សង្គមស៊ីវីលបន្ទររិៈគន់រដ្ឋាភិបាលខ្មែរ និងលាវ ចំពោះការបើកដៃឲ្យទប់ទន្លេមេគង្គធ្វើទំនប់វារីអគ្គិសនី
ទំនប់វារីអគ្គិសនីមួយកន្លែងស្ថិតនៅក្នុងប្រទេសលាវ អង្គការសង្គមស៊ីវិលទាំងក្នុង និងក្រៅស្រុកកាលពីសប្ដាហ៏មុន បានបន្ទរការរិៈគន់យ៉ាងខ្លាំងក្លា ដល់គម្រោងស្ថាបនាទំនប់វារីអគ្គីសនីរបស់រដ្ឋាភិបាល នៃបណ្ដាប្រទេសជាសមាជិកគណកម្មការទន្លេមេគង្គដែលធ្វើឲ្យប៉ះពាល់ ធ្ងន់ធ្ងរដល់បរិស្ថាន ជីវិតមនុស្ស សត្វនិងរុក្ខជាតិ។
អង្គការចំនួន២៦៣មកពីបណ្ដាប្រទេសចំនួន៥១ដែលក្នុងនោះមានខ្មែរ ចំនួន១៤ផង បានជម្រុញឲ្យមេដឹកនាំប្រទេសលាវ និងសៀមលុបចោលជាបន្ទាន់នូវគម្រោងទំនប់សាយ៉ាប៊ូរីនៅលើទន្លេមេគង្គ ក្នុងប្រទេសលាវ។
អង្គការទាំងនោះបានលើកឡើងនៅក្នុងសេចក្ដីថ្លែងការរបស់ខ្លួនថា «យើងជឿថា គម្រោងនេះនឹងបង្ករការបំផ្លិចបំផ្លាញធ្ងន់ធ្ងរ និងការគម្រាមកំហែងដល់ការអភិវឌ្ឍន៏ ការអភិរក្ស។ ការខូចខាតមិនអាចជួសជុលបានដែលបង្ករឡើងដោយទំនប់សាយ៉ាប៊ូរីចំពោះ ទន្លេមេគង្គ និងការបាត់បងជាអចិន្រ្ដៃនូវរបរចិញ្ចឹមជីវិត របស់ប្រជាជននៅតំបន់នេះ»។ជាមួយគ្នាអង្គការទាំងនោះក៏បានអំពាវនាវឲ្យ ប្រទេសសៀមបញ្ឈប់ការនាំចូលអគ្គិសនីពីទំនប់សាយ៉ាប៊ូរីផងដែរ។
លិខិតនេះជាផ្នែកមួយ នៃការបន្ទរសម្លេងព្រួយបារម្ភជាញយដងយ៉ាងរំពង របស់សង្គមស៊ីវិលចំពោះផលប៉ះពាល់ប្រកបដោយគ្រោះថ្នាក់បណ្ដាលមកពី ទំនប់វារីអគ្គីសនីនោះ។ គឺជាអ្វីដែលគេមើលឃើញផលចំណេញនោះមានតិចតួច ហើយភាគច្រើនធ្លាក់ចូលទៅក្នុងហោប៉ៅ របស់អ្នកមានអំណាច ចំណែកហានិភ័យ សេចក្ដីគ្រោះសោកយ៉ាងធំធេងធ្លាក់មកលើប្រជាពលរដ្ឋភាគច្រើន។
អង្គការទន្លេ៣ ដែលជាបណ្ដាញការពារទន្លេសេសាន ស្រែពក និងសេកុង ជាញយដងបានបើកយុទ្ធនាការប្រឆាំងចំពោះផែនការរដ្ឋាភិបាលបោះទីតាំង រោងចក្រផលិតអគ្គីសនីពីទឹកនៅតាមបណ្ដាទន្លេទាំងនេះ។ ពួកគេបានលើកឡើង
ថា ប៉ុន្មានឆ្នាំចុងក្រោយនេះ ឥទ្ធិពលសារជាតិគីមីពីទំនប់វារីអគ្គីសនីមកពីប្រទេសចិន យួន លាវជាដើម បានធ្វើឲ្យរងគ្រោះដល់អ្នកប្រើប្រាស់ទឹកយ៉ាងខ្លាំងក្លា។ ហើយផែនការរដ្ឋាភិបាលក្នុងការបង្កើតទំនប់វារីអគ្គីសនីនៅតាម ដងទន្លេទាំងនេះវារិតតែធ្វើឲ្យមានផលប៉ះពាល់ធ្ងន់ធ្ងរថែមទៀត។
សហគមន៏ប្រជាពលរដ្ឋទន្លេ៣បានថ្លែងសារទុក្ខដូច្នេះថា ដោយសារតែទំនប់វារីអគ្គីសនីបានធ្វើឲ្យទន្លេដែលធ្លាប់តែទ្រទ្រង់ ជីវិតមនុស្ស សត្វ រុក្ខជាតិ ក្លាយទៅជាកន្លែងដ៏គ្រោះថ្នាក់បំផុត។ «ទឹកទន្លេប្រែពណ៌ខៀវ គោក្របីមិនអាចផឹកបានដូចមុនទេ ហើយមនុស្សក៏មិនអាចដួសយកមកប្រើប្រាស់បានដែរ»។
ប៉ុន្ដែបើទោះជាដូច្នេះក្ដី ការលើកឡើងពីក្ដីកង្វល់ និងទុក្ខសោករបស់ប្រជាពលរដ្ឋពុំត្រឹមតែពុំបានទទួលការចាប់អារម្មណ៏ យកចិត្ដទុកដាក់ពីរដ្ឋាភិបាលប៉ុណ្ណោះទេ ផ្ទុយទៅវិញបែរជាទទួលបានការចំអកឡកឡឺយពី ហ៊ុន សែន។ ដោយបានចាត់ទុកថា វាជារឿងជ្រុលនិយម។
ហ៊ុន សែន បានថ្លែងជាសាធារណៈកាលពីពេលថ្មីៗនេះថា គំនិតអភិរក្សរបស់អង្គការសង្គមស៊ីវិលមួយចំនួនហាក់ដូចជាហួសហេតុពេក ហើយថា ខ្លួនមិនញញើតចំពោះការចាត់វិធានការដែលសំដៅទៅដល់ការបំផ្លាញ សម្បត្ដិធម្មជាតិសម្រាប់បំរើរបស់ដែលហៅថា ការអភិវឌ្ឍន៏នោះទេ។
ជាមួយគ្នាផ្អែកតាមសេចក្ដីប្រកាសព័ត៌មានរបស់ក្រសួងឧស្សហកម្មរ៉ែ និងថាមពលបានឲ្យដឹងកាលពីពេលថ្មីៗនេះថា រោងចក្រអគ្គិសនីដើរដោយកម្លាំងទឹកមួយដែលចំណាយទុន៧រយលានដុល្លារ រវាងក្រុមហ៊ុនក្នុងស្រុកឈ្មោះ Royal Group ដែលមានភាគហ៊ុន៤១ភាគរយ និងក្រុមហ៊ុនយួនឈ្មោះ Vietnam Electricity ដែលមានភាគហ៊ុន៥១ភាគរយនឹងចាប់ផ្ដើមដំណើរការនៅឆ្នាំ២០១១នេះ លើដងទន្លេសេសានក្នុងខេត្ដស្ទឹងត្រែង។
ទាក់ទងបញ្ហានេះ ប្រជាពលរដ្ឋនៅខេត្ដកំពតក្បែរតំបន់ទឹកឈូ ជាតំបន់ទេសចរណ៏ធម្មជាតិមួយដែលរដ្ឋាភិបាលទើបផ្ដល់ទៅឲ្យក្រុមហ៊ុន ចិន ហើយចាប់ផ្ដើមកសាងទំនប់វារីអគ្គសនីកាលពីពេលថ្មីៗនេះ បានឲ្យដឹងថា ទឹកឈូដែលធ្លាប់តែមានពណ៌ថ្លា ប៉ុន្ដែពេលនេះបែជាមានពណ៌ខៀវស្រអាប់មាន
សារជាតិគីមី និងជាតិកំបោរ។ប្រជាពលរដ្ឋបាននិយាយថា ប្រភពទឹកដែលធ្លាប់តែទ្រទ្រង់ជីវិត ប៉ុន្ដែបន្ទាប់ពីមានទំនប់វារីអគ្គីសនី ពេលនេះវាទៅជារឿងដែលគួឲ្យភ័យខ្លាចបំផុត។កុំថាឡើយតែយកមកទទួលទាន ឬប្រើប្រាស់សូម្បីតែប៉ះពាល់វាក៏មិនហ៊ានដែរ។ ពេលនេះប្រភពទឹកកំពុងតែបានគម្រាមយ៉ាងធ្ងន់ធ្ងរដល់ភាវៈមានជីវិត នានាក្នុងប្រទេសកម្ពុជា៕
ពីគេហទំព័រ៖ សារព័ត៌មានសេរី
No comments:
Post a Comment
yes