សមត្ថកិច្ចដាក់បារ៉ាស មិនឲ្យថ្នាក់ដឹកនាំគណបក្សសង្គ្រោះជាតិ
ចូលទៅតំបន់មានជម្លោះដីធ្លី ក្នុងស្រុកអូជុំ(រូបថតពីបណ្តាយសង្គម)
មន្ត្រីជាន់ខ្ពស់គណបក្សសង្គ្រោះជាតិ ឲ្យដឹងថា សមត្ថកិច្ចខេត្តរតនគិរីបានរារាំងលោក សម រង្ស៊ី និងលោក កឹម សុខា មិនឲ្យចូលទៅតំបន់ដែលពលរដ្ឋមានជម្លោះដីធ្លីជាមួយក្រុមហ៊ុនចិន ឈ្មោះហ្វីរ៉ាប៊ឺ លីមីត ស្ថិតនៅភូមិអូជុំ ស្រុកអូជុំ ខេត្តរតនគិរី។
លោក កឹម សុខា អនុប្រធាគណបក្សសង្គ្រោះជាតិ ឲ្យVODដឹងនៅថ្ងៃអង្គារនេះថា ថ្នាក់ដឹកនាំគណបក្សនេះ បានធ្វើដំណើរទៅដល់ខេត្តរតនគិរី ដើម្បីចុះទៅត្រួតពិនិត្យតំបន់ដែលមានជម្លោះដីធ្លី តែត្រូវសមត្ថកិច្ចរបស់លោក ហ៊ុន សែន រារាំងមិនឲ្យចូលទៅតំបន់ដែលមានជម្លោះនោះទេ។ លោកបន្តថា មូលហេតុដែលអាជ្ញាធរមិនអនុញាតឲ្យរូបលោក និងលោក សម រង្ស៊ី ចូលទៅតំបន់នោះ ទំនងជាអាជ្ញាធរឃុបឃិតជាមួយក្រុមហ៊ុន យកដីធ្លីរបស់ប្រជាពលរដ្ឋ។
ស្នងការនគរបាលខេត្តរតនគីរី លោក រ៉ាយ រ៉ៃ មានប្រសាសន៍ថា មូលហេតុដែលសមត្ថកិច្ចខេត្ត មិនឲ្យថ្នាក់ដឹកនាំគណបក្សប្រឆាំងធ្វើដំណើរទៅស្រុកអូជុំ ខេត្តរតនគិរី ដោយសារក្រុមការងារកំពុងធ្វើការសម្របសម្រួលពាក់ព័ន្ធ នឹងសំណង់អាណាធិបតេយ្យរបស់ប្រជាពលរដ្ឋនៅតំបន់នោះ។
យ៉ាងនេះក្តី លោក រ៉ាយ រ៉ៃ មិនបានបញ្ជាក់ពីមូលហេតុនៃជម្លោះដីធ្លីរវាងពលរដ្ឋនិងក្រុមហ៊ុនចិននោះទេ។
មន្ត្រីសមសម្រួលនៃសមាគមការពារសិទ្ធិមនុស្សអាដហុក ប្រចាំខេត្តរតនគិរី លោក ឆាយ ធី ហៅការរារាំងរបស់សមត្ថកិច្ចទៅលើថ្នាក់ដឹកនាំគណបក្សសង្គ្រោះជាតិថា ជាការរំលោភលើច្បាប់រដ្ឋធម្មនុញ្ញ និងធ្វើឲ្យប្រជាប្រិយភាពរបស់គណបក្សកាន់អំណាចកាន់តែធ្លាក់ចុះ។
លោក ឆាយ ធី បានឲ្យដឹងទៀតថា ប្រជាពលរដ្ឋដែលសង់ទីលំនៅចាស់មាន១០២គ្រួសារ កំពុងរងការគំរាមកំហែងពីក្រុមហ៊ុនជាញឹកញាប់តាំងពីឆ្នាំ២០១៣ ខណៈប្រជាពលរដ្ឋដែលមកតាំងទីលំនៅថ្មី មានប្រមាណ៣០០គ្រួសារ៕
No comments:
Post a Comment
yes