្រុមហ៊ុនសុខារិទ្ធិ បានព្រមាន បំផ្លាញដំណាំចោលបើសិនពួកគាត់ មិនអនុ វត្ដតាមការណែនាំ។ លោកអំពាវនាវ ដល់ស្ថាប័នពាក់ព័ន្ធ និងរាជរដ្ឋាភិបាលជួយដោះស្រាយជូនពួកគាត់ «គេថាមិនឲ្យដាំទេ បើសិនជាដាំទាល់តែធ្វើកិច្ចព្រមព្រៀងឲ្យគេ ទើបគេឲ្យដាំ បើមិនអ៊ីចឹងទេ គេមិនឲ្យដាំទេ ពីព្រោះអីខ្លាចប្រជាពលរដ្ឋហើយ យកទាំងដីយកទាំងផលដំណាំ។ ពាក់ព័ន្ធនឹងខាងសហគមន៍នោះផង ពាក់ព័ន្ធនឹងដីទីទួលសុវត្ថិភាពរបស់លោកសុខារិទ្ធិ នោះផង។ ដំណាំដែលគាត់បានដាំនោះ ខ្លះក៏ស្មើជង្គង់ ខ្លះក៏ស្មើស្មងជើងទៅហើយ គេថាគេមិនឲ្យដាំទេ គេនឹងយកថ្នាំសម្លាប់មក ប្រសិនជាហ៊ានដាំ គេនឹងយកថ្នាំនោះទៅបាញ់សម្លាប់ភោគផលដែលបងប្អូនប្រជាពលរដ្ឋ យើងបានដាំ។»
ពលរដ្ឋមួយរូបទៀត លោក ហ៊ាន ណយ ឲ្យដឹងថា ដីចម្ការរបស់លោក ៦ហិកតា និងដីប្រជាពលរដ្ឋជាច្រើនទៀត បានកាប់ឆ្ការព្រៃដើម្បីដាំស្រូវ ជាយូរមកហើយនោះ ត្រូវបានក្រុមហ៊ុនសុខារិទ្ធិឈូសឆាយហ៊ុមព័ទ្ធជុំវិញ ដើម្បីយកដីធ្វើទី ទួលសុវត្ថិភាពដាក់ជនភៀសសឹក។ លោកបន្ថែមថា ពលរដ្ឋ បានភៀសខ្លួនទៅធ្វើចំណាកស្រុក និងជាកម្មករឲ្យគេ នៅសល់ប្រហែល៥០គ្រួសារប៉ុណ្ណោះ ដោយភ័យខ្លាចការគំរាមកំហែងពីក្រុមហ៊ុន និងសហគមន៍ព្រៃឈើ «ភាគច្រើនដូចថា អស់សង្ឃឹម អ្នកខ្លះក៏ទៅថៃ អ្នកខ្លះក៏អត់ការងារធ្វើ ក៏ចេះតែដើរស៊ីឈ្នួលគេ ភាគច្រើនទៅអស់ខ្លះ ហើយ គេនាំគ្នាចាកចេញអត់ហើយ បាញ់គំរាម ប្រជាពលរដ្ឋចេះតែភ័យខ្លាច ខ្ញុំមិនដឹងថាត្រូវថាយ៉ាងណាដែរ ហាមគាត់ថាមិនឲ្យទៅ ក៏គាត់មានមន្ទិលមួយ គាត់ថាគាត់ខ្លាចហើយនាំគ្នាចាកចេញ។»
VODមិនទាន់អាចទាក់ទងក្រុមហ៊ុនសុខារិទ្ធិ និងសហគមន៍ព្រៃឈើ ដើម្បីបំភ្លឺជុំវិញពីករណីនេះបានទេ។ មន្ត្រីសម្រប សម្រួលសមាគមការពារសិទ្ធិមនុស្ស អាដហុក ខេត្ដឧត្ដរមានជ័យ លោក ស្រី ណារ៉េន មានប្រសាសន៍ថា ដីនៅតំបន់នោះពលរដ្ឋបានកាប់ព្រៃ ដើម្បីបង្កបង្កើនផល ប៉ុន្តែលោកមិនដឹងថា ក្រុមសុខារិទ្ធិនោះ មានច្បាប់អភិវឌ្ឍន៍ប៉ុន្មានហិក តាឡើយ។ លោក បន្ដថា លោក នឹងចុះស៊ើបអង្កេត បើសិនមានពាក្យបណ្ដឹងពីពលរដ្ឋ «វាអត់ទាន់ច្បាស់ សហគមន៍មួយគាត់ថា ពីមុនគាត់ចូលមកកាប់ ហើយដល់ពេលកាប់បានគេថា ចាប់កន្លែងហ្នឹងដីទាហានកាប់ទៅមុខទៀតទៅ កាប់រំកិលចុះរំកិលឡើងវាចូលដីសហគមន៍ ក្រោយមកមិនដឹងគេទៅកន្លែងណាទៀត ក្រែងផុតពីដីសហគមន៍ ឬដីរដ្ឋ ព្រោះអីមិនច្បាស់ដែរ។»
កាលពីថ្ងៃទី២១ ខែឧសភា កន្លងទៅ ប្រជាពលរដ្ឋប្រមាណ៧០គ្រួសារ នៅចំណុចជប់ត្រគួន បានចោទប្រកាន់ក្រុម ហ៊ុនសុខារិទ្ធិ និងសហគមន៍សង្គ្រោះព្រៃឈើ នៅតំបន់នោះ ថាបង្ខំឲ្យពួកគេផ្ដិតមេដៃលើកិច្ចសន្យា ដើម្បីចាកចេញពីដីដែលពួកគាត់រស់នៅ និងបង្កបង្កើនផល ប៉ុន្ដែតំណាងក្រុមហ៊ន និងសហគមន៍ព្រៃឈើ បដិសេធដូចៗគ្នាដោយលើកឡើងកុំឲ្យពលរដ្ឋកាប់រានដីព្រៃ ឬដីទីទួលសុវត្ថិភាពបន្ដទៀត៕
No comments:
Post a Comment
yes