សមាជិកក្រុមប្រឹក្សាខេត្តកំពង់ធំរបស់គណបក្សសង្គ្រោះជាតិស្នើ៤ស្ថាប័នចាត់វិធានការលើករណីអំពើពុករលួយនៅស្នងការរដ្ឋាននគរបាលខេត្តកំំពង់ធំ

អំពើពុករលួយបានរីករាលដាលគ្រប់ស្ថាប័ន ក្រសួង មន្ទីរ នៅក្នុងប្រទេសកម្ពុជា ដោយគ្មានចំ​ណាត់ការពីស្ថាប័នពាក់ព័ន្ធ និងបានអូសបន្លាយរាប់ឆ្នាំមកហើយក្រោមការដឹកនាំរដ្ឋាភិបាល​របស់គណបក្សប្រជាជន ដែលមានលោក ហ៊ុន សែន ជានាយករដ្ឋមន្រ្តី ។

ជាមួយគ្នានេះ ករណីពុករលួយដែលបានចាក់ឬសយ៉ាងជ្រៅនៅក្នុងស្នងការនគរបាល ខេត្តកំពង់ ធំ បានធ្វើឲ្យស្ថាប័នមួយនេះ កំពុងតែជះខ្លិនយ៉ាងអាសោច ដែលធ្វើឲ្យមហាជនក្នុងខេត្តរិះ​គន់​ឥតសន្សំសំចៃមាត់ ។

អំពើពុករលួយនៅក្នុងស្នងការនគរបាល ខេត្តកំពង់ធំ គឺទាក់ទងទៅនិងប្រាក់រំលឹកមុខងារ តួនាទី និងឋានត្តរស័ក ដែលមានទឹកប្រាក់រាប់រយលានរៀល ដែលជាប្រាក់របបគោលនយោបាយរបស់ ក្រសួង  និងអគ្គស្នងការនគរបាលជាតិ ដែលត្រូវផ្តល់ឲ្យមន្រ្តីនគរបាលជាតិគ្រប់កំរិត ដែលមាន ស្នាដៃក្នុងការតស៊ូបម្រើជាតិ  ហើយត្រូវបានឡើងស័ក ដែលមានឋានៈចាប់ពីថ្នាក់ពលបាលទោ ឡើងទៅ ចំនួនរាប់រយនាក់នៅខេត្តកំពង់ធំ ។

ប៉ុន្តែផ្ទុយទៅវិញ មន្រ្តីនគរបាលដែលត្រូវឡើងស័កទាំងនោះ ពុំបានទទួលទឹកប្រាក់គ្រប់ចំនួន​តាមការកំណត់នៃរបបគោលនយោបាយរបស់ក្រសួង និងអគ្គស្នងការនគរបាលជាតិទេ តែទឹក ប្រាក់ទាំងនេះ គឺនៅក្នុងដៃថ្នាក់ដឹកនាំមួយចំនួននៃស្នងការនគរបាល ខេត្តកំពង់ធំ ។

សមាជិកក្រុមប្រឹក្សា ខេត្តកំពង់ធំ មកពីគណបក្សសង្គ្រោះជាតិ លោក ស៊ុន ចាន់ធី បានប្រាប់វិទ្យុ សង្គ្រោះជាតិ ឲ្យដឹងជំវិញករណីពុករលួយនៅក្នុងស្នងការនគរបាល ខេត្តកំពង់ធំថា នេះគឺជា​ករណីអំពើពុករលួយជាទ្រង់ទ្រាយធំ ហើយលោកស្នើឲ្យគណៈកម្មការទី១០ នៃរដ្ឋសភា គណៈ​កម្មាទី១០ នៃព្រឹទ្ធសភា ក្រសួងមហាផ្ទៃ និងអង្គភាពប្រឆាំងអំពើពុករលួយមាន វិធានការ បើក​ការ​ស៊ើបអង្កេត ចំពោះករណីពុករលួយនៅក្នុងស្នងការនគរបាល ខេត្តកំពង់ធំ ដើម្បីរកជន​ដែល​ប្រ​ព្រឹត្តិអំពើពុករលួយយកមកផ្តន្ទាទោសទៅតាមផ្លូវច្បាប់ជាធរមាន ។ ( សម្លេង)

គួរជំរាបជូនថា លោក ជូ សំអាន ស្នងការនគរបាល ខេត្តកំពង់ធំ ក្នុងកិច្ចប្រជុំសាមញ្ញលើកទី៥ របស់ក្រុមប្រឹក្សាខេត្តកំពង់ធំ កាលពីថ្ងៃទី៩ ខែតុលា ឆ្នាំ២០១៤ លោកបានថ្លែងដោយទទួល​ស្គាល់អំពើពុករលួយពិតជាបានកើតមាននៅក្នុងស្នងការនគរបាល ខេត្តកំពង់ធំពិតប្រាកដមែន ។

លោក ជូ សំអាន ក៏បានធ្វើ​ការ​ប្រកាស​ព្រមាន​ជា​ចំហ​ថាផងដែរថា ​លោក​នឹង​ដាក់​វិ​ន័យ​ ​ចំពោះ​

ម​ន្ត្រី​នគរបាល​ណា​ដែលបាន​ទម្លាយ​ព័ត៌មាននេះ​ទៅ​ក្រៅ​អង្គ​ភាព ​ក្រោយ​ពី​បង្កើត​ក្រុម​ប្រឹក្សា​វិ​ន័យ​រួច​ ​និង​ស្រាវជ្រាវ​រក​ឲ្យ​ឃើញ​ ​ម​ន្ត្រី​រូប​ណា​ដែល​ ​ហ៊ាន​ទម្លាយ​ព័ត៌មាន​ទៅ​ក្រៅ​ ​ប៉ុន្តែ​លោក​ស្នង​ការ​​រូប​នេះ​ មិន​បាន​ធ្វើ​ការ​ព្រមាន​ជា​សា​ធារ​ណៈ​ចំពោះ ​ឱម​ ​ភី​លី​ ​ស្នង​ការ​រង​, លោក​ ​គង់​ ​

ចា​ន់​ទី​ ​និង​លោក​ ​ជឹ​ម​ ​លក្ខណា​ ​ជាម​ន្ត្រី​ទទួល​បន្ទុក​ដែល​ធ្វើ​ឲ្យ​បាត់បង់ប្រាក់​មុខ​ងារ​ ​និង​សក្តិ​របស់​ម​ន្ត្រី​នគរបាល​រាប់​រយ​នាក់​ ​ដែល​មាន​ទឹក​ប្រាក់​រាប់​សិ​ប​លាន​រៀល​នោះ​ទេ​ ​ដែល​ករណី​នេះ​ហាក់​បង្ហាញ​ពី​អាថ៌​កំបាំង​អ្វី​មួយ​នៅ​ពី​ក្រោយ​ការ​ធ្វើ​ឲ្យ​បាត់​ប្រាក់យ៉ាងច្រើនសន្ធឹកសន្ធាប់នេះ​ ​។

គួរជំរាបជូនថា សមាជិកក្រុមប្រឹក្សាខេត្តកំពង់ធំ លោក ស៊ុន ចាន់ធី បានដាក់លិខិតទៅបួនស្ថា ប័នដែលពាក់ព័ន្ធ ដើម្បីមានវិធានការលើករណីពុករលួយទ្រង់ទ្រាយធំនេះ ក្នុងនោះដាក់ទៅ​គណៈកម្មទី១០ នៃរដ្ឋសភា អង្កេត បោសសំអាត និងប្រឆាំងអំពើពុករលួយ ដែលមានលោក ហូរ វ៉ាន់ ជាប្រធាន ដាក់ទៅកាន់គណៈកម្មការទី១០ នៃព្រឹទ្ធសភា អង្កេត បោសសំអាត និងប្រឆាំង​អំពើពុករលួយ ដែលមានលោក ហុង សុខហួរ ជាប្រធាន ដាក់ទៅកាន់លោក ស ខេង រដ្ឋមន្រ្តី​ក្រសួងមហាផ្ទៃ និងដាក់ទៅកាន់លោក​ ឱម យិនទៀង ប្រធានអង្គភាពប្រឆាំងអំពើពុករលួយ ដើម្បីវែងមុខជន​ដែល​ប្រព្រឹត្តិអំពើពុករលួយខាងលើ យកមកផ្តន្ទាទោសទៅតាមផ្លូវច្បាប់ ៕