ដោយ ម៉ៅ សុធានី
ប្រភពព័ត៌មាន The Washington Post រាយការណ៍នៅថ្ងៃអាទិត្យម្សិលមិញនេះថា រដ្ឋាភិបាលភូមាកំពុងតែបង្ហាញមុខសញ្ញាថ្មីនៃការកែប្រែសេរីភាពសារព័ត៌មាន។
លោក Than Htut Aung ប្រធានភ្នាក់ងារសារព័ត៌មាន Eleven ដែលគ្រប់គ្រងទស្សនាវដ្ដីចំនួន៤ ចេញផ្សាយរាល់សប្តាហ៍ និងសារព័ត៌មានជាច្រើនទៀត នៅប្រទេសភូមា បានយល់ស្របដូចគ្នាថា នេះជាលើកទី១ហើយ ក្នុងរយៈពេលរាប់សិបឆ្នាំមកនេះ ដែលគោលនយោបាយរបស់រដ្ឋាភិបាលភូមាបច្ចុប្បន្នកំពុងធ្វើការផ្លាស់ប្ដូរទំនងជាងាកទៅរកភាពល្អប្រសើរ។ លោក Than Htut Aung បន្តថា កាលពីឆ្នាំមុន អ្នកសារព័ត៌មាន ៣នាក់ របស់ភ្នាក់ងារសារព័ត៌មាន Eleven ត្រូវបានប៉ូលិសចាប់ឃុំខ្លួន ៣ថ្ងៃ បន្ទាប់ពីបានចុះផ្សាយរូបភាពទឹកជំនន់ ប៉ុន្តែក្នុងសប្ដាហ៍នេះ សារព័ត៌មានរបស់លោក មិនត្រឹមតែចុះផ្សាយរូបភាពទឹកជំនន់ប៉ុណ្ណោះទេ ប៉ុន្តែមានទាំងដាក់រូបភាព និងមតិយោបល់របស់មេដឹកនាំគណបក្សប្រឆាំង អ្នកស្រី អង់សាន់ សូជី ព្រមទាំងសកម្មជន ២នាក់ ដែលតែងតែរិះគន់រដ្ឋាភិបាលទៀតផង។
ប្រភពដដែលបន្តថា ជំហរផ្លាស់ប្ដូរមួយទៀតរបស់រដ្ឋាភិបាលភូមា គឺលោក Thein Sein ប្រធានាធិបតីថ្មី ដែលជាអតីតនាយទាហានកាលពីសប្ដាហ៍មុននេះ បានផ្ញើលិខិតមួយច្បាប់ទៅសភាភូមា ដោយប្រកាសផ្អាកគម្រោងសាងសង់ទំនប់ដ៏ធំមួយរបស់ចិន នៅតាមដងទន្លេ Irrawaddy។ ក្នុងលិខិតនោះ លោក Thein Sein ក៏បានបញ្ជាក់ថា រូបលោកត្រូវបានប្រជាពលរដ្ឋភូមាបោះឆ្នោតគាំទ្រ ដូចនេះលោកត្រូវតែគោរព ធ្វើតាមការចង់បានរបស់ពលរដ្ឋលោក។
ទង្វើលោក Thein Sein នេះ ត្រូវបានគេមើលឃើញថា រដ្ឋាភិបាលភូមា ដែលរាប់សិបឆ្នាំមកនេះមានទំនាក់ទំនងជិតស្និទ្ធជាមួយប្រទេសចិន កំពុងតែមានបំណងចង់ដកខ្លួនឆ្ងាយពីប្រទេសចិន ដើម្បីងាកមកទទួលការគាំទ្រពីបណ្ដាប្រទេសលោកខាងលិចវិញ ជាពិសេសគឺចង់បានឲ្យស.រ.អា. និងសហភាពអឺរ៉ុបដកការដាក់ទណ្ឌកម្មសេដ្ឋកិច្ចចេញពីភូមា។
នៅទន្ទឹមនេះដែរ ក្រុមសារព័ត៌មានមួយចំនួន បានរាយការណ៍ថា លោក Thein Sein មានគម្រោងដោះលែងអ្នកទោសនយោបាយភូមាជាច្រើនពាន់នាក់ថែមទៀតផង៕
ពីវិទ្យុ អាស៊ីសេរី
No comments:
Post a Comment
yes