ជនជាតិដើមភាគតិចគួយខេត្តព្រះវិហារ អះអាងថា ពួកគេ៣នាក់ និងមន្ត្រីអង្គការសង្គមស៊ីវិលមួយរូប ត្រូវសាលាដំបូងខេត្តនេះ កោះហៅឲ្យចូលបំភ្លឺនៅថ្ងៃពុធស្អែក ជុំវិញបទចោទ របស់ក្រុមហ៊ុនចិន ដែលទទួលបានសិទិ្ធដាំអំពៅនៅតំបន់នោះ។
អ្នកសម្របសម្រួលគម្រោងអង្គការពន្លកខ្មែរ នៅខេត្តព្រះវិហារ អ្នកស្រី ហេង ចិន្តាវី ឲ្យ VOD ដឹងនៅថ្ងៃទី២៤ ខែមិថុនា ឆ្នាំ២០១៤នេះថា ជនជាតិដើមភាគតិច៣នាក់ នៅឃុំប្រមេរ ស្រុកត្បែងមានជ័យ និងមន្ត្រីអង្គការពន្លកខ្មែរម្នាក់ ត្រូវបានសាលាដំបូងខេត្តព្រះវិហារកោះហៅឲ្យបង្ហាញខ្លួននៅថ្ងៃពុធទី២៥ ខែមិថុនា ឆ្នាំ២០១៤នេះ តាមបណ្តឹងក្រុមហ៊ុន ចិន ឈ្មោះឡាន ហ្វេង។
ស្ត្រីរូបនោះឲ្យដឹងទៀតថា ដីកាកោះបានចោទប្រកាន់អ្នកទាំង៤នោះ ពីបទបំផ្លាញដំណាំអំពៅ របស់ក្រុមហ៊ុនក្នុងអំឡុងពេលតវ៉ាមួយ កាលថ្ងៃទី១ខែមេសាឆ្នាំ២០១៤។
តាមដីកាកោះចុះថ្ងៃទី៥ ខែមិថុនា ឆ្នាំ២០១៤ របស់ព្រះរាជអាជ្ញាអមសាលាដំបូងខេត្តព្រះវិហារលោក ឡុង ស៊ីថា ឲ្យដឹងថា អ្នកដែលត្រូវបង្ហាញខ្លួនមាន មន្ត្រីអង្គការពន្លកខ្មែរ លោក លូត សាំង និងប្រជាពលរដ្ឋ៣នាក់ទៀត គឺអ្នកស្រី រឿន ខាន់ អ្នកស្រី សាំ សាន និងអ្នកស្រី នួន ម៉ុន។
តាមដីកាកោះចុះថ្ងៃទី៥ ខែមិថុនា ឆ្នាំ២០១៤ របស់ព្រះរាជអាជ្ញាអមសាលាដំបូងខេត្តព្រះវិហារលោក ឡុង ស៊ីថា ឲ្យដឹងថា អ្នកដែលត្រូវបង្ហាញខ្លួនមាន មន្ត្រីអង្គការពន្លកខ្មែរ លោក លូត សាំង និងប្រជាពលរដ្ឋ៣នាក់ទៀត គឺអ្នកស្រី រឿន ខាន់ អ្នកស្រី សាំ សាន និងអ្នកស្រី នួន ម៉ុន។
មន្ត្រីសម្របសម្រួលអង្គការពន្លកខ្មែរ លោក លូត សាំង អះអាងថា លោកនឹងទៅបង្ហាញខ្លួនតាមដីកាកោះ ដោយអះអាងថា ពេលនោះលោកគ្រាន់តែចុះឃ្លាំមើលការរំលោភសិទ្ធិមនុស្ស ហើយមិនបានធ្វើអ្វីដូចក្រុមហ៊ុនចោទប្រកាន់នោះទេ។
ស្ត្រីជនជាតិដើមភាគតិច អ្នកស្រី រឿន ខាន់ អះអាងថា ជនជាតិដើមភាគតិចគួយគ្រប់រូប បានសម្រេចចិត្តរួចហើយ ថានឹងហ៊ានលះបង់អ្វីៗទាំងអស់ ដើម្បីការពារដីសហគមន៍ និងប្រពៃណីដូនតា ដូចនេះពួកគេនឹងមិនបារម្ភពីការចាប់ខ្លួន ពេលចូលបំភ្លឺនៅថ្ងៃពុធស្អែកនេះទេ។
តាមរបាយការណ៍ស្រាវជ្រាវ របស់ក្រុមអង្គការសង្គមស៊ីវិល មានមជ្ឈមណ្ឌលអប់រំច្បាប់សម្រាប់សហគមន៍ វេទិកានៃអង្គការមិនមែនរដ្ឋាភិបាលស្តីពីកម្ពុជា អង្គការពន្លកខ្មែរ និងអង្គការមួយចំនួនទៀត ចុះថ្ងៃទី២៥ ខែតុលា ឆ្នាំ២០១៣ រកឃើញថា ស្ថានភាពជនជាតិដើមភាគតិចកួយ ដែលរស់នៅក្នុងឃុំប្រមេរ បាននឹងកំពុងទទួលរងនូវការគំរាមកំហែងផ្នែកជីវភាព បរិស្ថាន ទំនៀមទម្លាប់ ជំនឿតាំងពីដូនតាមក ដោយសារការផ្តល់ដីសម្បទានសេដ្ឋកិច្ច ធ្វើឲ្យប៉ះពាល់ដល់សហគមន៍ពួកគេ។
របាយការណ៍ដដែលឲ្យដឹងទៀតថា ក្រុមហ៊ន ឡាន ហ្វេង ទទួលបានដីសម្បទានសេដ្ឋកិច្ចនៅតំបន់នេះ ទំហំ៩០១៥ហិកតា កាលពីឆ្នាំ២០១១។ ប៉ុន្តែអ្នកភូមិអះអាងថា ក្រុមហ៊ុនចិនមួយនេះ បានឈូសឆាយរំលោភយកដីសហគមន៍ច្រើនរយហិកតា និងប៉ះពាល់ដល់ប្រាសាទបុរាណដូនតាជាច្រើនកន្លែង ដែលតុលាការមិនទាន់ចាត់ការលើបណ្តឹងអ្នកភូមិ ។
យ៉ាងនេះក្ដីជនជាតិដើមភាគតិចអះអាងថា ពួកគេប្រមាណជា២០០នាក់ផ្សេងទៀត នឹងប្រមូលផ្តុំគ្នានៅមុខតុលាការនៅថ្ងៃពុធស្អែកនេះ ដើម្បីលើកទឹកចិត្ត តំណាងរបស់ខ្លួនដែលជាប់ពាក្យបណ្តឹង និងឃ្លាំមើលការសម្រេចក្តីរបស់តុលាការ៕
No comments:
Post a Comment
yes