ដោយៈសស៊ីណា
សង្គមជាតិមួយ អាចរីកចម្រើនរុងរឿងទៅបាន គឺអាស្រ័យទាំងស្រុងទៅលើលើក្បាលម៉ាស៊ីន
ដឹកនាំជាតិ និងការចូលរួមយ៉ាងសកម្មពីប្រជាពលរដ្ឋ ហេតុនេះ គណបក្សសង្រ្គោះជាតិ យល់ ឃើញថា
ស្ថានភាពសីលធម៌សង្គមខ្មែរនាពេលបច្ចុប្បន្ន ហាក់មានការធ្លាក់ចុះយ៉ាងខ្លាំង ជាពិ សេស
គឺសីលធម៌នៃការបញ្ចេញមតិនានា ដោយការប្រើប្រាស់នូវពាក្យសម្តីអសុរោះ ឬការជេរប្រមាថ ដែលប៉ះពាល់ដល់សេចក្ដីថ្លៃថ្នូរ
និងសិទ្ធិអ្នកដទៃ ។
ដូចនេះ ប្រជាពលរដ្ឋខ្មែរ គ្រប់ស្រទាប់វណ្ណៈ គ្រប់និន្នាការនយោបាយ
និងសាសនាទាំងអស់ មេត្តាគោរពច្បាប់ និងគោលការណ៍ទូទៅនៃរបបប្រជាធិបតេយ្យសេរី ព្រមទាំងពង្រឹងនូវឯកភាពជាតិកម្ពុជា។
យោងតាមកិច្ចប្រជុំគណៈកម្មាធិការអចិន្ដ្រៃយ៍ គណបក្សសង្រ្គោះជាតិ
ថ្ងៃទី១៣ ខែមករា ឆ្នាំ២០១៦ គណបក្សសង្រ្គោះជាតិ សម្រេចអំពាវនាវ ស្នើសុំឲ្យប្រជាពលរដ្ឋខ្មែរ
និងយុវជន យុវនារី ដែលជាសសរទ្រូង និងជាអនាគតអ្នកដឹកនាំជាតិខ្មែរទាំងអស់ មេត្តាប្រកាន់ភ្ជាប់នូវសីលធម៌
ភាពថ្លៃថ្នូរ គោរពច្បាប់ និងសិទ្ធិគ្នាទៅវិញទៅមក ដោយបញ្ជ្រៀសនូវការប្រើប្រាស់ វប្បធម៌លាបពណ៌
ឬការជេរប្រមាថ និងការរិះគន់ដោយគ្មានគោលការណ៍នៅក្នុងការបញ្ចេញមតិនានាតាមប្រព័ន្ធផ្សព្វផ្សាយគ្រប់ប្រភេទ
។
តាមប្រភពដដែលបានបន្ដឲ្យដឹងទៀតថា កន្លងមកដូចដែលយើងបានឃើញហើយថា
ការប្រើប្រាស់សេរីភាព នៃការបញ្ចេញមតិហួសព្រំដែនកំណត់នៃច្បាប់ តាមរយៈការសរសេរ ឬតាមវិធីផ្សេងតាមប្រព័ន្ធផ្សព្វផ្សាយ
ដែលមានលក្ខណៈអសីលធម៌ ជេរប្រមាថ ឬប្រើរូបភាពប្រមាថគ្រប់ទម្រង់នេះ ជាមូលហេតុនាំឲ្យឲ្យសាមីខ្លួនមានទុក្ខទោស
ហើយក៏ធ្វើឲ្យសង្គមជាតិបែកបាក់ និងបាត់បង់នូវកិត្យានុភាពជាតិទៀតផង។
ហេតុនេះ គណបក្សសង្រ្គោះជាតិ នូវតែទទូចសូមឲ្យប្រជាពលរដ្ឋខ្មែរទាំងអស់
ជាពិសេសយុវជន យុវនារី រួមគ្នាគោរពច្បាប់ និងចូលរួមក្នុងសកម្មភាពសង្គមតាមរយៈការប្រើប្រាស់សិទ្ធិរបស់ខ្លួនដោយត្រឹមត្រូវ
ព្រមទាំងឈរលើស្មារតីរួមគ្នា គឺការកសាងជាតិ រួបរួមជាតិ ផ្សះផ្សារជាតិ និងឯកភាពជាតិ
ដោយតម្កល់ផលប្រយោជន៍ជាតិ និងប្រជាពលរដ្ឋជាធំ ជាពិសេសរួមគ្នាដោះស្រាយបញ្ហាជាតិដោយសន្ដិវិធី
គោរពច្បាប់ លុបបំបាត់បញ្ហានិទណ្ឌភាពក្នុងសង្គម និងមិនគុំកួនសងសឹក មិនយកខ្មែរណាជាសត្រូវ។
គួរជម្រាបថា ប្រជាពលរដ្ឋគ្រប់រូប មានសិទ្ធិស្មើគ្នាៗចំពោះមុខច្បាប់
ទាំងសេរីភាពក្នុងការបញ្ចេញមតិ ការប្រមូលផ្ដុំ ការជួបជុំ និងរបបសារពត៌មានជាដើម ហើយសិទ្ធិសេរីភាពនេះត្រូវបានកំណត់ក្នុងច្បាប់ជាតិ
និងអន្ដរជាតិ ដើម្បីធានានូវប្រសិទ្ធិភាពនៃការអនុវត្តសិទ្ធិ ជាពិសេសធានានូវសន្ដិសុខសណ្ដាប់ធ្នាប់សង្គម
តែទោះជាយ៉ាងណាក៏ដោយសិទ្ធិសេរីភាពនេះមិនអាចបំពាន ឬប៉ះពាល់សិទ្ធិសេរីភាពអ្នកដទៃបានទេ
ហើយការបំពាននេះ អាចក្លាយជាបទល្មើសបាន ប្រសិនបើច្បាប់បានបញ្ញត្តិ៕
No comments:
Post a Comment
yes