សាលាដំបូងរាជធានីភ្នំពេញ នៅថ្ងៃទី២៥ ខែវិច្ឆិកា ឆ្នាំ២០១១ បានប្រកាសសាលក្រមកំបាំងមុខ ផ្ដន្ទាទោសលោក ណាន់ ស៊ី ឲ្យជាប់គុករយៈពេល ៤ឆ្នាំ និងពិន័យជាប្រាក់ចំនួន ៨លានរៀល ស្មើនឹង ២.០០០ដុល្លារអាមេរិក ក្រោមបទចោទថា លោកបានគេងយកផលប្រយោជន៍ដោយខុសច្បាប់ ក្នុងការសាងសង់ស្ថានទូតកម្ពុជា នៅប្រទេសប្រ៊ុយណេ (Brunei) រវាងឆ្នាំ២០០៨ និងឆ្នាំ២០០៩ កន្លងទៅ។
លោក ណាន់ ស៊ី ជាឯកអគ្គរាជទូតកម្ពុជា ប្រចាំនៅប្រទេសប្រ៊ុយណេ និងជាអតីតអ្នកតំណាងរាស្ត្រនៃគណបក្សហ៊្វុនស៊ិនប៉ិច ត្រូវបានក្រសួងការបរទេសកម្ពុជា បានបណ្ដេញចេញពីតំណែងនៅពេលថ្មីៗនេះ។
ចៅក្រមជម្រះក្ដី លោក កោ វណ្ឌី បានអានសាលក្រមថា តុលាការបានចេញដីកាស្វែងរកចាប់ខ្លួនលោក ណាន់ ស៊ី ចាប់ពីថ្ងៃប្រកាសសាលក្រមនេះ និងបើកផ្លូវឲ្យប្ដឹងទាស់ទៅសាលាឧទ្ធរណ៍ក្នុងរយៈពេល ៣០ថ្ងៃ កំណត់ដោយច្បាប់។
ការប្រកាសសាលក្រមស្វែងរកចាប់ខ្លួនលោក ណាន់ ស៊ី បានធ្វើឡើងក្រោយពីសាលាដំបូងរាជធានីភ្នំពេញ បានបើកសវនាការកាត់ទោសកំបាំងមុខនៅថ្ងៃទី២ ខែវិច្ឆិកា កន្លងទៅនេះ។
ការកាត់ទោសនេះ គឺផ្អែកតាមមាត្រាទី ៥៩៧ និងមាត្រា ៥៩៨ នៃច្បាប់ក្រមព្រហ្មទណ្ឌថ្មី ឆ្នាំ២០១០។ លោក ណាន់ កំពុងតែជាប់បណ្ដឹងមួយទៀត គឺទាមទារឲ្យលោកសងសំណងរដ្ឋប្បវេណីអំពីការកេងប្រវ័ញ្ចថវិការដ្ឋនោះ ដែលមានក្រសួងការបរទេសកម្ពុជា ជាដើមបន្តឹងទាំងពីរ។
មេធាវីការពារក្ដីឲ្យក្រសួងការបរទេសកម្ពុជា លោក គី តិច បានមានប្រសាសន៍ក្រោយពីការប្រកាសសាលក្រមនោះថា លោកមិនជំទាស់សាលក្រមនេះទេ៖ «មន្ត្រីរាជការទាំងអស់ត្រូវតែប្រុងប្រយ័ត្នដែរ ការងារមិនធ្វើឲ្យបាត់បង់ដោយចេតនា ឬដោយអចេតនាទេ។ បាត់បង់ថវិការដ្ឋ កិបកេងថវិការដ្ឋ ត្រូវមានការផ្ដន្ទាទោសអ៊ីចឹង»។
អ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍ថា ក្រសួងស្វាគមន៍ចំពោះការសម្រេចក្ដីបែបនេះ៖«ព្រោះអាហ្នឹងជាសមត្ថកិច្ចរបស់តុលាការ ដូច្នេះទុកឲ្យតុលាការជាអ្នកសំរេចទៅចុះបាទ!»។
វិទ្យុអាស៊ីសេរី មិនទាន់អាចទាក់ទងលោក ណាន់ ស៊ី និងមេធាវីរបស់លោកបានទេ នៅថ្ងៃទី២៥ ខែវិច្ឆិកា ដោយសារតែមិនមានវត្តមានមកចូលរួមក្នុងសវនាការនេះ។
រឿងអាស្រូវពុករលួយនេះ បានផ្ទុះឡើងនៅឆ្នាំ២០១១ នៅគ្រាដែលក្រុមហ៊ុនសាងសង់សា្ថនទូតកម្ពុជា នៅប្រទេសប្រ៊ុយណេ បានប្ដឹងតវ៉ាមកក្រសួងការបរទេសកម្ពុជា។ ឯកសារដែលក្រសួងការបរទេសកម្ពុជា និងក្រុមអធិការកិច្ចបានស្រាវជ្រាវរកឃើញនោះ បានបញ្ជាក់ថា លោក ណាន់ ស៊ី មិនព្រមទូទាត់ថ្លៃសំណងទៅក្រុមហ៊ុនសាងសង់នោះឡើយ។
លោក ណាន់ ស៊ី បានជំពាក់ប្រាក់នៅធនាគារ និងចំណាយមិនប្រក្រតីសរុបជាង ៤៣ម៉ឺនដុល្លារអាមេរិក ខុសពីគំរោងចំណាយដើមចំនួនជាង ២៩ម៉ឺនដុល្លារអាមេរិក៕
អាស៊ីសេរី
No comments:
Post a Comment
yes