ដោយ៖វីរជន
ប្រទេសកម្ពុជា ត្រូវបានគេមើលឃើញថា
លទ្ធិប្រជាធិបតេយ្យនៃប្រទេសនេះ បាននិងកំពុងដើរថយក្រោយ
និងស្ថិតនៅក្នុងរង្វង់គ្រោះថ្នាក់ ក្រោមរដ្ឋាភិបាល ដែលដឹកនាំដោយគណបក្សប្រជា ជន មានលោក
ហ៊ុន សែន ជានាយករដ្ឋមន្រ្តី ។
ការធ្លាក់ចុះ នៃរបបលទ្ធិប្រជាធិបតេយ្យនៅកម្ពុជា
ក្រោយពីរដ្ឋាភិបាល ដែលដឹកនាំដោយគណបក្សប្រជាជន បានធ្វើការរឹតត្បឹតសេរីភាពនៃការបញ្ចេញមតិ
ការជួបជុំរបស់ប្រជាពលរដ្ឋ ការប្រើ ហិង្សាលើពលរដ្ឋរងគ្រោះទន់ខ្សោយ
ការបំបិតសិទ្ធិសេរីភាព របស់គណបក្សប្រឆាំង សង្គមស៊ីវិល
ដែលធ្វើការជុំវិញសិទ្ធិមនុស្ស ជាដើម ។
ជាមួយគ្នានេះ កត្តាដែលរឹតតែបង្ហាញ
អោយឃើញពីការធ្លាក់ចុះនៃលទ្ធិប្រជាធិបតេយ្យ នៅកម្ពុជាកាន់តែធ្ងន់ធ្ងរ
និងស្ថិតនៅក្នុងរង្វង់គ្រោះថា្នក់បំផុតនោះ គឺក្រោយការប្រើអំពើហិង្សាយ៉ាងឃោរឃៅ
ព្រៃផ្សៃ មកលើអ្នកតំណាងរាស្រ្តគណបក្ស សង្គ្រោះជាតិ ចំនួន២រូប គឺលោក គង់ សភា និងលោក
ញ៉យ ចំរើន កាលពីថ្ងៃទី២៦ តុលា ដោយក្រុមបាតុការដែលគាំទ្រគណបក្សប្រជាជន
ដែលរហូតមកទល់និងថ្ងៃនេះ សមត្ថកិច្ចនៅមិនទាន់ចាប់ជនដៃដល់ និងអ្នកនៅពីក្រោយខ្នងយកមកផ្តន្ទាទោសនៅឡើយទេ
ក្រៅពីជន៣រូប ដែលបានចូលខ្លួនមកសារភាពចំពោះសមត្ថកិច្ច ក្រោយការអំពាវនាវរបស់លោក
ហ៊ុន សែន ។
មួយវិញទៀត ករណីនៃការដកតំណែង លោកអនុប្រធាន កឹម
សុខា ចេញពីអនុប្រធានទី១ នៃរដ្ឋសភា ក្រោមការបោះឆ្នោតទម្លាក់ដោយសម្លេងឯកតោភាគី ៦៨លើ៦៨សម្លេង
របស់បក្សប្រជាជន និងការប្រជុំអចិន្ត្រៃយ៏នៃរដ្ឋសភា សម្រេចដោយឯកច្ឆ័ន
គ្មានការប្រជុំសភាពេញអង្គ ក្នុងការដកបុព្វសិទ្ធិ និងអភ័យឯកសិទ្ធិសភា
រួមទាំងការលប់ឈ្មោះលោកប្រធាន សម រង្ស៊ី ចេញពីបញ្ជីឈ្មោះតំណាងរាស្រ្ត អាណត្តិទី៥
ក្រោយតុលាការ ចេញដីកាចាប់ខ្លួនលោកប្រធាន តាមបណ្តឹងរបស់ លោក ហោ ណាំហុង
ដែលមានអាយុកាលជាង៧ឆ្នាំ និងត្រូវបានរលត់តាំងពីឆ្នាំ២០១៣មក
ក្រោមព្រះរាជទានទោសពីព្រះមហាក្សត្រ ។
ដូចគ្នានេះដែរ កាលពីថ្ងៃទី២០ វិច្ឆិកា
ចៅក្រមស៊ើបសួរសាលាដំបូងរាជធានីភ្នំពេញ លោក កោ វណ្ឌី
ក៏បានចេញដីកាបង្គាប់អោយលោកប្រធាន សម រង្ស៊ី ចូលខ្លួនឆ្លើយបំភ្លឺលើករណីថ្មីមួយ ទៀត
ដោយចោទ ពីបទ សមគំនិតក្នុងអំពើ ក្លែងបន្លំឯកសារសាធារណៈ ប្រើប្រាស់ឯកសារក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម
ប្រព្រឹត្តិនៅរាជធានីភ្នំពេញ កាលពីថ្ងៃទី១២និង១៣ សីហា ២០១៥ ទាក់ទងករណីលោក ហុង
សុខហួរ សមាជិកព្រឹទ្ធសភា គណបក្ស សម រង្ស៊ី ដែលរូបលោកត្រូវបានសមត្ថកិច្ចចាប់ខ្លួន
កាលពីថ្ងៃទី១៥ សីហា ក្រោយការសាកសួរ លោក ហុង សុខហួរ នៅថ្ងៃទី១៦សីហា ត្រូវតុលាការបញ្ជារអោយឃុំខ្លួនបណ្តុះអាសន្ននៅពន្ធនាគារព្រៃស
រហូតមកទល់ពេលនេះ មានរយៈពេលជាង៣ខែមកហើយ ដែលអ្នកតាមដានស្ថានការណ៏នយោបាយ អ្នកច្បាប់
និងមន្រ្តីសិទ្ធិមនុស្ស ចាត់ទុកថារឿងនេះ គឺជារៀងនយោបាយសុតសាត ដែលគណបក្សកាន់អំណាច
ចង់បង្ករបញ្ហាកាន់តែស្មុកស្មាញ មកលើគណបក្សសង្គ្រោះជាតិនោះ ។
កត្តាទាំងនេះហើយ បង្ហាញពីការដើររថក្រោយ នៃលទ្ធិប្រជាធិបតេយ្យនៅកម្ពុជា
ក្រោមការដឹកនាំរបស់គណបក្សប្រជាជន ដែលមានលោក ហ៊ុន សែន ជានាយករដ្ឋមន្រ្តី ដោយក្នុងនោះសូម្បីតែ
ឧបការីរង រដ្ឋមន្ត្រីការបរទេសសហរដ្ឋអាមេរិក កាលពីពេលថ្មីៗនេះ
ក៏បានលើកឡើងផងដែរថា ប្រទេសកម្ពុជាកំពុងស្ថិតក្នុងចំណោមប្រទេស ដែលដើរថយក្រោយខាងលទ្ធិប្រជាធិបតេយ្យនិងសិទ្ធិមនុស្ស សម្រាប់តំបន់អាស៊ីអាគ្នេយ៍
ក្នុងខណៈពេលដែលប្រទេសភូមាកំពុងតែបោះជំហាន ឆ្ពោះទៅរកលទ្ធិប្រជាធិបតេយ្យ ។
ដូច្នេះ ដើម្បីស្តាលទ្ធិប្រជាធិបតេយ្យ នៅកម្ពុជា អោយមានភាពល្អប្រសើរ
លោកប្រធាន សម រង្ស៊ី និងលោកអនុប្រធាន កឹម សុខា
ក្នុងដំណើរបំពេញបេសកកម្មការងារនៅក្រៅប្រទេស ក៏បាន និង កំពុងស្វែងរកអន្តរាគមន៏ ពីអន្តរជាតិ
ដោយធ្វើយ៉ាងណា អោយរដ្ឋាភិបាលរបស់លោក ហ៊ុន សែន ងាកមកគោរពលទ្ធិប្រជាធិបតេយ្យ និងសិទ្ធិមនុស្ស
ដោយបញ្ចប់ការធ្វើទុក្ខបុកម្នេញលើអ្នកនយោបាយ សកម្មជនគណបក្សប្រឆាំង
ប្រជាពលរដ្ឋរងគ្រោះ ក្រីក្រទន់ខ្សោយ រួមទាំងសកម្មជន សិទ្ធិមនុស្ស ដីធ្លី
និងសង្គមស៊ីវិល ដែលធ្វើការលើផ្នែកសិទ្ធិពលរដ្ឋជាដើម ស្របតាមស្មារតីនៃកិច្ចព្រមព្រៀង
ទីក្រុងប៉ារីស ថ្ងៃទី២៣ តុលា ១៩៩១ ផងដែរ ៕
No comments:
Post a Comment
yes