ប្រទេសកម្ពុជាដែលជាប្រធាននៃកិច្ចប្រជុំអន្តរជាតិលើកទី១១ នៃរដ្ឋភាគីអនុសញ្ញាអូតាវ៉ា ស្ដីពីការហាមឃាត់ការប្រើប្រាស់គ្រាប់មីន និងគ្រាប់បែកចង្កោមនោះ បានទទួលយកសំណើពីប្រទេសចំនួន៥ ដែលបានស្នើសុំពន្យារពេលនៃការអនុវត្តលើអនុសញ្ញានេះ សំរាប់រយៈពេល ១០ឆ្នាំទៀត ដោយសារតែប្រទេសទាំងនោះបានអះអាងថា ពួកគេនៅមិនទាន់ត្រៀមខ្លួននៅឡើយ ។ ចំណែកឯប្រទេសកម្ពុជា ក៏នៅមិនទាន់បានសំរេចតាមសំណើនោះនៅឡើយដែរ។
អនុសញ្ញាក្រុងអូតាវ៉ា ប្រទេសកាណាដា (Canada) នោះ ត្រូវបានចុះហត្ថលេខានៅឆ្នាំ១៩៩៧ ដែលបានហាមឃាត់ការប្រើប្រាស់គ្រាប់មីន និងគ្រាប់បែកចង្កោម ហាមឃាត់ការផលិតគ្រាប់មីន ការជួញដូរគ្រាប់មីន និងការស្តុកទុកគ្រាប់មីន។ សំណើសុំពន្យារពេលអនុវត្តអនុសញ្ញានោះ គេអនុញ្ញាតឲ្យធ្វើនៅរៀងរាល់ ៥ឆ្នាំម្ដង ឬ ១០ឆ្នាំម្ដង។
អ្នកសម្របសម្រួលផ្នែកព័ត៌មានស្ដីពីកិច្ចប្រជុំហាមឃាត់ ការប្រើប្រាស់គ្រាប់មីន លោក ខេរី ប្រីនឃឺត (Kerry Brinkert) បានមានប្រសាសន៍នៅក្នុងសន្និសីទកាសែតនៅថ្ងៃទី២៩ ខែវិច្ឆិកា នៅឯវិមានសន្តិភាព ដោយផ្ដោតលើលទ្ធផលនៃកិច្ចប្រជុំថ្ងៃដំបូងថ្មីៗនេះថា គ្មានចំលើយណាមួយចំពោះការស្នើសុំរបស់ប្រទេសចំនួន ៥នោះនៅឡើយទេ រហូតដល់ថ្ងៃសុក្រ សប្តាហ៍នេះ ជាថ្ងៃបិទកិច្ចប្រជុំ។
លោក ខេរី ប្រីនឃឺត៖ «គ្មានចំលើយណាមួយត្រូវបានធ្វើនៅឡើយទេ។ ចំលើយនោះទៀតសោត មិនមែនចំលើយសាមញ្ញ (បាទ ឬក៏ទេ) ឡើយ។ អ្វីដែលកំពុងតែកើតឡើងនោះ គឺប្រធាននៃកិច្ចប្រជុំអន្តរជាតិនេះ (លោក ប្រាក់ សុខុន) កំពុងតែរៀបចំធ្វើសេចក្ដីព្រាងនៃសេចក្ដីសំរេចមួយចំពោះសំណើនោះ ដើម្បីចែកជូនក្នុងកិច្ចប្រជុំនៅថ្ងៃព្រហស្បតិ៍»។
លោកបានបន្តថា ប្រទេសចិន មិនមែនជាប្រទេសហត្ថលេខីលើអនុសញ្ញានេះទេ ប៉ុន្តែបានចូលរួមក្នុងកិច្ចប្រជុំនានាបានទៀងទាត់។ ចំណែកឯប្រទេសភូមាវិញ មិនបានចូលរួមប្រជុំនានាទៀងទាត់ទេកន្លងមក។
លោកនាយករដ្ឋមន្ត្រី ហ៊ុន សែន នៅក្នុងការបើកកិច្ចប្រជុំអន្តរជាតិនេះ នៅថ្ងៃទី២៧ ខែវិច្ឆិកា នេះ បានមានប្រសាសន៍ថា សង្គ្រាមបានបញ្ចប់នៅកម្ពុជាមែន កាលពីពីរទសវត្សកន្លងទៅនេះ ប៉ុន្តែសម្រែករបស់ជនរងគ្រោះដោយសារគ្រាប់មីននៅតែបន្ត៖ «ការដោះមីនជាលក្ខណៈមនុស្សធម៌បានចាប់ផ្ដើមពិតប្រាកដនៅឆ្នាំ១៩៩២ ដើម្បីផ្ដល់ដីសុវត្ថិភាពជូនជនភៀសខ្លួនជាង ៣៥ម៉ឺននាក់ ដែលត្រូវធ្វើមាតុភូមិនិវត្តន៍ក្រោមកិច្ចព្រមព្រៀងសន្តិភាពទីក្រុងប៉ារីស»។
ប្រទេសចំនួន ៥ ដែលបានស្នើសុំពន្យារពេលការអនុវត្តតាមអនុសញ្ញាក្រុងអូតាវ៉ានោះ មានដូចជា ទី១ ប្រទេសឈីលី (Chile) ទី២ សាធារណរដ្ឋកុងហ្គោ (Republic of Congo) ទី៣ ប្រទេសប្រជាធិបតេយ្យកុងហ្គោ (Democratic of Congo) ទី៤ ប្រទេសអាល់ហ្សេរី (Algeria) និងទី៥ ប្រទេសអេរីត្រ (Eritrea)។
ចាប់តាំងពីឆ្នាំ១៩៩៧ មក មានប្រទេសចំនួន ១៥៨ បានចុះហត្ថលេខាលើអនុសញ្ញាក្រុងអូតាវ៉ា ប្រទេសកាណាដានោះ។ មានប្រទេសចំនួន ៥៤ នៅក្នុងចំណោមប្រទេស ១៥៨នោះ ត្រូវតែអនុវត្តតាមអនុសញ្ញានោះឲ្យបានពេញលេញ។ ប្រទេសចំនួន ១៩ ក្នុងប្រទេស ៥៤នោះ បានអនុវត្តបានពេញលេញហើយ ប៉ុន្តែនៅមានប្រទេស ៣៥ទៀត កំពុងតែអនុវត្តនៅឡើយ៕
អាស៊ីសេរី
No comments:
Post a Comment
yes