ពលរដ្ឋ​​ភូមិ​​ជាំ​ក្សាន្ត​​ខេត្ត​ព្រះ​វិហារ​ឡើង​មក​តវ៉ា​រឿង​ដីធ្លី​ជា​ថ្មី

អ្នក​ស្រី​ ឃីម ​ខុន ​អាយុ​៥៤ឆ្នាំ ដែល​ធ្លាក់​ខ្លួន​ពិការ​ដោយ​ការ​វាយ​ធ្វើ​បាប​ពី​សំណាក់​

ប្រធាន​អង្គការ​និង បក្ខពួក

ប្រជាពលរដ្ឋ​ជាង​ ១៧​នាក់ តំណាង​ឲ្យ​ ២៨​គ្រួសារ រស់​នៅ​ភូមិ​ជាំក្សាន្ត ឃុំ​ជាំក្សាន្ត ស្រុក​ជាំ​ក្សាន្ត ខេត្ត​ព្រះ​វិហារ បាន​ធ្វើ​ដំណើរ​មក​ភ្នំពេញ ដាក់​ពាក្យ​បណ្តឹង​សុំ​អន្តរា​គមន៍ ជា​ថ្មី​ម្តង​ទៀត​នៅ​ខុទ្ទកាល័យ​លោក​នាយក​រដ្ឋ​មន្ត្រី​ហ៊ុន សែន​នៅ​ព្រឹក​ថ្ងៃ​ព្រហស្បតិ៍​នេះ។

ក្នុង​ពាក្យ​បណ្តឹង​សុំ​អន្តរា​គមន៍​ដែល​ដាក់​ជូន​ខុទ្ទកាល័យ​លោក​នាយក​រដ្ឋ​មន្ត្រី​ជា​ថ្មី​ម្តង​ទៀត​នេះ បាន​ស្នើ​សុំ​ឲ្យ​លោក​នាយក​រដ្ឋ​មន្ត្រី​ហ៊ុន សែន ជួយ​អន្តរាគមន៍ ផ្តល់​យុត្តិធម៌​ប្រគល់ដីជូនប្រជាពលរដ្ឋរស់នៅ​ភូមិ-ឃុំ​ខាង​លើ​វិញ ដែលត្រូវលោកមេឃុំជាំក្សាន្តរំលោភយក ដោយ​មិន​ត្រឹម​ត្រូវ។

ក្នុង​លិខិត​ស្នើ​សុំ​អន្តរា​គមន៍​ដាច់​ដោយ​ឡែក​មួយ​ទៀត​ ប្រជាពលរដ្ឋ​បាន​​ស្នើ​សុំ​រាជ​រដ្ឋាភិ​បាល​កម្ពុជា​ជួយ​អន្តរា​គមន៍​ទៅ​អាជ្ញាធរ​ខេត្ត​ព្រះ​វិហារ​បញ្ឈប់​ការ​ឈូស​ឆាយ​ដី​ស្រែ​ចំការដោយ​លោក ប៉ែន លឹម ហៅ ស ឈុនលឹម ដែល​បាន​ដឹក​នាំ​កម្លាំង​ប្រដាប់​វុធ​រំលោភ​យក​ដី​ ៣៤៥ ហិកតា និង​បំផ្លិច​បំផ្លាញ​ផល​ដំណាំ និង​ទ្រព្យ​សម្បត្តិ​របស់​ប្រជាពលរដ្ឋ​ទាំង ៩៤ គ្រួសារ​នោះ។

ក្រៅ​ពីការ​ចោទ​ប្រកាន់​ពី​រឿង​រំលោភ​យក​ដី​ប្រជាពលរដ្ឋ ប្រធាន​អង្គការ​រូប​នេះ​ក៏ត្រូវ​ប្រជាពលរដ្ឋ​ចោទ​ពី​បទ​ឆបោក​និង រំលោភ​សិទ្ធិ​មនុស្ស​ដោយ​ប្រើ​ហិង្សា​ផង​។

អ្នក​ស្រី​ ឃីម ​ខុន ​អាយុ​៥៤ឆ្នាំ ដែល​ធ្លាក់​ខ្លួន​ពិការ​ដោយ​ការ​វាយ​ធ្វើ​បាប​ពី​សំណាក់​ប្រធាន​អង្គការ​និង បក្ខពួក​បាន​អះអាង​ ទាំង​អួលដើម​ក​ថា គាត់​បាន​ទិញ​ដី​ទំហំ​៦០ម៉ែត្រ​គុណ​១០០​ម៉ែត្រ​ ពី​ឈ្មោះ​ ប៉ែន លឹម ​ក្នុង​តម្លៃ៦​ពាន់​ដុល្លារ​អាមេរិក ​កាល​ពី​ឆ្នាំ​២០០៧។​ប៉ុន្តែ ក្រោយ​មក​ឈ្មោះ​នេះ​បាន​លួច​លក់​ដី​នោះ​ឲ្យ​ទៅ​អ្នក​ផ្សេង​ទៀត ​ដែល​ធ្វើ​ឲ្យ​គ្រួសារ​គាត់​មាន​ជម្លោះ​ជាមួយ​នឹង​អ្នក​ទិញ​ក្រោយ​ហើយ​ សព្វថ្ងៃ​នេះ អ្នក​ទិញ​នោះ​តាម​បង្ករឿង​នឹង​គំរាម​បណ្តេញ​គ្រួសារ​គាត់​ចេញ ពីដី​នោះ​ថែម​ទៀតផង​។

អ្នក​ស្រី ឃីម ខុន និយាយ​នៅ​មុខ​វត្ត​បទុម​វត្តី​ថា៖ «វា​អយុត្តិធម៌​ខ្លាំង​ណាស់​សម្រាប់​ខ្ញុំ។ ប៉ែន លឹម និង​បក្ខពួក​បាន​វ៉ៃ​ខ្ញុំ​រហូត​ពិការ​ជើង​ទាំង​ពីរ នៅពេល​ខ្ញុំ​រស់​នៅ​ក្នុង​អង្គការ​នេះ ហើយ​បោក​ប្រាស់​យក​ដី​មួយ​កន្លែង ទៅ​លក់​ឲ្យ​មនុស្ស​ពីរ​នាក់​»។ គាត់​ថា​លុយ​ដែល​ទិញ​ដី​នោះ​បាន​មក​ពី​កម្លាំង​ញើស​ឈាម​កូន​ទាំង​ប្រាំ​នាក់ របស់​គាត់​ទៅ​ធ្វើ​ការ​នៅ​ប្រទេសថៃ។

សូមបញ្ជាក់ថា អង្គការ​វាយអេដស៍​បាន​ទទួល​ដី​សម្បទាន​សង្គម​កិច្ច​ពី​រាជ​រដ្ឋាភិបា​ល ៥៥៦​ហិកតា កាល​ពី​ឆ្នាំ​២០០៧ ទៅ​ចែក​ជូន​ពលរដ្ឋ​ក្រីក្រ ប៉ុន្តែ ​បែរ​ជា​យក​ដី​លក់​ជាន់​ប្លង់​គ្នា​ ទើប​បង្ក​ឲ្យ​មាន​ជម្លោះ​រហូត​មកទល់​ពេល​នេះ ហើយ​នេះ​ជា​លើកទី៤ ហើយ​ប្រជាពលរដ្ឋ​ឡើង​មក​​ភ្នំពេញ​​ ដើម្បី​សុំ​លោកនាយករដ្ឋមន្ត្រី ​ហ៊ុន​ សែន ​​ជួយអន្តរាគម៍​​។ ខុទ្ទ​កាល័យ​លោក​នាយក​រដ្ឋ​មន្ត្រី ក៏​បាន​ឲ្យ​អាជ្ញាធរ​ខេត្ត​ដោះ​ស្រាយ​បញ្ហា​នេះ​ ប៉ុន្តែ​ពួក​គាត់​រង់ចាំ​ដំ​ណោះ​ស្រាយ​ពី​អាជ្ញាធរ​មូល​ដ្ឋាន​រហូត​មក ​តែ​គ្មាន​លទ្ធផល​ ដោះស្រាយ​មិន​ចេញ​។