ទីភ្នាក់ងារសារព័ត៌មាន AFP ផ្សាយឲ្យដឹងថា កងសន្តិសុខវៀតណាមដែលស្លៀកពាក់ឯកសណ្ឋាន និងស៊ីវិល កាលពីថ្ងៃអាទិត្យ បានចុះបង្ក្រាបបាតុកម្មសន្តិវិធីរបស់ក្រុមបាតុករវៀតណាមទាំងនោះ ដែលមានគ្នាប្រមាណ ៣០នាក់ ក្នុងគ្រាដែលគេដើរធម្មយាត្រានៅកណ្ដាលទីក្រុងហាណូយ ដើម្បីគាំទ្រសំណើរបស់នាយករដ្ឋមន្ត្រីវៀតណាម លោក ង្វៀន តាន់ យុង (Nguyen Tan Dung) ដែលបានស្នើឲ្យរដ្ឋសភាវៀតណាម មានច្បាប់ថ្មីស្ដីពីការធ្វើបាតុកម្ម។
សំណើរបស់លោក ង្វៀន ធ្វើឡើងក្នុងបំណងដាក់បញ្ចូលសេរីភាពរបស់ប្រជាពលរដ្ឋ និងលទ្ធិប្រជាធិបតេយ្យ ឲ្យឋិតនៅក្រោមច្បាប់រដ្ឋធម្មនុញ្ញ។ ព្រោះថា រដ្ឋធម្មនុញ្ញបានអនុញ្ញាតឲ្យមានការធ្វើបាតុកម្ម។ ប៉ុន្តែនាយករដ្ឋមន្ត្រីវៀតណាមបានបញ្ជាក់ថា សំណើនេះក៏ត្រូវប្រឆាំងនឹងឥរិយាបថ និងសកម្មភាពទាំងឡាយណា ដែលរំខានដល់សន្តិសុខ និងសណ្ដាប់ធ្នាប់សាធារណៈ។ ក្រសួងសន្តិសុខសាធារណៈវៀតណាមជាអ្នកធ្វើសេចក្ដីព្រាងច្បាប់ថ្មីស្ដីពីការធ្វើបាតុកម្មនេះ។
អង្គការលើកលែងទោសអន្តរជាតិ (Amnesty International) បានឲ្យដឹងថា តាំងពីចុងឆ្នាំ២០០៩ មក កងសន្តិសុខវៀតណាមបានចុះចាប់ពួកអ្នករិះគន់នយោបាយរបស់រដ្ឋាភិបាលវៀតណាម បើទោះបីរិះគន់ដោយសន្តិវិធីក្ដី ក្នុងនោះមានអ្នកខ្លះត្រូវជាប់ពន្ធនាគាររយៈពេលយូរ៕
អាស៊ីសេរី
No comments:
Post a Comment
yes