មន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប.) បានឲ្យដឹងថា ការចាប់ឆ្នោតកំណត់លេខរៀងគណបក្សនយោបាយសម្រាប់បោះពុម្ពលើសន្លឹកឆ្នោតនៃការបោះឆ្នោតព្រឹទ្ធសភាអាណត្តិទី៣ ឆ្នាំ២០១២ ខាងមុខ គណបក្សប្រជាជនកម្ពុជា ជាប់លេខរៀងទី១ រីឯគណបក្ស សម រង្ស៊ី ជាប់លេខរៀងទី២។
លោក អ៊ឹម សួស្តី ជាប្រធាន គ.ជ.ប. ដែលចូលរួមក្នុងពិធីចាប់ឆ្នោតយកលំដាប់លេខរៀងគណបក្ស សម្រាប់បោះពុម្ពសន្លឹកឆ្នោត នាទីស្ដីការ គ.ជ.ប. ព្រឹកថ្ងៃទី២៩ ខែវិច្ឆិកា បានឲ្យដឹងថា ពិធីចាប់ឆ្នោតធ្វើឡើងក្រោមព្រះវត្តមានសម្តេចព្រះមហាសុមេធាធិបតី នន្ទ ង៉ែត សម្ដេចព្រះសង្ឃនាយកនៃព្រះរាជាណាចក្រកម្ពុជា ព្រះអង្គបានចាប់ចំគណបក្សប្រជាជនកម្ពុជា ជាប់លេខរៀងទី១ និងបក្ស សម រង្ស៊ី លេខរៀងទី២។
ការបោះឆ្នោតព្រឹទ្ធសភាអាណត្តិទី៣ ដែលនឹងប្រព្រឹត្តទៅនៅថ្ងៃទី២៩ ខែមករា ឆ្នាំ២០១២ មានគណបក្សនយោបាយឈរឈ្មោះបោះឆ្នោតតែចំនួនពីរទេ គឺគណបក្សប្រជាជនកម្ពុជា និងគណបក្ស សម រង្ស៊ី។ រីឯគណបក្សសិទ្ធិមនុស្ស គណបក្ស នរោត្តម រណឫទ្ធិ និងគណបក្សហ៊្វុនស៊ិនប៉ិច មិនបានចូលរួមប្រកួតការបោះឆ្នោតទេ ដោយសារតែគណបក្សទាំងនេះមិនមានសមាជិកគ្រប់គ្រាន់។
លោក សោម សឿន ជាសមាជិកគណៈកម្មការកណ្ដាល និងជាអនុប្រធានខុទ្ទកាល័យគណៈកម្មការកណ្តាលគណបក្សប្រជាជនកម្ពុជា។ លោកបានឲ្យដឹងក្រោយពិធីចាប់ឆ្នោតថា ការដែលគណបក្សខ្លួនជាប់លេខរៀងទី១ សម្រាប់បោះពុម្ពសន្លឹកឆ្នោតព្រឹទ្ធសភាអាណត្តិទី៣ ជាសញ្ញាបង្ហាញទៅរកភាពជោគជ័យសម្រាប់ការបោះឆ្នោតឆ្នាំ២០១២ ខាងមុខ។
លោក សោម សឿន បន្ថែម៖ «គណបក្សប្រជាជនកម្ពុជា បានត្រៀមរាល់លក្ខណៈសម្បត្តិសម្រាប់ចូលរួមការបោះឆ្នោត ដើម្បីសម្រេចបានជោគជ័យក្នុងការបោះឆ្នោតព្រឹទ្ធសភានេះ»។
ទោះជាបែបនេះក្តី លោក គួយ ប៊ុនរឿន ជាសមាជិកគណៈកម្មាធិការនាយក និងជាសមាជិកសភាគណបក្ស សម រង្ស៊ី។ លោកមានប្រសាសន៍ថា គណបក្ស សម រង្ស៊ី មិនសំខាន់លើការចាប់បានលេខរៀងទី១ ឬទី២ សម្រាប់បោះពុម្ពសន្លឹកឆ្នោតនេះទេ។ លោកថា សំខាន់គឺប្រសិទ្ធភាពរបស់សមាជិកព្រឹទ្ធសភាពីការគិតគូរពីផលប្រយោជន៍ប្រទេសជាតិ ពិសេសផលប្រយោជន៍ប្រជាពលរដ្ឋឯណោះទេ ទើបសំខាន់ជាង។
លោករំពឹងថា ការបោះឆ្នោតព្រឹទ្ធសភានីតិកាលទី៣ ឆ្នាំ២០១២ គណបក្ស សម រង្ស៊ី អាចនឹងទទួលបានចំនួនអាសនៈកើនលើស ៥ដង លើការបោះឆ្នោតអាណត្តិទី២ ដែលមានតែពីរអាសនៈ៖ «អ្វីដែលសំខាន់ជាទិសដៅគណបក្ស សម រង្ស៊ី នៅពេលដែលយើងទទួលបានតំណែងជាសមាជិកព្រឹទ្ធសភានោះ គឺយើងត្រូវតែយកតួនាទីរបស់ខ្លួន ត្រូវបំពេញកាតព្វកិច្ចបម្រើការពារផលប្រយោជន៍ប្រជាពលរដ្ឋ និងការពារផលប្រយោជន៍ជាតិ វាសំខាន់ជាងលំដាប់លេខរៀងទៅទៀត»។
មន្ត្រី គ.ជ.ប. បានឲ្យដឹងថា ការបោះឆ្នោតជ្រើសរើសសមាជិកព្រឹទ្ធសភា គឺជាការបោះឆ្នោតតាមបែបអសកល ដែលមានអ្នកបោះឆ្នោត និងអង្គបោះឆ្នោត គឺជាតំណាងរាស្ត្រស្ថិតក្នុងតំណែង និងសមាជិកក្រុមប្រឹក្សាឃុំ-សង្កាត់ទាំងអស់ក្នុងតំណែង នៅក្នុងក្របខ័ណ្ឌនៃភូមិភាគនីមួយៗតែប៉ុណ្ណោះ។
មន្ត្រី គ.ជ.ប. បានឲ្យដឹងទៀតថា ចំនួនអាសនៈនៃការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣ ឆ្នាំ២០១២ ខាងមុខ សរុបមានចំនួន ៥៧អាសនៈ។
ចំនួនអាសនៈតាមភូមិភាគនីមួយៗមាន ភូមិភាគទី១ ក្រុងភ្នំពេញ មាន ៦អាសនៈ ភូមិភាគទី២ ខេត្តកំពង់ចាម មាន ៨អាសនៈ ភូមិភាគទី៣ ខេត្តកណ្ដាល មាន ៥អាសនៈ ភូមិភាគទី៤ ខេត្តបាត់ដំបង បន្ទាយមានជ័យ សៀមរាប ឧត្តមានជ័យ និងប៉ៃលិន មាន ១០អាសនៈ ភូមិភាគទី៥ ខេត្តតាកែវ កំពត និងក្រុងកែប មាន ៧អាសនៈ ភូមិភាគទី៦ ខេត្តព្រៃវែង និងស្វាយរៀង មាន ៧អាសនៈ ភូមិភាគទី៧ ខេត្តកំពង់ស្ពឺ កំពង់ឆ្នាំង កោះកុង និងខេត្តព្រះសីហនុ មាន ៨អាសនៈ និងភូមិភាគទី៨ ខេត្តកំពង់ធំ ព្រះវិហារ ក្រចេះ ស្ទឹងត្រែង រតនគីរី និងមណ្ឌលគីរី មាន ៦អាសនៈ៕
អាស៊ីសេរី
No comments:
Post a Comment
yes